الاتاۋ اۋدانىندا ورنالاسقان №14 قالالىق ەمحانا − باستاپقى مەديتسينالىق-سانيتاريالىق كومەك كورسەتەتىن دەربەس ۇيىم. ول 35 مىڭعا جۋىق تىركەلگەن جاندارعا مەديتسينالىق كومەك كورسەتەتىن اۋقىمدى ەمدەۋ ورتالىعى بولىپ تابىلادى.
سەرىك سەيدۋمانوۆ مەملەكەتتىك جانە ۇكىمەتتىك باعدارلامالارعا, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا قاتىستى سۇراقتارعا جاۋاپ بەرىپ, جۇيەلى رەفورمالاردى جالعاستىرۋدىڭ ماڭىزدىلىعى جونىندە ايتىپ ءوتتى.
دەنساۋلىق ساقتاۋ سالاسىنىڭ قىزمەتكەرلەرى مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ جانە الاتاۋ اۋدانىن قوعامدىق كولىكپەن قامتاماسىز ەتۋ جونىندە سۇراقتار قويدى. سونىمەن قاتار, دارىگەرلەر مەديتسينا سالاسى بويىنشا جوعارى وقۋ ورىندارىن بىتىرگەن تۇلەكتەردىڭ ءوز ەڭبەك جولىن باستاپقى مەديتسينالىق سانيتاريالىق كومەك كورسەتۋ جۇيەسىنەن باستاۋىن ۇسىندى.
– «100 ناقتى قادام» ۇلت جوسپارىن ءبىزدىڭ ەلىمىزدى جانە ونىڭ بارلىق سالاسىن رەفورمالاۋ ماقساتىندا ناقتى ارەكەت ەتۋگە ىقپال ەتەتىن قۇجات دەپ ايتا الامىن. مۇندا مەديتسينانىڭ الار ورنى ەرەكشە. ۇلت جوسپارى بويىنشا مىندەتتى الەۋمەتتىك مەديتسينالىق ساقتاندىرۋ قابىلدانعان زاڭدار شەڭبەرىندە 2018 جىلدىڭ 1 قاڭتارىنان باستاپ ءوز كۇشىنە ەنەدى. الاتاۋ اۋدانىنداعى №14 ەمحانادا كەزدەسۋ ۇيىمداستىرۋىما دا ناقتى سەبەپ وسى بولىپ وتىر. باستى ماقسات وسى جۇيەنىڭ ءىس بارىسىندا قالاي جۇمىس ىستەيتىنىن كورۋ, – دەدى سەرىك سەيدۋمانوۆ.
ءماجىلىس دەپۋتاتى الماتى قالاسىنا ساپارى بارىسىندا سونداي-اق, قالالىق اۋەجايدا, «كازفەرروستال» كاسىپورنىندا بولىپ, مەملەكەتتىك ورگاندار جانە قوعامدىق كەڭەس وكىلدەرىمەن كەزدەسۋلەر وتكىزەدى.
باعاشار تۇرسىنباي ۇلى,
«ەگەمەن قازاقستان»
الماتى
