امفيتەاتر ساحناسىنا ءسان بەردى
قوستاناي وبلىسىنىڭ مادەني كۇندەرىنىڭ اشىلۋ سالتاناتى مەن ءوڭىردىڭ ۇزدىك شىعارماشىلىق ۇجىمدارىنىڭ «توبىل-تورعايىم, جۇرەكتەن تولعايىن» اتتى گالا-كونتسەرتىنە حالىق كوپ جينالدى. امفيتەاتر لىق تولىپ, ورىن قالماسا دا كورەرمەندەردىڭ كوبى كەشكى توعىزدان وتە باستالعان كونتسەرتتى تىكەسىنەن تىك تۇرىپ كوردى. جاندى داۋىستا شىرقالعان اندەر, ءبيشى قىز-جىگىتتەردىڭ كاسىبيلىگى, قازاقتىڭ جانىمەن ۇندەسەتىن قوڭىر كۇيلەر ءبارىمىزدى بىردەن باۋراپ الدى. قوستاناي وبلىستىق مادەنيەت باسقارماسىنىڭ باسشىسى ەرلان قالماقوۆ مۇنداي دەڭگەيدەگى كەشتى ۇيىمداستىرۋ ءۇشىن جارتى جىلداي دايىندىق جۇرگىزىلگەنىن ايتتى. «استاناعا وبلىستىڭ ەڭ ۇزدىك شىعارماشىلىق ۇجىمدارى مەن ەڭ ۇزدىك جەكە ورىنداۋشىلاردى الىپ كەلدىك. ولاردىڭ ۇزىن سانى 200-دەن اسادى. وعان قوسا ءبىزدىڭ وبلىستان شىققان, بۇل كۇندە رەسپۋبليكالىق دەڭگەيدە تانىمال ءانشى-كۇيشىلەر دە شاقىرىلدى. استانادا وتەتىن مادەنيەت كۇندەرىنە جىلدىڭ باسىنان بەرى دايىندالعان بولاتىنبىز. بەس كۇننىڭ ىشىندە وسىنداعى ءتۇرلى مادەني ورىنداردا اۋقىمدى توعىز شارا وتكىزەمىز», – دەدى ول.
بۇل كونتسەرتتە ءىرى شىعارماشىلىق ۇجىمدار قاتارىندا قازاق ۇلت اسپاپتار وركەسترى مەن ورىس ۇلت اسپاپتار وركەسترى, «كوستانايسكيە زوري» بي ءانسامبلى, ەتنوفولكلورلىق «زاباۆا» ءانسامبلى مەن دجاز جانە تانىمال اۋەندەر وركەسترى كوپشىلىك كوڭىلىنەن شىقتى. ال, قازاقستاننىڭ ەڭبەك سىڭىرگەن قايراتكەرى ارىستان قۇرمانوۆ «قوستاناي» ءانىن, قازاقستاننىڭ ەڭبەك سىڭىرگەن قايراتكەرى انار مۇزداحانوۆا «تارحان بابا» كۇيىن, «گاۋھارتاس» كۆارتەتى «ادەمى», «مەنىڭ قالام» اندەرىن, «استانا وپەرا» تەاترىنىڭ ءسوليسى روزا نۇركەي «سيلۆا» ارياسىن, سونداي-اق پرەزيدەنت وركەسترىنىڭ سوليستەرى نۇربولات ارزاماس ۇلى, انار قۇماروۆا «قوستاناي» ءانىن, باسقا دا جەكەلەگەن ورىنداۋشىلار «ەگەمەن ەلىم – قازاقستان», «ماڭگىلىك ەل» اندەرىن كورەرمەندەرگە ۇسىندى. ايتا كەتۋ كەرەك, گالا-كونتسەرتتە نەگىزىنەن وتانشىلدىققا, بىرلىككە, تاتۋلىققا شاقىراتىن اندەر ورىندالىپ, بي قويىلىمدارى ۇسىنىلدى.
قوستاناي وبلىسىنىڭ مادەني كۇندەرىنىڭ اشىلۋىنا ارنالعان گالا-كونتسەرتتەن بولەك اۋقىمدى شارالاردىڭ بارىسىندا ەلوردالىقتار وبلىستىڭ قولونەر شەبەرلەرىنىڭ, سۋرەتشىلەر مەن مۇسىنشىلەردىڭ تۋىندىلارىن, تەاتر ارتىستەرى مەن سپورتشىلاردىڭ ونەرلەرىن تاماشالادى.
