ءارى قاراي وبلىس اكىمى بەردىبەك ساپارباەۆ ءبىرىنشى ۆيتسە-پرەمەردى اقتوبەدەگى مەملەكەت-جەكەمەنشىك ارىپتەستىگى جوبالارىمەن تانىستىردى.
اتاپ ايتقاندا, ا.مامين تەك حوككەيشىلەردى عانا ەمەس, مانەرلەپ سىرعاناۋ مەن شورت-ترەك بويىنشا بولاشاق چەمپيونداردى دايىندايتىن «وليمپ» حوككەي مودۋلىندە بولدى. ايتا كەتۋ كەرەك, بۇل – تاۋەلسىزدىك جىلدارىندا سالىنعان قىسقى سپورت ءتۇرىن دامىتاتىن العاشقى سپورت عيماراتى.
كەلەسى كەزەكتە ءبىرىنشى ۆيتسە-پرەمەر جاڭا وقۋ جىلىندا «سىمبات» جەكەمەنشىك مەكتەبىنىڭ جانىنان اشىلاتىن اۋىلدان كەلگەن دارىندى بالالارعا ارنالعان ينتەرناتتا بولدى. سونىمەن قاتار, ا.مامين قازاقستاندا بالاماسى جوق 110 ورىندىق جەتىم بالالارعا ارنالعان قۇنى 1,6 ملرد تەڭگە بولاتىن «مەيىرىم» الەۋمەتتىك ءۇيىن قاراپ شىقتى.
ءوڭىر ءۇشىن ماڭىزدى بولىپ تابىلاتىن نىساندار سالىنىپ جاتقان قۇرىلىس الاڭدارىن ارالاۋ كەزىندە وبلىس اكىمى بەردىبەك ساپارباەۆ اتالعان نىسانداردىڭ جۇزەگە اسىرىلۋى, ەڭ الدىمەن, وبلىس بيۋدجەتىنە تۇسەتىن سالماقتى ازايتۋعا, قوسىمشا جۇمىس ورىندارىن قۇرۋعا, مەكتەپكە دەيىنگى بىلىممەن قامتۋدى, سونىمەن قاتار, مەديتسينالىق قىزمەت كورسەتۋ ساپاسىن ارتتىرۋعا ايتارلىقتاي مۇمكىندىك بەرەتىنىن اتاپ ءوتتى. بۇدان وزگە ءبىرىنشى ۆيتسە-پرەمەر بىرقاتار ءىرى كاسىپورىنداردىڭ قىزمەتىمەن تانىستى.
سونىمەن, جۋىردا عانا قۋاتتىلىعى جىلىنا 50 مىڭ توننا بولاتىن مۇناي-گاز جابدىقتارى مەن قۇبىرلار شىعارۋدى باستاعان «قازاقستان مۇناي جابدىقتارى زاۋىتى» جشس-دە بولدى. جوبانىڭ جالپى قۇنى 5 ملرد تەڭگەنى قۇرايدى.
ەلباسىنىڭ حالىق تۇرمىسىنىڭ دەڭگەيى مەن ساپاسىن ارتتىرۋ تاپسىرماسىن ورىنداۋ ماقساتىندا وڭىردە اۋىلدىق ەلدى مەكەندەردى گازداندىرۋ شارالارى جۇرگىزىلۋدە. وسىعان بايلانىستى وبلىس اكىمدىگى مەن «قازترانسگاز» اق اراسىندا مەموراندۋمعا قول قويىلىپ, سونىڭ اياسىندا قازاقستاندا, ياعني اقتوبەدە گاز تاراتۋدى ەداۋىر ارتتىرۋعا مۇمكىندىك بەرەتىن «اگرس 300» اۆتوماتتاندىرىلعان گاز تاراتۋ بەكەتى سالىندى. ايتا كەتۋ كەرەك, سوڭعى ەكى جىلدا اقتوبە وبلىسىنىڭ گازداندىرۋ دەڭگەيى 60%-دان 87%-عا دەيىن ارتتى.
بۇدان باسقا, ا.مامين ءوز قىزمەتىن «قازاگروقارجى» اق قولداۋىمەن يدمب اياسىندا جۇزەگە اسىرىپ وتىرعان وڭىردەگى ءىرى جىلىجاي كەشەندەرىنىڭ ءبىرى «گرين حاۋس قازاقستان» سەرىكتەستىگىندە اتقارىلعان جۇمىستارعا دەن قويدى. جوبانى جۇزەگە اسىرۋ وبلىستىڭ جاڭا پىسكەن كوكونىستەرگە دەگەن قاجەتتىلىگىن تولىقتاي قامتاماسىز ەتۋگە, سونىمەن قاتار, ارتىق ءونىمدى رەسەيگە ەكسپورتتاۋعا مۇمكىندىك بەرەدى.
جىلىجايدا اسقار مامينگە ەلباسىنىڭ ازىق-ت ۇلىك قاۋىپسىزدىگىن قامتاماسىز ەتۋ, وڭىرارالىق كووپەراتسيا مەن سۋارمالى ەگىنشىلىكتى دامىتۋ بويىنشا تاپسىرماسىن ورىنداۋدا وڭىردە قولدانىلىپ جاتقان شارالار تۋرالى باياندالدى.
بۇگىن پرەمەر-ءمينيستردىڭ ءبىرىنشى ورىنباسارى اسقار ءماميننىڭ اقتوبە وبلىسىنا جۇمىس ساپارى ودان ءارى جالعاسادى.
تەمىر قۇسايىن,
«ەگەمەن قازاقستان»
اقتوبە
