«سالەم, استانا» جوباسى ۋربانيستيكا جانە استانا قالاسى اكىمدىگىنىڭ قولداۋىمەن ەكسپو-2017 ءۇشىن FutureCreative بريتان مادەني باعدارلاماسى شەڭبەرىندە بريتان كەڭەسىمەن ىسكە اسىرىلۋدا.
جوبا بۇگىنگى كۇننەن جۇمىسىن باستايدى. جوبانى ازىرلەپ جاتقان مامانداردىڭ ايتۋىنشا, جوباعا استانا قالاسىنداعى كەز-كەلگەن قالا تۇرعىنى, قوناعى قاتىسا الادى. قالامەن «سويلەسۋدى» باستاۋ ءۇشىن FacebookMessenger قوسىمشاسى ارقىلى SalemAstana2017 (https://www.facebook.com/salemastana2017/) قولدانۋشىسىنا «سالەم» سوزىمەن, ءوزى تۇراتىن كوشەنىڭ اتاۋى مەن ءۇيدىڭ ءنومىرىن قوسا كورسەتىپ, حابارلاما جىبەرۋ كەرەك. ودان كەيىن حابارلاما جىبەرگەن ادامعا جاۋاپ حات (حابارلاما) كەلەدى. قالامەن بايلانىس ورناتۋدا ونىمەن «سويلەسۋ» 4-5 سۇراق قويۋ ارقىلى جانە وعان ءتۇرلى تاقىرىپتا جاۋاپ الۋ ارقىلى وتەدى. قالامەن بايلانىستى قازاق, جانە ورىس تىلدەرىندە جۇرگىزۋگە بولادى.
- «سالەم استانا» بريتاندىق ەكسپو باعدارلاماسى اياسىنداعى جوبالاردىڭ ءبىرى. «سالەم استانا» بريتاندىق «HelloLampPost» دەپ اتالاتىن جوباسىنىڭ نۇسقاسى دەۋگە بولادى, - دەدى BritishCouncil مادەني جوبالار جەتەكشىسى گالينا كورەتسكايا.
ينتەراكتيۆتى «سالەم, استانا» جوباسى قالا تۇرعىندارىنا وزدەرىنىڭ سۇيىكتى شاھارلارىمەن «سويلەسىپ», بايلانىس ورناتۋىنا مۇمكىندىك بەرەدى; كەز-كەلگەن قالا تۇرعىنى شاھار تۋرالى ءوزىنىڭ پىكىرىمەن نە بولماسا العان اسەرىمەن بولىسە الادى, قالانى جاڭا تۇرعىدان تانىپ, مول اقپارات جيناي الادى, وزگە دە ادامداردىڭ پىكىرىن بىلە الادى. جوبا قالانىڭ سارىارقا, الماتى, ەسىل سىندى 3 اۋدانىن قامتيدى. استانا وسىنداي جوبالار ىسكە اسىرىلىپ جاتقان الەمدەگى سەگىزىنشى قالا بولىپ تابىلادى. اتاپ ايتار بولساق ولاردىڭ ىشىندە لوندون, توكيو سەكىلدى قالالار بار.
جوبا قالاعا كۇندەلىكتى ومىردە تۇرعىندار جۇمىسقا نەمەسە بالاسىن بالاباقشادان الۋعا اسىعىپ بارا جاتىپ نە ويلايتىنىن بىلۋگە مۇمكىندىك بەرەدى. قالاداعى ورىندار ارقىلى كۇندەلىكتى اڭگىمەلەسۋ تاسىلىمەن ادامدار نەنى ارماندايتىنىن, نە مازالايتىنىن, نەمەنەگە ۇمتىلاتىنىن بىلۋگە بولادى.