ءداندى ولكەنىڭ ءدامى
وبلىس اكىمى ارحيمەد مۇحامبەتوۆ مىرزا اقپارات قۇرالدارى ءۇشىن ءباسپاسوز قىزمەتى ارقىلى تاراتقان رەسمي اقپارعا قاراعاندا, بيىل ولكەنىڭ جەرگىلىكتى اتقارۋشى ورگاندارى مەملەكەتتىك جانە سالالىق باعدارلامالاردى ىسكە اسىرۋدا بەلسەندى جۇمىس جۇرگىزىپتى. اتاپ ايتقاندا, ونەركاسىپ ءوندىرىسى ناقتى كولەمىنىڭ يندەكسى – 103,9 پايىزدى, اۋىل شارۋاشىلىعى – 100,3 پايىزدى, نەگىزگى كاپيتالعا ينۆەستيتسيالار – 100,9 پايىزدى, قۇرىلىس جۇمىستارى – 112,2 پايىزدى, بولشەك ساۋدا – 102,2 پايىزدى, جۇك اينالىمى – 102,8 پايىزدى, جولاۋشى تاسىمالى اينالىمى 103,9 پايىزدى قۇراعان ەكەن. يندۋستريالاندىرۋ كارتاسى بويىنشا ينۆەستيتسيالاردىڭ جالپى سوماسى 124,7 ملرد تەڭگەگە جەتىپ, 84 جوبا پايدالانۋعا بەرىلگەن. وسى ارقىلى 5 مىڭ تۇرعىندى جۇمىسپەن قامتىپ, قازىردىڭ وزىندە 421,4 ملرد تەڭگەنىڭ ءونىمى وندىرىلۋدە.
وسىلاي ەكونوميكاسى ورلەپ, جەڭىل ونەركاسىبى دامىعان قوستانايلىقتار استانالىقتارعا ءداندى ولكەنىڭ ءدامىن تارتۋ ەتتى. وتكەن جەكسەنبى كۇنى ەسىل وزەنىنىڭ ءبىر بۇرىمى اقبۇلاق وزەنىنىڭ ساعاسىندا ورىن تەپكەن «قازاقستان» سپورت كەشەنى ماڭىندا ازىق-ت ۇلىك جارمەڭكەسىن ۇيىمداستىردى. وعان ءوڭىردىڭ 14 اۋدانى مەن قالاسى ءوز ونىمدەرىن اكەلىپتى.
وبلىستىق اۋىلشارۋاشىلىق باسقارماسىنىڭ باستىعى بايبوسىن مۋرزين مىرزانىڭ ايتۋىنشا, اۋىلشارۋاشىلىق سالاسىنىڭ ءونىم كورسەتكىشى سوڭعى 25 جىلدا 295 ميلليارد تەڭگەگە دەيىن وسكەن. استىق ءوندىرۋدىڭ جىلدىق ورتاشا ەسەبى 5 ملن توننادان اسادى. تەك وتكەن جىلى 965 مىڭ توننا جوعارى سۇرىپتى ۇن وبلىستان تىس جەرلەرگە جونەلتىلگەن, ونىڭ ىشىندە 860 مىڭ تونناسى نەمەسە 90 پايىزى ەكسپورتقا شىعارىلعان.
جارمەڭكەگە 50-دەن استام كاسىپورىن 150 ملن تەڭگەنىڭ تاۋارىن اكەلگەن. مۇندا 100-دەن اسا ءونىم ءتۇرى بار. بارلىعى 650 توننا. ناقتىراق ايتساق: ەت ونىمدەرى – 33 توننا, ءسۇت ونىمدەرى – 90 توننا, شۇجىق جانە جارتىلاي ەت فابريكاتتارى – 59 توننا, ماكارون بۇيىمدارى – 52 توننا, نان جانە كونديتەرلىك تاۋارلار – 57 توننا بولسا, جۇمىرتقا 200 مىڭ دانا جانە جوعارى سۇرىپتى 93 توننا ۇن استانالىقتار ءۇشىن ساۋداعا قويىلدى.
