سالتاناتتى شارانىڭ رەسمي بولىمىندە قازاقستاننىڭ ۇلتتىق ەكونوميكا ءمينيسترى تيمۋر سۇلەيمەنوۆ قازاق-تۇرىك دوستاستىعىنىڭ جەتىستىكتەرىن اڭگىمەلەپ, تۇركيالىقتارعا حالىقارالىق شارانىڭ استانادا وتۋىنە قولداۋ بىلدىرگەندەرى ءۇشىن العىسىن ءبىلدىردى.
باسقوسۋدا تۇركيا رەسپۋبليكاسىنىڭ ەكونوميكا ءمينيسترى نيحات زەيبەكدجي ءسوز سويلەپ, ەكى ەل اراسىنداعى ىنتىماقتاستىق پەن باۋىرلاستىقتىڭ بۇگىنگى تاڭدا ۇلكەن ساياسي ءارى ەكونوميكالىق قارىم-قاتىناسقا اينالعانىن تىلگە تيەك ەتتى.
ۇلتتىق كۇننىڭ ءسانىن كەلتىرگەن «مەحتەران» تۇرىك اسكەري وركەسترىنىڭ شەرۋى ەكسپو قوناقتارىنىڭ ەسىندە ۇزاق ساقتالارى ءسوزسىز. سونىمەن قاتار, كورەرمەندەرگە مىڭداعان گۇل شوقتارى مەن تۇركيا جالاۋشالارى بەرىلىپ, پاۆيلون تاماشالاۋشىلارعا ۇلتتىق تاعامدار ۇسىنىلدى.
تۇركيا پاۆيلونى ەكى ايدا 400 مىڭنان اسا كورەرمەن قابىلداپ ۇلگەرگەن.
الپىس مىڭعا جۋىق جەتكىنشەك استانانى كوردى
ورتالىق كوممۋنيكاتسيالار قىزمەتىندە ءباسپاسوز ءماسليحاتى ءوتىپ, استانا قالالىق ءبىلىم باسقارماسى كامەلەتكە تولماعانداردىڭ قۇقىقتارىن قورعاۋ ءبولىمىنىڭ باسشىسى ءلاززات ورىنباساروۆا جۋرناليستەردىڭ ساۋالدارىنا جاۋاپ بەردى.
ول ەكسپو-2017 كورمەسىنە قازاقستاننىڭ وڭىرلەرىنەن 80 مىڭعا جۋىق وقۋشى كەلەتىنىن مالىمدەدى. بۇگىنگە دەيىن 57 913 جەتكىنشەك ەلورداعا تابان تىرەپ, حالىقارالىق شارانى تاماشالاپ ۇلگەرگەن.
«ەندى كورمە اياقتالعانعا دەيىن 15-20 مىڭ وقۋشى كەلەدى دەپ كۇتىلۋدە. ءبىلىم باسقارماسى بالالاردى قارسى الۋ, ۇيلەرىنە شىعارىپ سالۋ, ەكى كۇندىك ىستىق تاماقپەن, جاتاقحانامەن قامتاماسىز ەتۋ شارالارىن قامتىپ وتىر», دەگەن ل.ورىنباساروۆا كورمە باستالعالى بالالارعا قاتىستى ەشقانداي توتەنشە جاعداي ورىن الماعانىن مالىمدەدى. ايماقتاردان كەلگەن بالالار ءۇشىن استانادا ەكى كۇندىك باعدارلاما قاراستىرىلعان. وقۋشىلار ءبىرىنشى كۇنىن ەكسپو كورمەسىمەن تانىسۋعا ارناسا, ەكىنشى كۇنىندە ەلوردانىڭ اسەم جەرلەرىن ارالايدى.
قازاقستان-بەلارۋس بيزنەسىنىڭ بەلەسى
بەلارۋس – وزەندەر مەن كولدەرگە باي ءداستۇرلى مەملەكەت. وندا سۋ ەلەكتر ستانسالارىن سالۋ بويىنشا ارنايى باعدارلاما دا ازىرلەنگەن. ورتاشا ەسەپپەن ەكى جىلدا ءبىر سۋ ەلەكتر ستانساسى پايدالانۋعا بەرىلەدى. رەسپۋبليكادا جاڭعىرمالى ەنەرگيانىڭ وزگە دە تۇرلەرىن زەرتتەۋ جانە ەنگىزۋ جۇمىستارى جۇرگىزىلۋدە, سۇيىق جانە كوگىلدىر وتىن شىعارىلادى. مەملەكەتتىڭ جەل رەسۋرستارى دا جەتكىلىكتى, سولتۇستىك-باتىس ايماقتارىندا جەل ەنەرگياسىن وندىرەتىن باعاندار ورناتىلعان.
