بۇگىنگىنىڭ وزەكتى ماسەلەسىن ارقاۋ ەتكەن شارانىڭ وتۋىنە قالالىق ءبىلىم باسقارماسى مەن قازاقستاندىق مەكتەپكە دەيىنگى ۇيىمدار قاۋىمداستىعى مۇرىندىق بولدى.
شارا بارىسىندا مەكتەپكە دەيىنگى مەكەمەنى اشۋعا نيەت بىلدىرگەن كاسىپكەرلەرگە ونى اشۋدىڭ ءتارتىبى, مەكتەپكە دەيىنگى مەكەمەنى اشۋعا بايلانىستى زاڭنامامەن بەلگىلەنگەن تالاپتار جانە ونىڭ اشىلعاننان كەيىنگى جۇمىس بارىسى, سونداي-اق, مەكتەپكە دەيىنگى تاربيە مەن وقىتۋ بويىنشا مەملەكەتتىك ءبىلىم بەرۋ تاپسىرىسىن ورنالاستىرۋ تۋرالى قاجەتتى اقپاراتتار ۇسىنىلدى.
«بۇگىنگى تاڭدا ەلوردادا 30 مىڭنان استام بالعىن بالاباقشاعا كەزەكتە تۇر. مەملەكەت تاراپىنان وسى بالالاردىڭ بارلىعىن ورىنمەن قامتاماسىز ەتۋ ءۇشىن قاراجات جاعىنان ۇلكەن قادامدار جاساۋ كەرەك. سوندىقتان وسى ماسەلەنى ءبىز جەكەمەنشىك سەكتورمەن, ياعني كاسىپكەرلەرمەن بىرلەسە وتىرىپ, الداعى 3 جىلدا تولىعىمەن شەشۋدى كوزدەپ وتىرمىز. بۇل ناقتى جوسپار. جىل سايىن ءبىز 10 مىڭ مەملەكەتتىك جانە جەكەمەنشىك بالاباقشا ورنىن اشىپ وتىرساق, 3 جىلدا بالالار تولىعىمەن قامتىلىپ, بۇل پروبلەما شەشىمىن تابادى» دەدى قالالىق ءبىلىم باسقارماسىنىڭ باسشىسى ءانۋار جانعوزين.
بۇگىندە استانا بويىنشا مەكتەپكە دەيىنگى 263 مەكەمە جۇمىس ىستەيدى, ونىڭ ىشىندە 96 مەملەكەتتىك, 2 ۆەدومستۆولىق جانە 116 جەكە, 49 شاعىن ورتالىقتار بار. قازىر استانالىق 46 062 بالاباقشاعا بارادى. ولاردىڭ 27 193-ءى مەملەكەتتىك, 14 854-ءى جەكەمەنشىك بالاباقشالاردىڭ تاربيەلەنۋشىلەرى. شامامەن 6 مىڭ ءبۇلدىرشىن شاعىن ورتالىققا جانە مەكتەپكە دەيىنگى مەكەمەلەرگە بارادى. كەزەكتە تۇرعان 33 مىڭنان استام بالا بار. كۇندەلىكتى باقشا كەزەگىنە شامامەن 90 بالا تۇرادى.
باسقارما باسشىلىعىنىڭ ايتۋىنشا, بىلتىر جەكەمەنشىك سەكتورمەن بىرلەسە وتىرىپ, 4 مىڭعا جۋىق ورىندى قامتيتىن 44 بالاباقشا اشىلعان. بيىلعى اقپان ايىندا اشىق ەسىك كۇنىن وتكىزىپ, ونىڭ ناتيجەسىندە استانالىق كاسىپكەرلەر تاراپىنان 5,5 مىڭ ورىندى قامتيتىن مەملەكەتتىك تاپسىرىسقا سۇرانىس كەلگەن. بۇگىنگى اشىق ەسىك كۇنىنەن كەيىن ولاردىڭ دا سانى ارتادى دەپ كۇتۋدە.
