سۋرەت: inform.kz
2017 جىلدىڭ شىلدە ايىندا مەديتسينالىق قىزمەتتىڭ ساپاسى بويىنشا بىرلەسكەن كوميسسيانىڭ شەشىمىمەن جانە دەنساۋلىق ساقتاۋ ءمينيسترىنىڭ بۇيرىعىمەن 2018 جىلعا ارنالعان مەديتسينالىق تەگىن كومەكتىڭ كەپىلدەندىرگەن كولەمى مەن مىندەتتى مەديتسينالىق ساقتاندىرۋ جۇيەسىندە تەگىن امبۋلاتوريالىق ءدارى-دارمەكتەردىڭ ءتىزىمى قايتا قارالىپ, كەڭەيتىلدى.
جاڭا بۇيرىق بويىنشا حالىقتى ءدارى-دارمەكپەن قامتاماسىز ەتۋگە 106 429 019 926 تەڭگە جۇمسالاتىن بولادى. وسى تۇستا ايتا كەتەرلىگى, 2016 جىلى ءدال وسى باعىتتا 77 194 551 026 تەڭگە بولىنگەن بولاتىن. وسىلايشا, 2018 جىلى حالىقتى تەگىن ءدارى-دارمەكپەن قامتۋ باعىتىندا وتكەن جىلمەن سالىستىرعاندا قاراجات 38 پروتسەنتكە ارتىق بولىنەدى.
تەگىن امبۋلاتوريالىق ءدارى-دارمەكتەردىڭ ءتىزىمىن بەكىتۋ تۋرالى بۇدان بۇرىنعى, ياعني 2011 جىلدىڭ 4 قاراشاسىندا شىققان قر دەنساۋلىق ساقتاۋ ءمينيسترىنىڭ م. ا. بۇيرىعىنا سايكەس, ەل تۇرعىندارى اۋرۋدىڭ 47 توبى, 6 مەديتسينالىق ءونىمنىڭ ءتۇرى بويىنشا حالىقارالىق پاتەنتتەلمەگەن اتاۋلى ءدارى-دارمەكتىڭ 266 تۇرىمەن قامتاماسىز ەتىلگەن.
ءمينيستردىڭ جاڭا بۇيرىعىنا ساي, حالىق اۋرۋدىڭ 48 توبى, 6 مەديتسينالىق ءونىمنىڭ ءتۇرى بويىنشا حالىقارالىق پاتەنتتەلمەگەن اتاۋلى ءدارى-دارمەكتىڭ 274 تۇرىمەن قامتىلماق.
2018 جىلى تەگىن ءدارى-دارمەكتەردىڭ ءتىزىمى وڭ اسەر ەتەتىنى دالەلدەنگەن جاڭا پرەپاراتتارمەن تولىقتىرىلعانىن ەرەكشە اتاپ وتۋگە بولادى; حالىقارالىق دسۇ-نىڭ كەڭەسىنە سايكەس, كلينيكالىق تاجىريبەدە قولدانىلمايتىن جانە تيىمدىلىگى تومەن ءدارى-دارمەكتەر تىزىمنەن شىعارىلعان.
دەنساۋلىق ساقتاۋ مينيسترلىگى ۋاقىت وتە كەلە ستاتسيانورلارداعى نەگىزسىز ەم-دومدى تومەندەتىپ, امبۋلاتوريالىق دەڭگەيدە اۋرۋ-سىرقاتتاردى باسقارىپ وتىرۋ ءۇشىن تەگىن امبۋلاتوريالىق ءدارى-دارمەكتەردىڭ ءتىزىمىن ۋاقىت وتە كەلە كەڭەيتۋدى جوسپارلاپ وتىر.
