بيىل اكادەمياعا وقۋعا قابىلداۋ بويىنشا قويىلاتىن تالاپتار قازىرگى زاماننىڭ قاجەتتىلىكتەرىنە قاراي ايتارلىقتاي جەتىلدىرىلگەنىن, جاڭا فورماتتا جۇزەگە اسىرىلىپ جاتقانىن اتاپ وتكەن ءجون. وقۋعا قابىلداۋدىڭ ءبىرىنشى كەزەڭى اعىلشىن ءتىلى بويىنشا ءبىلىم دەڭگەيى مەن موتيۆاتسيالىق جانە ماماندىق بويىنشا ەسسەلەر جازۋ ارقىلى وقۋعا تۇسۋگە ۇمىتكەردىڭ تالدامالىق جانە سىني ويلانا ءبىلۋ قاسيەتتەرىن كورسەتۋدى قامتىسا, ەكىنشى كەزەڭ سۇحباتتاسۋدان تۇرادى, ونىڭ بارىسىندا سيتۋاتسيالىق تاپسىرمالاردى (كەيستەردى) شەشۋ ارقىلى ۇمىتكەردىڭ كاسىبي, تالدامالىق, كوممۋنيكاتيۆتىك جانە تۇلعالىق قاسيەتتەرى باعالانادى.
جاڭا وقۋ جىلىنا قابىلداۋ ناۋقانىنىڭ تاعى ءبىر جاڭاشىلدىعى ۇمىتكەرلەردىڭ تىلدىك قۇزىرەتىن ناقتى انىقتاۋعا مۇمكىندىك بەرەتىن اعىلشىن ءتىلى بويىنشا حالىقارالىق APTIS تەستىن تاپسىرۋ بولدى. تىڭداۋشىلارعا ونى اكادەميا قابىرعاسىندا تاپسىرۋ مۇمكىندىگى بەرىلدى.
2017 جىلدىڭ 10 تامىزىندا جوعارىدا اتالىپ وتكەن ەكىنشى كەزەڭ بويىنشا, ياعني ماماندىقتار بويىنشا ەمتيحان كوميسسيالارى ءوز جۇمىسىن باستاپ كەتتى. اعىمداعى جىلدىڭ 15 تامىزىنا دەيىن جالعاساتىن كوميسسيا جۇمىسىنىڭ مىندەتىنە اكادەمياعا وقۋعا تۇسۋگە ۇمىتكەر تۇلعالاردىڭ قازىرگى زاماندا ءوز بويىندا بولۋى قاجەت بىلىك-داعدىلاردى, كاسىبي جانە تۇلعالىق قۇزىرەتتەر دەڭگەيىن باعالاۋ كىرەدى. اتالمىش ەمتيحان كوميسسيالارىنىڭ قۇرامىنا باعدارلامالاردىڭ باعىتتارىنا قاراي قازاقستان رەسپۋبليكاسى پرەزيدەنتى اكىمشىلىگىنىڭ, قازاقستان رەسپۋبليكاسى قاۋىپسىزدىك كەڭەسىنىڭ, استانا قالاسىنىڭ اكىمى – ءا. يسەكەشەۆ, بىرقاتار ورتالىق مەملەكەتتىك ورگانداردىڭ جاۋاپتى حاتشىلارى – د.ۆ. ۆاگاپوۆ, ا.ب. قاراشەۆ, ب.ق. تورتاەۆ, ب.ت. توكەجانوۆ, كوميتەت توراعالارىنىڭ ورىنباسارلارى – ا.ك. دارباەۆ, گ.م. كەرىمحانوۆا, سىرتقى ىستەر مينيسترلىگىنىڭ, وزگە دە ورتالىق مەملەكەتتىك ورگانداردىڭ, حالىقارالىق ۇيىمداردىڭ, ەلشىلىكتىڭ, كورپوراتيۆتىك سەكتوردىڭ, جەرگىلىكتى اتقارۋشى ورگاننىڭ, وتاندىق جانە شەتەلدىك ارىپتەس-جوعارى وقۋ ورىندارىنىڭ وكىلدەرى, استانا قالاسىنىڭ ءماسليحات حاتشىسى جانە ت.ب. كىرەدى.
ماماندىق بويىنشا ەمتيحان اكادەميانىڭ 10 باعدارلاماسى بويىنشا جۇرگىزىلەدى. مەملەكەتتىك قىزمەتتىڭ اعىمداعى قاجەتتىلىكتەرىن, پەرسپەكتيۆالارى مەن وزىق حالىقارالىق تاجىريبەنى ەسكەرە وتىرىپ جاڭارتىلعان ءبىلىم بەرۋ باعدارلامالارى وسى ەكىنشى كەزەڭنەن ءساتتى وتكەن تۇلعالارعا ەلىمىزدەگى مەملەكەتتىك قىزمەت جانە مەملەكەتتىك باسقارۋ سالاسىنداعى جالعىز وقۋ ورداسىندا ءبىلىم الۋعا مۇمكىندىك بەرەدى.
