جۋىردا عانا وسكەمەندە نازارباەۆ زياتكەرلىك مەكتەبىنىڭ جاڭا عيماراتى پايدالانۋعا بەرىلگەن بولاتىن. قالانىڭ ساتپاەۆ داڭعىلىنداعى ءبىلىم ورداسىنىڭ اشىلۋىنا ەلباسى نۇرسۇلتان نازارباەۆ كەلىپ قاتىسقان. جۋىقتا كومسومول كوشەسىندەگى نزم-ءنىڭ بۇرىنعى عيماراتىن قازاق مەكتەبىنە بەرۋ تۋرالى قالا اكىمىنىڭ قاۋلىسى شىققان. «1000 ورىندىق №47 قازاق مەكتەبىندە وقۋشىلار ەكى اۋىسىم بويىنشا وقيدى.
بۇل مەكتەپكە جىبەك ماتالار كەنتىندەگى №26 جانە №45 مەكتەپتەردەن, ورالحان بوكەي اتىنداعى №44 ليتسەيدەن, 19-شاعىن اۋدانداعى №46 مەكتەپتەن وقۋشىلار كوشىرىلەدى», - دەپ حابارلادى وسكەمەن قالاسىنىڭ ءبىلىم بەرۋ بولىمىنەن. وسكەمەن قالاسىنىڭ جىبەك ماتالار كەنتى مەن 19-شاعىن اۋدانىندا حالىق سانى جىل ساناپ ارتىپ كەلە جاتقانىن اتاپ ءوتۋ كەرەك. اسىرەسە, قالا باسشىلىعى كوپقاباتتى ۇيلەر كوپتەن سالىنىپ جاتقان 19-شاعىن اۋداندا الەۋمەتتىك نىسانداردىڭ سالىنۋىنا باسا ماڭىز بەرۋدە.
الداعى جىلدارى قالالىق بيلىك اتالعان شاعىن اۋداندا تاعى وقۋشىلار سارايىن سالۋدى كوزدەپ وتىر. بۇدان بولەك, وسكەمەن قالاسىنىڭ احمەر اۋىلىندا تاعى ءبىر 1000 ورىندىق مەكتەپتىڭ قۇرىلىسى جوسپارلانعان. سونىمەن بىرگە, سوگرا كەنتىندەگى №26 مەكتەپ كەڭەيتىلەتىن بولادى.
