كوپتىڭ كوڭىلىن تەربەگەن كەش قىزىقتىلىعىمەن ەرەكشەلەنەر ەدى. ونىڭ ءون بويىندا اباي قۇنانباەۆ شىعارمالارىن ناسيحاتتاۋ ارقىلى مەملەكەتتىك ءتىلدىڭ مارتەبەسىن كوتەرۋ, قازاق مادەنيەتى, ادەبيەتىنە دەگەن وزگە ۇلت وكىلدەرىنىڭ ىقىلاسىن ارتتىرۋ, قازاقستاندىق رۋحاني بىرلىكتى قۋاتتاۋ تۇردى.
اعىمداعى جىلدىڭ تامىز ايىنىڭ ءبىرىنشى جۇلدىزىندا ىرىكتەۋ كەزەڭىنە 25 ۇمىتكەر قاتىسىپ, 12 ونەرپاز قورىتىندى كەزەڭگە جولداما العان بولاتىن. ۇلى اقىننىڭ تۋعان كۇنىندە وتەتىن الماتى قالالىق «اباي وقۋلارى» فەستيۆالىنە ۇمىتكەرلەر 3 جولدامانى جەڭىپ الدى. بايگە قورىتىندىسى بويىنشا ءتورت ءتىلدى ەركىن مەڭگەرگەن, ەكسترەمال سپورت ءتۇرى − تاۋعا ورمەلەۋدەن قازاقستان رەسپۋبليكاسىنىڭ چەمپيونى, لوندوننىڭ رەددينگ ۋنيۆەرسيتەتىنىڭ تۇلەگى سەيتجان كەنجەعۇل جەڭىمپاز اتاندى. ول يران-عايىپتىڭ «مەن ىشپەگەن ۋ بار ما؟» اتتى پەساسىنان ءۇزىندى ورىندادى. ەكىنشى ورىنعا ابايدىڭ «كوكتەم» اتتى ولەڭىن وقىعان ورىس ۇلتىنىڭ وكىلى گالينا حمىروۆا كوتەرىلدى.
ءۇشىنشى ورىندى ۇيعىر قىزى زارينا ابدراحمانوۆا يەلەندى. ساۋلە سماعۇلوۆا مەن تويگۇل رادجاپوۆا «كورەرمەندەر كوزايىمى» ديپلومىن جەڭىپ الدى, اباي قۇنانباەۆقا ارناپ جازعان اۆتورلىق تۋىندىسىن وقىعان جامبىل وبلىسى, جامبىل اۋداندىق «اينالايىن» قوعامدىق ۇيىمىنىڭ مۇشەسى قولقانات وڭعارباەۆاعا كىتاپحانا ديرەكتورى ۇيالى تەلەفون سىيلادى. كىتاپحانا قىزمەتكەرى قاپيزا ايشۋاقوۆا ابايدىڭ 37- قارا ءسوزىن وقىپ, 10 000 تەڭگە كولەمىندەگى سەرتيفيكاتقا يە بولدى. قالعان قاتىسۋشىلاردىڭ بارلىعى «اباي وقۋلارى» اتتى زاعيپ جاندار اراسىندا وتكىزىلگەن قالالىق فەستيۆالدە جوعارى شىعارماشىلىق جەتىستىكتەر كورسەتكەنى ءۇشىن ديپلومدارمەن ماراپاتتالىپ, شاعىن سىيلىقتار تابىس ەتىلدى.
ونىمەن قاتار وسى شارا اياسىندا «اباي ايناسى» اتتى كىتاپ كورمەسى ۇيىمداستىرىلدى.
ساپارباي پارمانقۇل,
«ەگەمەن قازاقستان»
الماتى