ساتىلىمداعى تاۋار قۇنى استانا نارىعىنداعى ورتاشا باعالاردان دا تومەن. مىسالى, سيىر ەتى – 1250 تەڭگە, جىلقى ەتى – 1500 تەڭگە, قوي ەتى – 1150 تەڭگە, قۇس ەتى – 800 تەڭگە, شۇجىق تۇرلەرى – 850 تەڭگە, سارى مايدىڭ كيلوسى – 950 تەڭگە, جۇمىرتقانىڭ 10 داناسى – 170 تەڭگە, ماكارون ونىمدەرىنىڭ 1 كيلوسى 140 تەڭگە, وسىمدىك مايىنىڭ 1 ءليترى 380 تەڭگەگە ساتىلدى. كوكونىستەر – كارتوپ, قىرىققابات, ءسابىز جاڭادان الىنعان بيىلعى جىلدىڭ ءونىمى ەكەن. باعالارى دا قالتا كوتەرەتىندەي, 70-120 تەڭگە ارالىعىندا...
قوستانايلىقتاردىڭ ارزان ءونىمىن ساتىپ العان استانالىقتار زور العىستارىن بىلدىرسە, ەلوردالىقتار اتىنان قالا اكىمى اسەت يسەكەشەۆتىڭ ءوزى كەلىپ, استىقتى ولكەنىڭ ءدامدى دانىنە ءدان ريزا ەكەنىن جەتكىزدى.
تۇڭعىشتار مەكەنى
قوستاناي ءوڭىرىن تۇڭعىشتار مەكەنى دەسە جاراسادى. ويتكەنى, قازاقتان شىققان تۇڭعىش اعارتۋشى ىبىراي التىنسارين, تۇڭعىش كاسىبي جۋرناليست مۇحامەتجان سەرالين, قازاقتىڭ تۇڭعىش ءالىپبيىن جاساعان احمەت بايتۇرسىنوۆ, قازاقتان شىققان تۇڭعىش دارىگەر مۇحامەدجان قاراباەۆ, ءبىلىمپاز-قايراتكەر ەلدەس وماروۆ, الاششىل تۇلعا مىرجاقىپ دۋلاتوۆ, ءىلياس وماروۆ, ساحنا ساڭلاقتارى – سەركە قوجامقۇلوۆ, ەلۋباي ومىرزاقوۆ, قاپان بادىروۆ, ءانۋار بورانباەۆ, سازگەرلەر باقىتجان بايقاداموۆ, ءابىلاحات ەسپاەۆ, جازۋشى بەيىمبەت مايلين, قازاقتان شىققان تۇڭعىش انتروپولوگ ورازاق سماعۇلوۆ, حالىق اقىندارى نۇرجان ناۋشاباي ۇلى, نۇرجان احمەتبەكوۆ دەپ كەتە بەرەدى.
جوعارىداعى تۇڭعىشتار سالعان سۇرلەۋدى تاعى ءبىر جاڭعىرتۋ ماقساتىندا جانە ولكەنىڭ وركەندەۋىنە ۇلەس قوسقان تۇلعالار مەن قوستاناي توپىراعىنان تۇلەگەن زيالى قاۋىم وكىلدەرىنىڭ باسىن قوسىپ, وبلىس اكىمى ءماسليحات-داستارقان ءراسىمىن وتكىزدى.
«استانا تورىندە جەرلەستەرىمىزدى جيناپ سۇحباتتاسىپ, پىكىر الماسۋ كەزدەسۋىن وتكىزۋدەگى ماقساتىمىز – ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا: ء«اربىر حالىقتىڭ, ءاربىر وركەنيەتتىڭ بارشاعا ورتاق قاسيەتتى جەرلەرى بولادى, ونى سول حالىقتىڭ ءاربىر ازاماتى بىلەدى. بۇل – رۋحاني ءداستۇردىڭ باستى نەگىزدەرىنىڭ ءبىرى» دەپ ايتىپ وتكەنىندەي, وزدەرىڭىزبەن اشىق سۇحباتتاسۋعا شاقىرىپ وتىرمىن», – دەدى اكىم ارحيمەد مۇحامبەتوۆ مىرزا.
