ماكسيم گوركي اتىنداعى مەملەكەتتىك اكادەميالىق ورىس دراما تەاترىنداعى شاراعا قىزىلوردا وبلىسىنىڭ اكىمى قىرىمبەك كوشەرباەۆ, قر پارلامەنتى ءماجىلىسىنىڭ دەپۋتاتتارى, زيالى قاۋىم وكىلدەرى جانە ونەر يەلەرى قاتىستى.
سىر ەلىنىڭ تاريحى مەن تانىم-تاعىلىمىن سيپاتتايتىن بارشا تۇركى الەمىنىڭ ابىزى قورقىتتىڭ ءومىرىن ءسوز ونەرىنىڭ اسىل قۇدىرەتىمەن جەتكىزگەن قويىلىمنىڭ اۆتورى, جەرلەسىمىز, اقىن, دراماتۋرگ - يران-عايىپ بيىل 70 جاسقا تولىپ وتىر. وسىعان وراي قىزىلوردا وبلىسىنىڭ اكىمى قىرىمبەك كوشەرباەۆ مەرەيتوي يەسىن قۋانىشىمەن قۇتتىقتاپ, ىزگى تىلەگىن ءبىلدىردى.
«بايقوڭىردىڭ جانىندا جانكەنتتە قورقىت بابامىز دۇنيەگە كەلگەن. بۇكىل تۇركى الەمىنىڭ ابىزى ساسقانعا سايا, اسقانعا توسقان, ەلدىڭ يەسى, جەردىڭ كيەسى بولعان قورقىت بابامىز ءالى دە ءتىرى. ويتكەنى قوبىزدىڭ سارىنى ويناپ تۇر. قورقىت اتا كەشەنىن ەلباسى تاپسىرماسىمەن قايتادان جانداندىردىق. ماڭگى ەل دەگەن ۇعىمنىڭ ءبىر تارماعى – سول قورقىت بابانىڭ كەشەنىنە بارعان كەزدە, قوبىزدىڭ سارىنىن ەستىگەن كەزدە كوزىڭىز جەتەدى. رۋحاني جاڭعىرۋ جولىندا ءوزىنىڭ ەرەكشە ۇلەسىن قوسىپ جۇرگەن اقىن, دراماتۋرگ يران عايىپ اعامىز 70 جاسقا تولىپ وتىر. مەرەيتويىڭىز قۇتتى بولسىن!» دەگەن قىزىلوردا وبلىسىنىڭ اكىمى قىرىمبەك كوشەرباەۆ تەاتر ۇجىمىنا سپەكتاكلدى ءتيىستى دەڭگەيدە ورىنداپ شىققاندارى ءۇشىن العىس ءبىلدىردى.
سپەكتاكلدىڭ رەجيسسەرى-قازاقستاننىڭ ەڭبەك سىڭىرگەن قايراتكەرى ءامىر-تەمىر حۇسەين, سۋرەتشىسى – قازاقستاننىڭ ەڭبەك سىڭىرگەن قىزمەتكەرى سەرىك ءپىرماحان.
ءدال وسى كۇنى «سىر شەجىرەسى» اتتى قولونەر شەبەرلەرىنىڭ جانە وبلىستىڭ تاريحى مەن مادەنيەتىنە ارنالعان كورمە اشىلدى.
ەستەرىڭىزگە سالا كەتەيىك, استانادا «ەكسپو-2017» حالىقارالىق مامانداندىرىلعان كورمەسى اياسىندا 10-14 تامىز كۇندەرى قىزىلوردا وبلىسىنىڭ مادەني كۇندەرى وتۋدە.
