ءبىرى «استانانى» كەشەگى جەڭىلىسى ءۇشىن جەردەن الىپ جەرگە سالىپ جاتسا, ەندى ءبىرى بۇل جەڭىلىستىڭ كەزدەيسوقتىق ەكەنىن ايتىپ, قارسى توپقا باسۋ ايتىپ جاتىر. وسى ورايدا ءبىز سپورت جۋرناليستەرى, ونىڭ ىشىندە فۋتبول تۋرالى جازىپ, تەلەەكراننان كوممەنتاتور بولىپ جۇرگەن كاسىبي مامانداردىڭ كەشەگى ماتچ تۋرالى پىكىرىن بىلگەن ەدىك.
ەرمۇحامەد ماۋلەن, كوممەنتاتور
«استانا» كومانداسىنىڭ كەشە «سەلتيكتەن» 0:5 ەسەبىمەن جەڭىلگەنى مەنىڭ ويىمشا, ءجاي عانا ساتسىزدىك. كەز كەلگەن كوماندالاردا مۇنداي ءىرى ەسەپپەن جەڭىلىس بولىپ تۇرادى. «استانا» بۇعان دەيىن وزدەرىڭىز كورگەندەي پولشانىڭ ەۋروپادا ويناپ جۇرگەن ەڭ مىقتى دەگەن «لەگيا» كومانداسىن وپ-وڭاي ۇتتى. مەنىڭشە, كەشەگى ماتچتان تراگەديا جاساۋ دۇرىس ەمەس. ەۋروپادا ءىرى ەسەپپەن ۇتىلىپ جۇرگەن كوماندالار جەتەرلىك. ءتىپتى «بارسەلونانىڭ» ءوزى بيىل فرانتسيالىق «پسج» كومانداسىنان 0:4 ەسەبىمەن ۇتىلعانى جانكۇيەرلەردىڭ ەسىندە.
كەشەگى ويىننان كەيىن شوتلانديالىق جانكۇيەرلەردىڭ, جۋرناليستەردىڭ عالامتوردا جازىپ جاتقان اقپارات پەن ساراپتامالىق ماقالالارىنا سەنەتىن بولساق, كەشە «سەلتيكتىڭ» تەك ويىنى جۇرگەنىن, كوماندانىڭ جولى بولعانىن ايتىپ, جازىپ جاتىر. «استانا» كلۋبى ەندى ەۋروپا ليگاسىندا وزدەرىنە جوعارى ماقسات قويۋ كەرەك. جانە دە 1/8 كەزەڭىنە شىعۋىنا تىلەكتەسپىن.
ارشات وراز, بلوگەر
ەڭ الدىمەن 5:0 ەسەبىنىڭ ويىننىڭ ناقتى سۋرەتى ەمەس ەكەنىن ايتقىم كەلەدى. كەز كەلگەن كوماندادا فورس-ماجورلىق جەڭىلىستەر بولادى, ويىن مەن ناتيجەنىڭ سايكەس كەلمەيتىن كەزدەرى. كەشەگى «سەلتيك» ماتچى سولاي بولدى دەپ ويلايمىن. ءيا, الاڭ يەلەرى البەتتە قوناقتارعا قاراعاندا جاقسى وينادى, قورعانىستا ساۋاتتى بولدى. تەپكەن 4 سوققىسىنىڭ تورتەۋىنىڭ گول بولۋى جانە ەكى سوققىنىڭ اۆتوگولمەن كىرۋى - ولاردىڭ ساتتىلىگى. ارينە «فۋتبولدا ساتتىلىك كۇشتىلەر جاقتا بولادى» دەگەن ءسوز دە بار. «سەلتيك» كۇشتى بولعانى راس. بىراق بۇل «استانا» ناشار بولدى دەگەن ءسوز ەمەس. مۇمكىن ۇزاق جولدىڭ اسەرى, مۇمكىن ەۋروپا ليگاسىنا شىعىپ تۇرۋدى ويلاۋى اسەر ەتتى مە ەكەن؟ ويىنشىلاردىڭ كونتسەنتراتسياسى «لەگيا» ماتچىنداعىداي بولمادى. قارىمتا ماتچتا 5 گول قايتارۋ قيىن, بىراق كورەرمەندەر ءۇشىن وينايدى. ەكى جاقتىڭ دا ادەمى ويىنىمەن ناعىز فۋتبول مەيرامى بولادى دەپ ويلايمىن. «استانا» بيىل بىلتىرعىلارعا قاراعاندا كۇشتى. ويىنى دا ەۋروپاي بولا باستادى. بۇرىن ەموتسيا كوپ بولاتىن, سوڭعى مينۋت گولدارى سولاي كەلەتىن. قازىر سالقىنقاندىلىق بار, سەنىمدىلىك بار. بۇل قاسيەتى ەۋروپا ليگاسىندا كومەكتەسەدى دەپ ويلايمىن. توپتان شىعا الاتىن كۇشكە جانە قۇرامعا يە.