قازىرگى تاڭدا وبلىس بويىنشا 30 نىساننان تۇراتىن تىزبە جاسالىپ, ونىڭ 9-ى رەسپۋبليكالىق, 21-ءى وڭىرلىك قاسيەتتى جەرلەر كارتاسىنا ۇسىنىلىپتى. سونىمەن قاتار, امانگەلدى اۋدانىندا كەيكى باتىردىڭ جاڭا كەسەنەسىنىڭ قۇرىلىسى جۇرگىزىلۋدە. الداعى قىركۇيەك ايىندا باتىردىڭ باس سۇيەگىن جەرلەۋ ءراسىمى بويىنشا رەسپۋبليكالىق دەڭگەيدە كولەمدى ءىس-شارا وتكىزۋ جوسپارلانعان. قوستاناي اۋدانىندا ىبىراي ءالتىنساريننىڭ كەسەنەسىن قايتا جاڭعىرتۋ جۇمىستارى اياقتالىپ كەلەدى. تاياۋ ۋاقىتتا قوستاناي قالاسىندا تاريحي تۇلعا شاقشاق جانىبەككە ەسكەرتكىش ورناتىلاتىن بولادى. بۇل ىسكە اكادەميك كەنجەعالي ساعاديەۆ باستاماشىلىق جاساپ وتىر ەكەن.
جۇزدەسۋ بارىسىندا زيالى قاۋىم وكىلدەرى قويشىعارا سالعارا ۇلى, تولەن ابدىك, ەكونوميست عالىم باينازاروۆ, بەلگىلى مەتسەنات ساپار ىسقاقوۆ ىستىق ىقىلاسىن جولداسا, 1998-2004 جىلدارى قوستاناي ءوڭىرىن باسقارعان ومىرزاق شوكەەۆ پەن 2004-2012 جىلداردا اكىم بولعان سەرگەي كۋلاگينگە, قارىمدى قالامگەر ءسابيت دوسانوۆقا وبلىستىڭ 80 جىلدىق مەرەيتويلىق مەدالى تابىس ەتىلدى.
ەتنواۋىلداعى ەرەكشە كورمە
جەكسەنبىنىڭ ءتۇسى اۋعاندا قوستانايلىقتاردىڭ تويى قالا شەتىندەگى «ەتنواۋىلدا» جالعاستى. مۇندا وڭىرگە اتى تانىمال 20 قولونەر شەبەرى وزدەرى جاساعان بۇيىمدارىن كورمە سورەسىنە ورنالاستىرىپتى. اتاپ ايتار بولساق, قىرىق جىلدان استام قازاق ويۋ-ورنەگىن زەرتتەپ جۇرگەن تانىمال ەتنوگراف ءشوپتىباي ءبايدىلدين وزىمەن بىرگە 90 ءتۇرلى ويۋ-ورنەك ءتۇرىن كورەرمەن كوزايىمىنا ۇسىنۋعا اكەلىپتى. اعامىزدىڭ قورىندا قازاقتىڭ 1500-دەن استام ويۋ ءتۇرى بار كورىنەدى. بۇعان دەيىن ەكى كىتابى جارىق كورگەن.
بۇدان باسقا ارلان اڭقاۋوۆتىڭ جۇمساق ءجۇندى پايدالانىپ جاساعان كوركەم تۋىندىلارى دا بار. ياعني, ۇلپا ارقىلى اپپليكاتسيالانعان تابيعي جۇننەن ساندىك بوياۋلى كارتينالار سالۋ بۇعان دەيىن بولماعان دەيدى ماماندار. ءبىر سوزبەن ايتقاندا, بۇل – كوركەمسۋرەت ونەرىنە قازاق بالاسىنىڭ ەنگىزگەن جاڭالىعى. راسىندا, اۆتوردىڭ قولىندا ايرىقشا پاتەنتى دە بار كورىنەدى.
كەستەنىڭ شەبەرى جانار ورىنباەۆانىڭ قولىنان شىققان توقىمالى كادەسىيلار مەن تەرى بەدەرىنە اكريلدى بوياۋمەن سۋرەت سالۋدىڭ شەبەرى گۇلدانا جورقاباەۆالاردىڭ ەڭبەگىن ەلەمەۋ مۇمكىن ەمەس.
سونىمەن قاتار, زەرگەر اسىلماردان قابىرباەۆتىڭ قولىنان شىققان كۇمىس ساقينا, بىلەزىك, مويىنالقا تۇرلەرى اسەمدىگىمەن ءار بەرسە, اعاش شەبەرى تاڭاتقان بوجاقوۆتىڭ بۇيىمدارى شىن شەبەردىڭ شىنايى ۇلگىسىندەي اسەر قالدىرارى انىق. مۇسىنشىلەر ەگور كيسليتسين مەن ۆلاديسلاۆ گالبەندەردىڭ مونۋمەنتالدى جانە ستانوكتى مۇسىندەرى, قارا تاسقا بادىزدەگەن گرافيكاسى, كەراميكالىق تۋىندىلارى كاسىبي دەڭگەيدىڭ مەجەسىن ايگىلەپ تۇرعانداي.
