الاتاۋ اۋدانىندا ورنالاسقان №14 قالالىق ەمحانا باستاپقى مەديتسينالىق-سانيتاريالىق كومەك كورسەتەتىن دەربەس ۇيىم. ەمحانا 35 مىڭعا جۋىق تىركەلگەن جاندارعا مەديتسينالىق كومەك كورسەتەتىن اۋقىمدى ەمدەۋ ورتالىعى بولىپ تابىلادى.
حالىققا ساپالى مەديتسينالىق كومەك كورسەتۋ ءۇشىن ەمحانا تولىقتاي جابدىقتالعان جانە وندا بىلىكتى مەديتسينا ماماندارى, دەنساۋلىق ساقتاۋ ءىسىنىڭ ۇزدىكتەرى, "التىن دارىگەر", "مەيىرىم" ءتوس بەلگىلەرىمەن ماراپاتتالعان جوعارى ساناتتى دارىگەرلەر مەن مەدبيكەلەر جۇمىس ىستەيدى.
جيىنعا «نۇر وتان» پارتياسى الاتاۋ اۋدانىنىڭ فيليالى توراعاسىنىڭ ءبىرىنشى ورىنباسارى مۇقانعالي الماساەۆ, دەنساۋلىق ساقتاۋ باسقارماسى باسشىسىنىڭ ورىنباسارى جانار كەنجەباەۆا, الاتاۋ اۋدانى اكىمىنىڭ ورىنباسارى سايات اعىباەۆ جانە قالالىق ءماسليحات دەپۋتاتتارى قاتىستى.
سەرىك سەيدۋمانوۆ مەملەكەتتىك جانە ۇكىمەتتىك باعدارلامالار, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا قاتىستى سۇراقتارعا جاۋاپ بەرىپ, جۇيەلى رەفورمالاردى جالعاستىرۋدىڭ ماڭىزدىلىعى جونىندە ايتىپ ءوتتى.
دەنساۋلىق ساقتاۋ سالاسىنىڭ قىزمەتكەرلەرى مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ جانە الاتاۋ اۋدانىن قوعامدىق كولىكپەن قامتاماسىز ەتۋ جونىندە سۇراقتار قويدى. سونىمەن قاتار, دارىگەرلەر مەديتسينا سالاسى بويىنشا جوعارى وقۋ ورىندارىن بىتىرگەن تۇلەكتەردىڭ ءوز ەڭبەك جولىن باستاپقى مەديتسينالىق سانيتاريالىق كومەك كورسەتۋ جۇيەسىنەن باستاۋىن ۇسىندى.
– ۇلت جوسپارى «100 ناقتى قادام» ءبىزدىڭ ەلىمىزدى جانە ونىڭ بارلىق سالاسىن رەفورمالاۋ ماقساتىندا ناقتى ارەكەت ەتۋگە ىقپال ەتەتىن جوسپار دەپ ايتا الامىن. مۇندا مەديتسينانىڭ الار ورنى ەرەكشە. ۇلت جوسپارى بويىنشا مىندەتتى الەۋمەتتىك مەديتسينالىق ساقتاندىرۋ قابىلدانعان زاڭدار شەڭبەرىندە 2018 جىلدىڭ 1 قاڭتارىنان باستاپ ءوز كۇشىنە ەنەدى. الاتاۋ اۋدانىنداعى №14 ەمحانادا كەزدەسۋ ۇيىمداستىرۋىما دا ناقتى سەبەپ وسى بولىپ وتىر. باستى ماقسات وسى جۇيەنىڭ ءىس بارىسىندا قالاي جۇمىس ىستەيتىنىن كورۋ, – دەدى سەرىك سەيدۋمانوۆ.
№14 قالالىق ەمحانا باس دارىگەرىنىڭ ورىنباسارى باقىت ۇزدەمباەۆانىڭ ايتۋىنشا, ەمحانا قىزمەتكەرلەرى ساقتاندىرۋ جۇيەسىمەن تولىقتاي تانىس جانە كەلگەن ەمدەلۋشىلەردىڭ ءبارىن اقپاراتتاندىرۋدا.
– ۇجىم اتىنان بۇگىنگى كەزدەسۋگە العىس بىلدىرگىم كەلەدى جانە قازاقستان رەسپۋبليكاسى پارلامەنتى ءماجىلىسىنىڭ زاڭ شىعارۋ قىزمەتىمەن تانىسۋ ءبىز ءۇشىن ۇلكەن قۋانىش. دەپۋتاتتاردىڭ باستاپقى مەديتسينالىق-سانيتاريالىق كومەك كورسەتۋ سالاسىنا وسىلاي جاۋاپتى قاراۋى وتە ماڭىزدى, – دەدى ءوز سوزىندە باقىت ۇزدەمباەۆا.
ءماجىلىس دەپۋتاتى الماتى قالاسىنداعى ءىسساپارى بارىسىندا, سونداي-اق, قالالىق اۋەجايدا, «كازفەرروستال» كاسىپورنىندا, مەملەكەتتىك ورگاندار وكىلدەرى جانە قوعامدىق كەڭەس وكىلدەرىمەن كەزدەسۋ وتكىزەدى.
الماتى