تىزىمدەگى جاڭا اۋرۋدىڭ ءتۇرى - اۋتويمۋندى سىرقاتتاردىڭ توبىنا جاتاتىن انكيلوزيرۋەمدى سپونديليت. بۇدان بىلاي انكيلوزيرۋەمدى سپونديليتپەن اۋىراتىن ناۋقاستار ءبىرىنشى قاتارداعى پرەپاراتتار رەتىندە «يندومەتاتسين» مەن «سۋلفاسالازين» اتتى ەكى ءدارىنى الا الادى. ال ەكى ءدارى اسەر بەرمەي جاتسا, «گوليمۋماب», «اداليمۋماب» اتتى تاعى ەكى بيولوگيالىق ءدارىنى الۋعا مۇمكىندىك بار.
مەملەكەت اۋرۋدىڭ اۋىر تۇرلەرىنە شالدىققان ناۋقاستار مەن ولاردىڭ وتباسىلارىن ەرەكشە كوڭىل ءبولىپ كەلەدى. ماسەلەن, ەم قونبايتىن اۋرۋلاردىڭ تۇرىنە شالدىققان ناۋقاستارعا ءپاللياتيۆتى كومەك كورسەتۋ ءۇشىن بەرىلەتىن تەگىن ءدارى-دارمەكتەردىڭ ءتىزىمى ۇزارتىلعان. حدسۇ-نىڭ كەڭەسى بويىنشا دەنساۋلىق ساقتاۋ مينيسترلىگى تەگىن امبۋلاتوريالىق ءدارى-دارمەكتەردىڭ تىزىمىنە 15 ءدارىنىڭ ءتۇرى مەن ءونىمىن: كەتوپروفەن; ترامادول, مورفين, فەنتانيل, پرەدنيزولون, دەكسامەتازون, ومەپرازول, اميتريپتيلين, كاربامازەپين, مەتوكلوپراميد, ديازەپام, بيساكوديل, سپيرونولاكتون, توراسەميد ت.س.س. كىرگىزدى.
جاڭا وزگەرىستەرگە سايكەس, تۋبەركۋلەز, ۆيچ-ينفەكتسيا, سوزىلمالى اۋرۋلارعا بەرىلەتىن تەگىن دارىلەردىڭ ءتىزىمى كەڭەيتىلدى.
جاڭا بۇيرىقتا بالالارعا دا ەرەكشە دەن قويىلىپ وتىر. بالالاردىڭ اراسىنداعى ءارتريتتى جازۋ ءۇشىن امبۋلاتوريالىق دەڭگەيدە ەكىنشى باعىت بويىنشا پرەپاراتتاردىڭ تىزىمىنە تاعى دا ءدارى-دارمەكتەر قوسىلدى. بيولوگيالىق پرەپاراتتاردىڭ تەراپياسىنىڭ ناتيجەسىندە, اۋرۋدىڭ كلينيكالىق بەينەسى جاقسارىپ, اۋرۋحاناعا جەتكىزىلۋ جاعدايى ازايادى.
تەگىن امبۋلاتوريالىق ءدارى-دارمەكتەردىڭ تىزىمىنە جۇرەكتىڭ يشەميالىق اۋرۋلارىن ەمدەيتىن زامانعا ساي دارىلەر ەنگىزىلگەن. 2018 جىلى ستاتين («اتورۆاستاتين») توبىنان ءدارى-دارمەكتەر كىرگىزىلگەن. ستاتيندەردى قولدانۋ ارقىلى جۇرەكتىڭ يشەميالىق اۋرۋلارى ازايىپ, ينفاركت الۋ جاعدايى تومەندەيدى. سونىمەن بىرگە, جاڭا بۇيرىق نەگىزىندە گەماتولوگيالىق اۋرۋلاردى ەمدەۋگە ارنالعان ءدارى-دارمەكتەردىڭ سانى بۇرىنعىدان 11-گە ارتتى.
تەگىن امبۋلاتوريالىق ءدارى-دارمەكتەرمەن قامتاماسىز ەتۋ بۇيرىعىندا قارجىلاندىرۋ جاعىنان رەسپۋبليكالىق دەڭگەيدە جانە جەرگىلىكتى دەڭگەيدە اقشا ءبولۋ ءتارتىبى وزگەرىسسىز قالدىرىلدى.
