باسقوسۋعا استانا قالاسى اكىمىنىڭ ورىنباسارلارى ەرمەك امانشاەۆ پەن ماليكا بەكتۇروۆا, جاستار ساياساتى ماسەلەلەرى جونىندەگى باسقارما باسشىسى اسحات ورالوۆ, ۋنيۆەرسيتەت رەكتورى اپپاراتىنىڭ جەتەكشىسى دۋمان ايتماعامبەتوۆ, ەكسپو-2017 ەرىكتىلەر شتابىنىڭ جەتەكشىسى البينا جۇماشەۆا جانە ەرىكتىلەر قاتىستى.
«ەرىكتىلەردىڭ شىلدە ايىنداعى جۇمىسى ماڭىزدى ءارى قىزىقتى ءوتتى. وسى ايدا ءبىزدىڭ 510 مۇشەمىز استاناداعى 96 نىساندا 9 مىڭ شەتەلدىككە جانە 250-دەن استام دەلەگاتسياعا قىزمەت كورسەتتى», دەگەن قالالىق شتاب جۇمىسىن ۇيلەستىرۋشى تاسقالي تاير ەرىكتىلەردىڭ اتقارعان جۇمىستارىنا ارنالعان بەينەتاسپانى كوپشىلىكتىڭ نازارىنا ۇسىندى.
ەكسپو-2017 حالىقارالىق كورمەسىنە كەلۋشىلەرگە قىزمەت كورسەتۋگە اتسالىسقان ەرىكتىلەر مەن سۋپەرۆايزەرلەردى استانا قالاسى اكىمدىگى مەن ولار ەڭبەك ەتىپ جۇرگەن نىسانداردىڭ وكىلدەرى ماراپاتتاپ, العىستارىن ءبىلدىردى. «نۇرلى جول» نىسانىنىڭ ەرىكتىلەرى «ايدىڭ ەڭ ۇزدىك كومانداسى» دەپ تانىلسا, «تۇران» ۋنيۆەرسيتەتىنىڭ ستۋدەنتى راۋان ساعىندىقوۆ «ۇزدىك ەرىكتى» اتانىپ, سۋ جاڭا ۆەلوسيپەدكە يە بولدى. ول شتاب تۋىن ءۇشىنشى ماۋسىمنىڭ ەرىكتىلەرىنە سالتاناتتى تۇردە تابىس ەتتى. «ۇزدىك سۋپەرۆايزەر» اتانعان ەۇۋ ستۋدەنتى قۇماربەك ازات ارنايى كۋبوك پەن قۇرمەت گراموتاسىن ەنشىلەدى.
ءجۇنىس ومار,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قىزمەتكەرى