ەكىنشى ءبىر ماڭىزدى دۇنيە – قوستاناي وبلىستىق تاريحي-ولكەتانۋ مۋزەيى قورىنان اكەلىنگەن جادىگەرلەر. وسىلاردىڭ اراسىندا ارقالىق قالاسىنداعى «دالا ولكەسى تاريحى» وبلىستىق مۋزەيى قورىنان الىنعان كەيكى باتىردىڭ كەبەجەسى مەن 1916 جىلعى ۇلت-ازاتتىق كوتەرىلىس باسشىسى امانگەلدى يمانوۆتىڭ دومبىراسىن قىزىقتاپ قايتتىق.
پاتشا زامانىندا قوستاناي ءوڭىرى قارابالىق ەلىندە 40 جىل بولىس بولعان بەرمۇحامەد الدياروۆتىڭ التىنمەن زەرلەپ, ويۋمەن وقالاعان مۇراعى (باس كيىمى) مەن ونىڭ بايبىشەسى پايدالانعان كۇمىس زەرلى قامزول, الدىڭعى قاسىنا اقىق تاس ورناتىلعان ايەلدىڭ ەرى قاتارلى قۇندى دۇنيەلەر بار. بۇل بۇيىمداردى 1928 جىلى قوستاناي گۋبكومى قالالىق مۋزەيگە تاپسىرعان. وعان سەبەپ, 1927 جىلى بەرمۇحامەد اتامىز كامپەسكەگە ۇشىراعاندا تارتىپ الىنعان بۇل زاتتار قالانىڭ مۋزەي قورىنا وتكىزىلگەن. بۇلاردان باسقا اتامىزدىڭ بىلعارىدان جاساتىپ, كۇمىسپەن كوركەمدەگەن قىن-قىلشالى كىسە بەلبەۋىن كوردىك.
اتشاباردا وتكەن جارىس
وبلىس كۇندەرىنىڭ جوسپارى بويىنشا وتكىزىلۋى ءتيىس تاعى ءبىر ماڭىزدى شارا – ۇلتتىق سپورت تۇرلەرىنەن وتەتىن جارىستار قالا شەتىندەگى «قازانات» اتشابارىندا ۇيىمداستىرىلدى. جينالعان جۇرتشىلىققا ۇلتتىق ويىن ءتۇرى قىز قۋدى كورسەتكەن قوستانايلىق شاباندوزداردىڭ شەبەرلىگىنە ەل ءسۇيسىندى. ودان كەيىن تەڭگە ءىلۋ سايىسىنا قاتىسقان بەس جىگىتتىڭ اراسىنان وڭتۇستىكقازاقستاندىق سايىپقىران ساپاربەك ماعجان توپ جارىپ, باسكە تىگىلگەن قارجىلاي سىيلىقتى ءبىر دەمدە قاعىپ تاستادى.
بالۋاندار ءۇشىن باس جۇلدەنى ساراپتاۋعا تىگىلگەن 700 مىڭ تەڭگەنى قازاقشا كۇرەستىڭ مايتالمانى, قوستانايلىق بالۋان ەرلان وماروۆ جەڭىپ الدى. كەلەسى ورىندارعا شىعىسقازاقستاندىق مۇحيت تۇرسىنوۆ (400 مىڭ تەڭگە) پەن استانالىق ساقا بالۋان عاني سەيدىلداەۆ (250 مىڭ تەڭگە) يە بولدى.
ناعىز كورەرمەننىڭ قانىن قىزدىرعان وقيعا توپ جانە الامان بايگە جارىستارىندا كورىنىس تاپتى. 15 شاقىرىمدىق بايگە جولىنا شىققان 23 سايگۇلىكتىڭ اراسىنان 11 شاقىرىمعا دەيىن 9-ى ارەڭ جەتتى. كۇننىڭ ىستىعى ما, الدە قاعىر جەرگە شاۋىپ جاتتىققان جىلقىلار بايگە جولىنا توسەلگەن قالىڭ قۇمعا شاشاسىنا دەيىن مالتىعىپ شابا الماي بۇردىقتى ما, انىعىن بىلە المادىق.
