وسىعان وراي رەسپۋبليكا حالقى تىعىز ورنالاسقان وڭتۇستىك ايماقتاردان كوشىپ كەلۋشىلەردى ورنالاستىرۋدىڭ, جۇمىسپەن, باسپانامەن قامتاماسىز ەتۋدىڭ جەرگىلىكتى باعدارلاماسى جاسالىپ, جىل اياعىنا دەيىن 600 وتباسىن قابىلداۋ جوسپارلانعان. قازىر 78 وتباسىعا مەملەكەتتىك قارجىلاي كومەك كورسەتىلگەن. بىلتىر كۆوتاداعى 110 وتباسىنىڭ ورنىنا 130 وتباسى قابىلدانعان بولاتىن.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى سەرگەي ياكوۆەنكونىڭ ايتۋىنشا,
وڭىرلەردەن كوشىپ كەلۋگە نيەتتى ادامدارعا تەرىسكەيدە ءبىر مىڭعا جۋىق بوس جۇمىس ورنى قاراستىرىلىپ وتىر. 13 اۋداندا 700-دەي ءۇي ازىرلەنگەن. ءبىرىنشى كەزەكتە مۇعالىمدەرگە, دارىگەرلەرگە, جۇمىسشى ماماندىقتارىنا قاتتى زارۋلىك بايقالادى.
جۇمىسپەن قامتۋ جوباسى اياسىندا وڭىرارالىق ەڭبەك نارىعىن دامىتۋعا بەلسەنە قاتىسىپ, جەكە شارۋاشىلىعىن ۇرشىقشا ءۇيىرىپ جۇرگەندەردىڭ ءبىرى – شەراليەۆتەر وتباسى. «بەگاليەۆ اكبارالى» جەكە كاسىپكەرلىگىندە ەڭبەك ەتەتىن ءيۋسۋبالى بىلتىر وتباسىمەن قىزىلجار اۋدانىنىڭ سوكولوۆ اۋىلىنا كوشىپ كەلگەن. قازىر بۇل اۋلەتتەن سەگىز ادام 5,5 گەكتار جەرگە كوكونىس وسىرۋمەن اينالىسادى. بىلتىرعىداي بيىل دا شىعىم جاقسى. جيىن-تەرىم اياقتالعاننان كەيىن ءۇش جىلىجايدىڭ قۇرىلىسىنا كىرىسپەك ويلارى بار.
– وتكەن جىلى وڭتۇستىك قازاقستان وبلىسىنان 16 وتباسى, بيىل 7 وتباسى كوشىپ كەلدى. شاڭىراق يەسىنە 50, وتباسى مۇشەلەرىنە 35 ايلىق ەسەپتىك كورسەتكىش كولەمىندە ءبىر رەتتىك جاردەماقى تولەندى. بۇدان تىسقارى كوممۋنالدىق تولەمدەر مەن جالعا الۋ شىعىندارى دا وتەلەدى, – دەدى ءوز اڭگىمەسىندە قىزىلجار اۋداندىق جۇمىسپەن قامتۋ ورتالىعىنىڭ ديرەكتورى راۋشان تاكىباەۆا.
وڭتۇستىك جاقتان قونىس اۋدارۋشىلاردىڭ كاسىبى مەن ءناسىبىن قاتار الىپ جۇرۋىنە جان-جاقتى قامقورلىق جاساپ جۇرگەن «مامبەتوۆ جانە ك» كومانديتتىك سەرىكتەستىگىنىڭ باس ديرەكتورى ەركەبۇلان مامبەتوۆ سارىاعاش اۋدانىنان كەلگەن عاني جۇسىپبەكوۆتىڭ ەڭبەكقورلىعى مەن تىندىرىمدىلىعىنا ءدان ريزا. وتاعاسىعا دا, وتاناسىنا دا جۇمىس تاۋىپ بەرىپ, باسپانا, مال ساتىپ اپەرگەن. وتىنى, ءشوبى ءۇيۋلى. تۇڭعىشتارى ءبىرىنشى سىنىپقا بارسا, كىشىسى بالاباقشادا. سولتۇستىكتىڭ قىتىمىر اۋا رايىنا ۇيرەنىپ قالعان ولار كارتوپ ءوسىرىپ, نەسىبەلەرىن ايىرىپ وتىر. ەركەبۇلان نۇرماعامبەت ۇلى 3 ميلليون تەڭگە جەڭىلدىكتى نەسيە رەسىمدەپ, جەكە شارۋاشىلىعىن اشۋعا دا جاردەمدەسىپتى.
جۋىردا مامليۋت اۋدانىنىڭ لەنين ەلدى مەكەنىنە جامبىل وبلىسىنىڭ قورداي اۋدانىنان دۇنگەن اعايىنداردىڭ 13 وتباسى ورنالاسىپ, ولار كەلە سالىسىمەن بىردەن جەر وڭدەۋگە كىرىسىپ كەتتى. بارىنەن دە وقۋشىلارى ازايىپ, جابىلۋ قاۋپى ءتونىپ تۇرعان مەكتەپتىڭ ساقتالىپ قالعانى سۇيسىنتەدى.
كۇنگەي جۇرتىن تەرىسكەيگە قونىستاندىرۋ باعدارلاماسىنىڭ ورىندالۋى ايماق باسشىلىعىنىڭ ءجىتى نازارىندا تۇر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
