– تەلەحيكايانىڭ حالىقتى باۋراپ الۋىنىڭ باستى سەبەبى دە وسى, – دەيدى ءارتىس نۋرەتتين سونمەز كوپشىلىكپەن جۇزدەسۋ كەزىندە. − راسىندا, كوشپەندى ءومىردىڭ سۋرەتتەلۋى, كوشپەلى مادەنيەت دەكوراتسياسىنىڭ قانىق بوياۋمەن بەرىلۋى, ءتىپتى كەيبىر كادرلاردان, كيىز ءۇي مەن توسەنىش تەكەمەتتەرىنەن قازاقى قوشقار ءمۇيىز ويۋلاردى بايقايسىز.
تەلەحيكايانىڭ رەجيسسەرى مەحمەت بوزدوگتىڭ ايتۋىنا قاراعاندا, فيلم وسمان يمپەرياسىنىڭ قۇرىلار ءداۋىرىن باياندايدى. تۋىندىنى مەنشىك يەسى رەتىندە وندىرىسكە شىعارعان كەمال تەكدەننىڭ «Tekden Film» ستۋدياسى. سەريال كورەرمەنگە ءبىر دەمدە ۇنادى. ءتىپتى ءتۇسىرىلىم الاڭىنا پرەزيدەنت رەجەپ تايپ ەردوعاننىڭ ءوزى كەلىپ, ساتتىلىك تىلەگەن.
«كينونىڭ باس كەيىپكەرى ەرتۇعىرىل وعىز تايپاسىنىڭ بوزوق قاناتىنان تارايتىن قايى رۋىنىڭ كوسەمى. اتاقتى وسمانلى يمپەرياسىنىڭ نەگىزىن قالاۋشى وسماننىڭ اكەسى. يمپەريانى 623 جىل بيلەگەن اۋلەت وسى كىسىنىڭ ۇرپاقتارى. سوندىقتان دا عالامعا التى عاسىردان استام ۇستەمدىك جۇرگىزگەن بابالارىمىزدىڭ باتىرلىق تاريحىن سومداۋعا كىرىستىك», دەيدى ەكىنشى قوناق جەنگيز جوشكۋن مىرزا.
كەزدەسۋدىڭ رەسمي بولىگى اياقتالعان سوڭ ارتىستەر نۋرەتتين سونمەز بەن جەنگيز جوشكۋن كورەرمەندەر تاراپىنان قويىلعان سۇراقتارعا جاۋاپ بەردى. اۋەلى وزدەرىنىڭ قازاق جۇرتى مەن توپىراعىنا قاۋىشقان ءساتىن باقىتقا بالايتىنىن ايتا وتىرىپ, بۇل تۋىندى تەك تۇرىكتىڭ عانا ەمەس, كۇللى تۇركى جۇرتىنىڭ تاريحى, ءبىز بەن ءسىزدىڭ ەرلىك داۋىرىندەگى ورتاق رۋحىمىز توعىسىپ جاتقان دۇنيە دەگەندى جەتكىزدى.
«تەلەحيكايانىڭ ءتۇسىرىلۋ جۇمىستارى قالاي ءجۇرىپ جاتىر؟» دەگەن كورەرمەن سۇراعىنا: «قازىر ءفيلمنىڭ 4-ءشى ماۋسىم جۇمىستارى ءجۇرىپ جاتىر. وكىنىشكە قاراي, ءالى دە ماشاقاتتار بارشىلىق. ءمىنىس اتتارى جاراماي قالۋى, وزدەرىڭىز كينودان كورگەندەي كيىز ۇيلەردىڭ جەل-قۇزعا توتەپ بەرۋى سياقتى اعىمداعى شارۋالاردان باستاپ قيىندىقتار كوپ. بىراق ءبىز مۇنىڭ ءبارىن ەڭسەرەمىز», دەدى مارتەبەلى قوناق.
بەكەن قايرات ۇلى,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