سوڭعى اينالىمعا ىلىككەن جەتى جۇيرىكتىڭ ىشىنەن جامبىلدىق اتبەگى بەكبەردى بوقاەۆ باپتاعان ءتورت جاسار اعىلشىن جىلقىسى «باقتورى» ءبىرىنشى كەلىپ, باپكەرى باس جۇلدەگە تىگىلگەن «Ravon Nexia» جەڭىل كولىكتىڭ كىلتىن الدى. ەكىنشى بولىپ شىلبىر ۇستاتقان اقمولالىق نۇرداۋلەت اكىمجانوۆتىڭ تازاقاندى تورىسى «باريتون» 1 ملن تەڭگەنىڭ سىيلىعىنا يە بولسا, ءۇشىنشى ورىنعا تۇراقتاعان قوستانايلىق ورازعالي ءجۇسىپوۆتىڭ «يستوك» اتتى تورىسىنا 700 مىڭ تەڭگە بايگە بۇيىردى. كەلەسى ورىن يەلەرى – جامبىلدىق ايدار نۇرماعامبەتوۆتىڭ «جۇلدىزى» مەن الماتى قالاسىنىڭ تۇرعىنى مەرحات بۇلعىنوۆتىڭ «تاۋەكەل» اتتى ءۇش جاسار جىلقىسى ارقايسىسىنا تيەسىلى 300 جانە 150 مىڭ تەڭگە جۇلدەلەرىن قانجىعالادى.
كورەرمەن كوپتەن كۇتكەن الامانعا 24 سايگ ۇلىك جىبەرىلىپ, باستاپقىدا اتتاردىڭ الدىنا شىققان 17-ءشى ءنومىرلى جۇيرىك سوڭعى بەس اينالىمعا دەيىن جارىستىڭ الدىن بەرمەدى. جارىس جولىنىڭ اياقتالۋىنا ءۇش اينالىم قالعاندا بۇعان دەيىن ىركەس-تىركەس بۋناقتالا شابىس سالعان جۇيرىكتەر توپتاستى دا, سوڭعى ەكىنشى اينالىمعا 12 ات ءوتتى. باسقاسى جارىس جولىنان شىعىپ قالدى. اقىرعى اينالىمعا 8 جۇيرىك ارەڭ ءوتىپ, بۇلاردىڭ اراسىنان قاراعاندىلىق ومىرزاق نۇريسلامنىڭ «تايماسى» توپ جارىپ, باس بايگەگە تىگىلگەن «JAG S3» كولىگىنە قول جەتكىزسە, ەكىنشى جۇلدە 2 ملن تەڭگە قوستانايلىق جۇيرىك «ساۆاش مەرين» (يەسى – ورازعالي ءجۇسىپوۆ) اتتى ايعىرعا بۇيىردى. ءۇشىنشى بولىپ كەلگەن الماتى وبلىسىنىڭ جىلقىسى «فلەيتا» 1 ملن تەڭگە سىيلىق السا, ءتورتىنشى ورىن يەسى ماڭعىستاۋلىق تاڭاتار ابدىعاليدىڭ تازا قاندى جيرەنى «دجەكپوت» 500 مىڭ تەڭگەنىڭ جۇلدەسىن جەڭىپ الدى. بەسىنشى ورىنعا يەلىك ەتەر جۇيرىك بولمادى. جوعارىداعى ءتورت اتتان باسقاسى مارە سىزىعىن كەسىپ وتەرلىك قاۋقارى بولماي بولدىرىپ جولدا قالدى.
P.S. قوستاناي وبلىسىنىڭ مادەني كۇندەرى وسى اپتانىڭ دۇيسەنبى جانە سەيسەنبى كۇندەرى دە جالعاسادى. كەشە استانا قالاسىنىڭ ورتالىق الاڭىندا «سلاۆيانسكايا پەسنيا» اتتى ورىس ۇلت اسپاپتار وركەسترى مەن «مۋزىكا – دۋشا نارودا» اتى ۆوكالدىق-پوەتيكالىق انسامبل كونتسەرتتىك باعدارلاماسىن استانالىقتاعا ۇسىندى. بۇگىن «كوستانايسكيە زوري» بي ءانسامبلى «سيقىرلى بي الەمى» اتتى حورەوگرافيالىق شوۋ ونەرىن كورسەتەدى. ەرتەڭ, ياعني 9 تامىزدا وبلىس كۇندەرىنىڭ سالتاناتتى جابىلۋى «نيۋ-بويس» توبىنىڭ دجازدىق اۋەنى اياسىندا استانا قالاسىنىڭ ورتالىق الاڭىندا وتەدى.
بەكەن قايرات ۇلى,
ايگۇل سەيىل,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