بۇل مالىمەتتەردى بەلارۋس رەسپۋبليكاسىنىڭ ۇلتتىق كۇنىنە وراي ۇيىمداستىرىلعان ءباسپاسوز ءماسليحاتىندا وسى ەلدىڭ قازاقستانداعى توتەنشە جانە وكىلەتتى ەلشىسى اناتولي نيچكاسوۆ جەتكىزدى. وندا جەك دامىتۋدان باسقا اتوم ەلەكترستانساسىن قۇرۋ جوباسى جۇزەگە اسىرىلۋدا. 2020 جىلعا قاراي بۇل تولىق رەجىمدە جۇمىس ىستەمەك. اەس قۇرىلىسى ماگاتە-ءنىڭ تالاپتارى مەن ەرەجەلەرىنە ساي جۇرگىزىلۋدە. «اتوم ەلەكتر ستانساسىنىڭ قۇرىلىسى بارىسىندا ەڭ سوڭعى ۇلگىدەگى رەاكتور پايدالانىلۋدا, ونىڭ ءۇش دەڭگەيلى قاۋىپسىزدىك جۇيەسى بار», دەدى ول.
ەلشى ەكى ەل اراسىنداعى ىنتىماقتاستىققا شيرەك عاسىر تولعانىن اڭگىمەلەپ, ساياسي ديالوگ تىعىز ساۋدا-ەكونوميكالىق بايلانىسقا ۇلاسقانىن ايتتى. ء«بىزدىڭ كاسىپكەرلەر بايلانىستى كەڭەيتىپ, بىرلەسكەن كاسىپورىندار قۇردى. بۇگىنگى تاڭدا قازاقستاندا بەلارۋسپەن بىرلەسكەن 15 كاسىپورىن بار. ولاردىڭ كوپشىلىگى اۋىل شارۋاشىلىعى, ماشينا جاساۋ سالالارىندا جۇمىس ىستەۋدە. 25 جىلدا ەكى ەل اراسىنداعى ساۋدا اينالىمى 10 ەسەگە ارتقان. كەدەن وداعى, ەۋرازەق سىندى جاڭا ينستيتۋتتار قۇرىلدى. مۇنىڭ بارلىعى اسا ماڭىزدى مانگە يە», دەدى اناتولي نيچكاسوۆ.
13-15 تامىز كۇندەرى ەلوردادا بەلارۋس وندىرۋشىلەرىنىڭ «Made in Belarus. Astana» كورمەسى وتپەك. «بۇل شارا سوڭعى جىلدارى ۇيىمداستىرىلعان كورمەلەردىڭ ىشىندەگى ەڭ اۋقىمدىسى بولماق. وندا ماشينا قۇراستىرۋ, مۇناي-حيميا, كولىك جانە لوگيستيكا, اۋىل شارۋاشىلىعى جانە ازىق-ت ۇلىك ونىمدەرى, اعاش وڭدەۋ جانە جەڭىل ونەركاسىپ, كوسمەتيكا جانە وزگە دە تۇتىنۋ تاۋارلارى بويىنشا 70-تەن استام بەلارۋستىك كاسىپورىن ونىمدەرى مەن جاڭا دۇنيەلەرىن كورسەتەدى.
بۇل كورمە قازاقستاندىق-بەلارۋستىك بيزنەستىڭ دامۋىنا ارنالعان ىڭعايلى ءارى ءتيىمدى پلاتفورماعا اينالارى ءسوزسىز», دەدى باسقوسۋدا بەلارۋس ساۋدا-ونەركاسىپتىك پالاتاسى «بەلينتەرەكسپو» ۋنيتارلى كورمە كاسىپورنىنىڭ ديرەكتورى ەۆگەني ۆۆەدەنسكي. ونىڭ ايتۋىنشا, رەسپۋبليكانىڭ ءوندىرىس الىپتارى قازاقستانعا بىرقاتار قىزىقتى زاماناۋي ونىمدەر اكەلمەك. ماسەلەن, «گومسەلماش» اق بەلارۋس پەن قازاقستان بىرلەسىپ ازىرلەگەن «Essil كزس-760» استىق جيناۋ كومباينىن ۇسىنادى. بۇل تەحنيكا ىلعالدىلىعى جوعارى داندەردى دە ءتيىمدى جيناي الادى. مينسك اۆتوكولىك زاۋىتى ەكولوگيالىق ەۋرو-4 دەڭگەيلى قوزعالتقىشى بار تولىق جەتەكتى تارتقىش كولىك پەن «ماز-103» اۆتوبۋسىن تانىستىرادى. مينسك تراكتور زاۋىتى ناۆيگاتسيالىق جۇيەلەرمەن جابدىقتالعان مول قۋاتتى «Belarus-3522», «Belarus-4522» تراكتورلارىن اكەلەدى. «بەلترانسنەت» ءبىلىم بەرۋ ورتالىعى بولاشاق كولىگى اتانعان «Sky Way» جاڭا ەستاكادالىق كولىگىن ۇسىنادى ەكەن.
13 تامىز كۇنى ەكسپو-2017 حالىقارالىق مامانداندىرىلعان كورمەسىندەگى بەلارۋس رەسپۋبليكاسىنىڭ ۇلتتىق كۇنى وتەدى. مەملەكەتتىڭ پرەمەر-ءمينيسترى اندرەي كوبياكوۆ باستاعان دەلەگاتسيا قاتىساتىن شارا قازاقستان-بەلارۋس بيزنەس-فورۋمىمەن جالعاسادى.
توپتامانى ازىرلەگەن:
اسحات رايقۇل,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