ەسەي جەڭىس ۇلى, سپورت ءجۋرناليسى
«سەلتيك» - «استانا» كەزدەسۋىن باستان-اياق كوردىم. ىشىمدە ءبىر وكىنىش قالدى. شىندىعىندا, سپورتتا ەش زاڭدىلىققا باعىنبايتىن, تەك سول كۇنى عانا بولاتىن وقيعالار بولىپ تۇرادى. «استانا» 0:5 ەسەبىمەن ۇتىلاتىنداي جامان ويناعان جوق. ەسەپتى تەڭەستىرەتىن, ءتىپتى بولماعاندا قىسقارتاتىن بىرنەشە مۇمكىندىگى بولدى. تۆۋماسي, پوستنيكوۆ, كابانانگالاردىڭ قاۋىپ توندىرگەن ساتتەرىندە ءبىر سوققى قاقپادان تابىلسا, ويىن مۇلدە باسقاشا اياقتالار ەدى. «سەلتيكتىڭ» تەپكەنى دە, تەپپەگەنى دە گولعا اينالدى. فۋتبولدا مۇنداي مىسال وتە كوپ. 2014 جىلعى الەم چەمپيوناتىنىڭ جارتىلاي فينالىندا اسا سورلى ەمەس برازيليا ءوز الاڭىندا ءبىرىنشى تايمدا گەرمانيادان 0:5 بولعانى ەسىمىزدە. ارينە, «استانانى» برازيليامەن سالىستىرعانىمىزعا كەلىسپەيتىندەر دە بولار, دەگەنمەن «استانا» كەشە سول جامباسىمەن تۇرىپ قالعانداي كۇي كەشتى. ايتپەسە وڭ قاپتالدان جاسالعان سوققىنىڭ ءبارى گولعا اينالاتىنى كىمنىڭ تۇسىنە كىرىپتى؟ سول سوققىلار اسا كۇشتى بولعان دا جوق قوي. ءتىپتى پوستنيكوۆ پەن شيتوۆ اياعىن قويماسا, مۇلدە قاڭعىپ بارا جاتقان دوپتار دا قاقپا تورىنەن تابىلدى.
ۇزاق ۋاقىت فۋتبول كورىپ, جازىپ, ەفيردەن جۇرگىزىپ كەلە جاتقان ادام رەتىندە «استانانىڭ» بۇل ساتسىزدىگىن سالقىنقاندى قابىلدادىم. «استانا» جىگەرسىز جەڭىلگەن جوق. ارينە, 0:5 دەگەن اۋىر ەسەپ, بىراق ول ەلىمىزدەگى جالعىز كوماندانىڭ ەۋروكۋبوكتاردىڭ توپتىق تۋرنيرىنە ءۇش جىل قاتارىنان شىققانىنىڭ جانىندا تۇككە تۇرمايدى. ەرتەڭ «استانا» ەۋروپا ليگاسىنىڭ توپتىق تۋرنيرىندە ۇلكەن ەرلىك جاساسىنشى, بۇگىن كوڭىلى قالعان جانكۇيەر قايتا ۋرالايدى. فۋتبول سونىسىمەن دە قىزىقتى. مەنى 0:5 ەسەبى ەمەس, قارىمتا كەزدەسۋدەگى قورعانىس جايى مازالاپ وتىر. انيچيچ جاراقاتىنان جازىلىپ ۇلگەرە مە, مالىيعا باپكەر سەنىم ارتا ما؟ لوگۆينەنكو ونسىز دا جوق. سوندا پوستنيكوۆ پەن شومكونى كەي ويىنداعىداي ورتاعا قايتا جىلجىتۋعا تۋرا كەلمەي مە؟ مىنە, ماسەلە وسى. «استاناعا» 5 گولدىڭ قارىمتاسىن قايتارۋ قيىن بولار. دەگەنمەن جاستىقتى الا جىعىلۋعا تىرىسۋ كەرەك.
