استانانىڭ ىرگەسىندەگى «قازانات» اتشابارىنداعى ەتنواۋىلعا قۇددى شىعىس قازاقستان كوشىپ كەلگەندەي. ءبارى وسىندا ءجۇر. كومەيى بۇلكىلدەگەن ءانشىڭىزدى دە, كۇيشىڭىزدى دە, مىڭ بۇرالعان ءبيشىڭىزدى دە, ون ساۋساعىنان ونەر تامعان قولونەرشىڭىزدى دە, بىلەكتى بالۋانىڭىزدى دا, جۇرەكتى اۋدارىقپاقشىڭىزدى دا وسى جەردەن كەزدەستىرۋگە بولادى. مۇنداعى ارنايى ازىرلەنگەن ارحەولوگيالىق كورمەدەن بەرەل, شىلىكتى قورعاندارىنان تابىلعان 3 مىڭعا جۋىق جادىگەرلەردى تاماشالاي الاسىز.
شىرايلى شىعىستىڭ تۇكپىر-تۇكپىرىنەن كەلگەن ايمان بوقباساروۆا, ايبىن جۇماتاي, گۇلنار قوجامجاروۆا, ناتاليا جۋكوۆا سىندى قولونەر شەبەرلەرىنىڭ كيىزدەن, اعاشتان, تەرىدەن جاسالىپ, شيدەن توقىلعان تۋىندىلارىنا تامسانىپ, وزدەرىمەن تىلدەسۋگە دە مۇمكىندىك بار. ەتنواۋىلدىڭ ءبىر تۇسىنان مۇزتاۋ, راحمان قاينارى, مارقاكول, قيىن كەرىش, سىبە كولدەرى, الاكول, جيدەباي, بۇقتىرما سۋ قويماسى سەكىلدى ءوڭىردىڭ كوركەم جەرلەرىنىڭ فوتوسۋرەتتەرىن كورۋگە بولادى. ەتنواۋىلدىڭ قاق ورتاسىنداعى التىباقان ماڭىنا كەلىپ, شىعىستىڭ بۇلبۇل كومەي انشىلەرىنىڭ اندەرىن تىڭداپ, وسكەمەن مەن سەمەيدەگى تەاتر اكتەرلەرىنىڭ ونەرىن تاماشالايمىن دەسەڭىز مارحابات. ال اتشابارعا بارساڭىز, اۋدارىسپاقتان ەلىمىزدىڭ 5 دۇركىن چەمپيونى, ازيا چەمپيونى ەرمەك جاپىشەۆ باستاعان, ەرزات ارعىنوۆ, ءادىل توكەشوۆ, فارحات قايىربەكوۆ سىندى قازاق كۇرەسى شەبەرلەرىنىڭ ۇلتتىق سپورت تۇرلەرىن پاش ەتكەن قان قىزدىرار كورسەتىلىمدەرىنىڭ ۇستىنەن تۇسەسىز. سونىمەن قاتار كۇن سايىن «بايتەرەك» مونۋمەنتى مەن «جاستار» ساياباعىندا شىعىس قازاقستاننان شىققان ونەر مايتالماندارىنىڭ كونتسەرتىن تاماشالاۋعا بولادى.
وبلىستىڭ ەلورداداعى مادەني كۇندەرى 25 شىلدەدە ەكسپو قالاشىعىنداعى «شىرايلى شىعىستان – اتاعى اسقاق استاناعا» اتتى گالا-كونتسەرتپەن تۇيىندەلمەك. بۇل شاراعا قازاقستاننىڭ حالىق ءارتىسى روزا رىمباەۆا باستاعان ءوڭىردىڭ وزگە دە شىعارماشىلىق ۇجىمدارى قاتىسادى.
رەتى كەلگەندە ايتا كەتەيىك, ەكسپو كورمەسى باستالعاننان بەرى ونى 36 700 شىعىسقازاقستاندىق تۇرعىن تاماشالاپ ۇلگەرىپتى. 23 شىلدەدەگى دەرەكتەرگە سۇيەنسەك, وبلىس كورمەنىڭ 89 700 بيلەتىن ساتىپ الىپتى. كورمەنى 26 000 بالا (ونىڭ 15 500-ءى از قامتىلعان وتباسىنان, 905-ءى – جەتىم, 3 750-ءى دارىندى جانە 4 9595-ءى كوللەدج ستۋدەنتتەرى) تاماشالايتىن بولادى. بۇل ماقساتتا وبلىستىق بيۋدجەتتەن 419 ميلليون تەڭگە قارجى قاراستىرىلىپتى.
ازامات قاسىم,
«ەگەمەن قازاقستان»
