ەلباسى نۇرسۇلتان نازارباەۆ قازاقستان حالقىنا ارنالعان «نۇرلى جول – بولاشاققا باستار جول» اتتى جولداۋىندا جول – ەكونوميكالىق دامۋدىڭ كۇرەتامىرى ەكەندىگىن تاعى دا ەسكە سالعان ەدى. «ەلدىڭ وركەنىن بىلگىڭ كەلسە, جولىنا قارا» دەگەن قاعيدا قالىپتاسقان. بارىس-كەلىس پەن الىس-بەرىستە جول قاتىناسى ايرىقشا ماڭىزعا يە. كونە زامانداردا ءىرى قالالارىمىزدىڭ كوبى ۇلى جىبەك جولىن جاعالاي قونىس تەپكەن» دەي كەلىپ, بۇگىنگى باسەكەگە قۇرىلعان نارىق زامانىندا دا جولدىڭ ماڭىزى ەرەكشە ەكەندىگىن, «جول − شىن مانىندە ءومىردىڭ وزەگى, باقۋاتتى تىرلىكتىڭ قاينار كوزى. بارلىق ايماقتار تەمىر جولمەن, تاس جولمەن, اۋە جولىمەن ءوزارا تىعىز بايلانىسۋى كەرەكتىگىن», ايتادى. سوندىقتان ەلباسى جولداردىڭ ساپاسىن كوتەرۋدى, ونىڭ بويىنداعى لوگيستيكالىق قىزمەتتەردى دامىتۋدى ۇنەمى تاپسىرىپ وتىرادى. قوستانايدا وتكەن سەميناردا جول ساپاسىن كوتەرۋگە ارنالدى. ينۆەستيتسيالىق جوبانى دايىنداۋ جۇمىستارىنا قاتىسىپ وتىرعان قازاقستان جول عىلىمي-زەرتتەۋ ينستيتۋتى رەسپۋبليكالىق ماڭىزى بار جولداردى جوندەۋ مەن كۇتىپ ۇستاۋدىڭ وزىق ادىستەرىن وندىرىسكە ەنگىزۋدى ۇسىندى.
– رەسپۋبليكالىق ماڭىزى بار جولداردى كۇتىپ-باپتاۋدىڭ ءبىز ۇسىنىپ وتىرعان ادىستەمەسى اقش-تا, ەۋروپانىڭ بىرقاتار دامىعان ەلدەرىندە پايدالانىلادى. وسى ادىستەمەنى پايدالاناتىن جوبا جۇزەگە اسىرىلعاندا جولدىڭ كۇتىمىنە بولىنەتىن قارجى 22 پايىزعا دەيىن ۇنەمدەلەدى. وزىق تاجىريبەنى الدىمەن قوستاناي وبلىسىنداعى رەسپۋبليكالىق ماڭىزى بار جولداردى جوندەۋ, كۇتۋ جۇمىستارىنا ەنگىزەمىز, – دەيدى «قازاقستان جول عىلىمي-زەرتتەۋ ينستيتۋتى» اق ۆيتسە-پرەزيدەنتى ەربول ايتباەۆ.
ۇسىنىپ وتىرعان ادىستەمەسىن جاساۋ ءۇشىن عىلىمي-زەرتتەۋ ينستيتۋتىنىڭ جول سىناۋ جانە جىلجىمالى جول دياگنوستيكالاۋ زەرتحانالارى قوستاناي وبلىسىنداعى 1409 شاقىرىمعا سوزىلاتىن رەسپۋبليكالىق ماڭىزى بار جولداردى تەگىس ءجۇرىپ ءوتىپ, قاجەتتى مالىمەتتەردىڭ بارلىعىن جينادى. زەرتحانالارداعى زاماناۋي قۇرالدار ارقىلى جولداردىڭ قوزعالىس قارقىندىلىعى ەسەپكە الىنادى, كوپىرلەر مەن سۋ وتكىزۋ قۇبىرلارىن ينۆەنتاريزاتسيالاۋ جانە دياگنوستيكالاۋ, اۆتوموبيل جولدارىن پاسپورتتاۋ جۇزەگە اسىرىلادى, جول اقاۋلارى تۋرالى مالىمەتتەر جينالىپ, وڭدەلەدى, جول جامىل-
عىسىنىڭ سەرپىندىلىك ءمودۋلى, جامىلعىنىڭ ءىلىنىسۋ قاسيەتى, جالپى تاس جولداردىڭ بۇگىنگى جاعدايى بۇگە-شىگەسىنە دەيىن انىقتالادى. سەميناردا مەردىگەر كومپانيالار وكىلدەرىنە قاناتقاقتى جوبانىڭ وسىنداي جۇمىستارى تانىستىرىلىپ, ءتۇسىندىرىلدى, مۇددەلى جاق تاراپتارى تالقىلادى.
قازاقستان جول عىلىمي-زەرتتەۋ ينستيتۋتى بۇگىندە جولداردىڭ جاعدايىنا قاتىستى جىلجىمالى كەشەندى زەرتحانا جيناعان قاجەتتى مالىمەتتەردىڭ بارلىعىن وڭدەپ, جوندەۋ, كۇتۋ جۇمىستارىنىڭ سمەتالىق قۇنىن دايىنداۋ ۇستىندە. جوبا بويىنشا رەسپۋبليكالىق ماڭىزدى جول كولەمىنىڭ 700 شاقىرىمىن تەندەر ارقىلى الاتىن مەردىگەر كومپانيالار كەلەسى جىلدىڭ باسىنان باستاپ, جوندەۋگە, كۇتۋ جۇمىستارىن جۇرگىزۋگە كىرىسەدى.
– «اۆتوموبيل جولدارىن كۇتىپ-باپتاۋ تۇراقتىلىعى» جوباسى سەگىز جىلعا ارنالعان. جوبا بويىنشا مەردىگەر كومپانيالار ءۇش جىل جولدى جوندەپ, قالعان بەس جىلدا ونىڭ كۇتىمىن جۇزەگە اسىرادى. بۇل جوبا جولدىڭ ساپالى جاسالۋىنا دا, كۇتىمىنە دە, سونىمەن قاتار مەردىگەر كومپانيالاردىڭ الاڭسىز جۇمىس ىستەۋىنە دە ءتيىمدى بولادى, – دەيدى «قازاۆتوجول» اق قوستاناي وبلىستىق فيليالى ديرەكتورىنىڭ ورىنباسارى نۇربەك تەمىرحانوۆ.
«قازجولعزي» اق قىزمەتكەرلەرى سەمينارعا قاتىسۋشىلارعا جىلجىمالى جول زەرتحانالارى مەن قۇرىلعىلاردىڭ جۇمىسىن كورسەتىپ, تانىستىردى.
ءنازيرا جارىمبەت,
«ەگەمەن قازاقستان»
قوستاناي