نۇرعازى ساساەۆ, sportsffa.kz سايتىنىڭ قازاق ءتىلى ءبولىمى رەداكتورى:
– «استانانىڭ» گلازگودا «سەلتيكتەن» ويسىراي ۇتىلۋى زاڭدىلىق پا, جوق الدە كەزدەيسوق ناتيجە مە؟ وعان تەك «استانا» فۋتبولشىلارىنىڭ وزدەرى «جاۋاپ» بەرە الادى. سوزبەن ەمەس, ىسپەن, ياعني جاسىل الاڭداعى ويىن ورنەكتەرىمەن. 22 تامىز كۇنى وتەتىن قارىمتا ماتچتا ءىرى ەسەپپەن ۇتىپ, ەسە قايتارۋ كەرەك. 5:0 ەسەبىمەن ۇستەم تۇسپەسە دە, كەمى ءۇش دوپ ايىرماسىمەن ۇتسا, وندا قارىمىن قايتاردى دەپ, ەسەپتەۋگە بولار ەدى...
«سەلتيك» – وسىدان 130 جىلداي ۋاقىت بۇرىن (1887 جىلى 6 قاراشادا) قۇرىلعان شەجىرەسى مول كوماندا. ال «استانا» 2009 جىلى عانا قۇرىلدى. راس, سوڭعى ءۇش جىلدا چەمپيوندار ليگاسى مەن ەۋروپا ليگاسىنىڭ توپتىق كەزەڭىنە شىعىپ وتىر. ءوز جەرىمىزدەگى جاساندى الاڭدا ەۋروپانىڭ ازۋلى كلۋبتارىنان ۇتىلماي كەلەدى. جانكۇيەرلەر, ءتىپتى كلۋبتىڭ ءوزى دە وسى جەتىستىكتەرگە ماساتتانا باستاعانداي.
نەگىزى, العاشقى جەتىستىكتەرگە سونشا ەركىنسۋدىڭ قاجەتى جوق ەدى. ءبىز ءالى «سەلتيك» سەكىلدى شەجىرەسى مول كوماندالاردان ويسىراي ۇتىلعانىمىزعا قۋىستاناتىن دارەجەگە جەتكەن جوقپىز. كەرىسىنشە, اپتىعىمىزدى باسىپ, سابامىزعا ءتۇسىرىپ, تەرەڭ ويعا شومۋعا ءماجبۇر ەتكەنى دۇرىس بولعان دا سياقتى. ويتكەنى «استانا» جوعارىدا اتالعان تىرناقالدى جەتىستىكتەرىنە ستانيمير ستويلوۆتىڭ كاسىبي بىلىكتىلىگىنىڭ ارقاسىندا قول جەتكىزە باستاعان. الايدا تەك قانا جانكەشتىلىك پەن قايسارلىقتىڭ, تالپىنىس پەن ۇمتىلىستىڭ, سونداي-اق باپكەردىڭ تاكتيكالىق ايلا-تاسىلدەرىنىڭ ارقاسىندا تىم الىسقا بارا المايمىز. ول ءۇشىن جالپى قازاق فۋتبولىنىڭ دەڭگەيىن كوتەرۋ كەرەك.
«سەلتيكتى» وسىنداي دارەجەگە كوتەرگەن – «اتاجاۋى» «رەيندجەرس». ەندەشە, «استاناعا» دا «قايراتتىڭ» ەۋروپادا ويقاستاپ جۇرگەنى ءتيىمدى.
