ايدىن يەلەرى العاشقى بولىپ گول جىبەرىپ الدى. قوناقتاردىڭ شابۋىلشىسى دميتري جۋكەنوۆ ماتچتىڭ 23 سەكۋندىندا قاقپاشىمىزدى قاپى قالدىرىپ, ەسەپ اشتى. دەگەنمەن, جىلدام سوعىلعان گول «بارىستى» ەسەڭگىرەتە المادى. ارادا نەبارى التى مينۋت وتكەندە ەلوردالىق حوككەيشىلەر ەكى بىردەي شايبا سالىپ, العا شىقتى. كوماندا قۇرامىنا جاڭادان قوسىلعان ويىنشىلار ليندەن ۆەي مەن دميتري شەۆچەنكو مەرگەندىكتەرىمەن كوزگە تۇسكەن ەدى.
ەكىنشى تايم باستالا سالىسىمەن «بارىستىڭ» شابۋىلشىسى كەۆين داللمان ومبىلىق كلۋبتىڭ قاقپاسىنان ساڭىلاۋ تاۋىپ, ەسەپتى 3:1-گە جەتكىزدى. بۇل ناتيجە ەكىنشى تايمنىڭ ورتا تۇسىنا دەيىن وزگەرمەي تۇرعان. بىراق, ءۇستى-ۇستىنە شابۋىلداعان قوناقتار اقىرى دەگەنىنە جەتتى. كەزدەسۋدىڭ 28-مينۋتىندا نيكيتا ليسوۆ ءبىزدىڭ قاقپاشى حەنريك كارللسون قورعاعان قاقپانىڭ قۇلپىن بۇزدى.
ويىننىڭ سوڭعى بولىگىندە «بارىس» ساپىنداعى لەگيونەر نايدجەل دوۋس ءتورتىنشى شايبانى سوعىپ, كوماندانىڭ باسىمدىعىن نىعايتىپ بەرگەن ەدى. ال ماتچتىڭ اياقتالۋىنا از عانا ۋاقىت قالعاندا قازاقستان حوككەي مەكتەبىنىڭ تۇلەگى, قازىرگى ۋاقىتتا «اۆانگاردتىڭ» ساپىندا ونەر كورسەتىپ جۇرگەن سەمەن كوشەلەۆ ەسەپتەگى ايىرماشىلىقتى قىسقارتىپ كەتتى. دەگەنمەن, بۇل شايبا ماتچتا سوعىلعان سوڭعى گول ەدى. ءسويتىپ, «بارىس» 4:3 ەسەبىمەن باسىم ءتۇسىپ, وسى تۋرنيردەگى ەكىنشى جەڭىسىنە قول جەتكىزدى.
سونداي-اق, بۇل تۋردا شۆەيتساريانىڭ «داۆوس» كومانداسى «ادميرالدى» (ۆلاديۆوستوك) 4:0 ەسەبىمەن تىزە بۇكتىردى. كەشە كەشكىسىن مۇز ۇستىندە «اۆانگارد» - «نەفتەحيميك» جانە «داۆوس» - «تراكتور» كوماندالارى ءوزارا جۇپ قۇراپ, تارتىسقا ءتۇستى.
ال «بارىس» حوككەيشىلەرى بۇگىن تۋرنيردەگى كەزەكتى ويىنىن چەليابينسكىنىڭ «تراكتورىمەن» وتكىزەدى.
قايرات جۇنىس ۇلى,
«ەگەمەن قازاقستان»
