ەندى مىنە, ءوڭىردىڭ اۋدان ورتالىقتارىندا دا وسىنداي سۋبۇرقاقتار ىسكە قوسىلىپ, جۇرت باراتىن دەمالىس ورىندارىنىڭ قاتارى كوبەيىپ كەلەدى. جاقىندا وسىنداي ءتۇرلى-ءتۇستى سۋبۇرقاق جارما اۋدانىنىڭ ورتالىعى – قالباتاۋ اۋىلىنداعى ورتالىق الاڭدا ەلدى مەكەن تۇرعىندارىنىڭ, جاستاردىڭ قاتىسۋىمەن سالتاناتتى تۇردە اشىلدى. اۋىلداعى اعايىننىڭ كوڭىلىن سەرپىلتكەن شاراعا اۋدان اكىمى نۇرلان سىدىقوۆ تا ارنايى قاتىسىپ, ەلدى مەكەنگە ەرەكشە كورىك بەرگەن سۋبۇرقاقتى جۇرتپەن بىرگە تاماشالادى.
«اۋىلىمىزدىڭ كوركىن كىرگىزىپ, اجارىنا اجار قوسقان بۇل نىسان جەرگىلىكتى تۇرعىندارعا عانا ەمەس, اۋدانعا كەلەتىن قوناقتارعا دا ەرەكشە اسەر سىيلايدى دەپ ويلايمىز. اسىرەسە, ءبىز سەكىلدى جاستار ءۇشىن اۋدانىمىزدا وسىنداي دەمالىس ورىندارىنىڭ كوپ بولعانى قۋانتادى», دەدى سۋبۇرقاقتىڭ اشىلۋ سالتاناتىندا جاستار اتىنان ءسوز العان «جاس وتان» جاستار قاناتىنىڭ بەلسەندى مۇشەسى ماحاببات سانات.
اۋەندى سۋبۇرقاق ەكى توستاعاننان تۇرادى. ۇلكەنىنىڭ ديامەترى 20 مەتردى قۇرايدى. 200 سۋ بۇرىككىشتەن تۇراتىن سۋبۇرقاق 12 مەتر بيىكتىككە دەيىن سۋ شاشاتىن كورىنەدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى
