سالتاناتتى كەشتىڭ اشىلۋىندا ءسوز العان قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى پرەزيدەنت نۇرسۇلتان نازارباەۆتىڭ فەستيۆال قاتىسۋشىلارىنا ارنايى جولداعان قۇتتىقتاۋ حاتىن وقىپ بەردى.
«سىزدەردى وسى فەستيۆالدىڭ اشىلۋىمەن قۇتتىقتايمىن. بۇل فورۋم قازاقستاننىڭ مادەني ومىرىندەگى ايتۋلى وقيعالاردىڭ ءبىرى ءارى ورتالىق ازياداعى باستى كينوفەستيۆال قاتارىنان سانالادى. اشىق كرەاتيۆ پەن ونىڭ تۇجىرىمداماسى وزىق تاجىريبەمەن جانە شىعارماشىلىق يدەيالارمەن تابىستى ءبولىسۋ ءۇشىن قولايلى جاعداي قالىپتاستىرادى. بيىل ەكسپو-2017 حالىقارالىق مامانداندىرىلعان كورمەسى اياسىندا ءوتىپ جاتۋىنىڭ سيمۆولدىق ءمانى بار. كورمەنىڭ «بولاشاقتىڭ ەنەرگياسى» اتتى تاقىرىبى كينوفورۋمنىڭ تەڭدەستىرىلگەن ءارى ۇيلەسىمدى الەم قۇرۋ جونىندەگى نەگىزگى ميسسياسىمەن ۇندەس. وسى كينو فورۋم وتاندىق كينەماتوگرافيانىڭ ودان ءارى دامۋى مەن تانىمالدىلىعىن ارتتىرۋدا. كينوفەستيۆالدە ءساتتى تۇساۋكەسەرلەر, جاڭا ەسىمدەر مەن قىزىقتى تۋىندىلار, ال كورەرمەندەرگە ۇمىتىلىماس جارقىن اسەرگە بولەنۋىن تىلەيمىن», دەلىنگەن پرەزيدەنت جولداعان حاتتا.
قازاقستاننىڭ حالىق ءارتىسى ايمان مۇساقوجاەۆا, كسرو حالىق ءارتىسى بيبىگۇل تولەگەنوۆا, ديماش قۇدايبەرگەنوۆتەر ونەر كورسەتىپ, جۇلدىزداردى حالىق زور قوشەمەتپەن قارسى الدى. بيبىگۇل تولەگەنوۆا مەن قۇمان تاستانبەك, مەرۋەرت وتەكەشوۆالار XIII حالىقارالىق «ەۋرازيا» كينوفەستيۆالىنىڭ ۇيىمداستىرۋ كوميتەتى تاعايىنداعان «كينەماتوگرافيا ونەرىنە قوسقان ۇلەسى ءۇشىن» اتتى ارنايى سىيلىققا يە بولدى. سىيلىقتى تابىستاعان امەريكالىق اكتەر نيكولاس كەيدج ونەردىڭ بارشاعا ورتاق ەكەنىن ايتادى.
– كينو – كوممۋنيكاتسيانىڭ امبەباپ ءتىلى. كينو ارقىلى بۇكىل الەمگە تاريحتى تارقاتا الامىز. كەرەك دەسەڭىز ءوز اسەرىمىزبەن ءبولىسىپ, ءبىر-ءبىرىمىزدى تۇسىنىسە الامىز. كينونىڭ ارقاسىندا مادەني توسقاۋىلداردى ەڭسەرە الامىز. بارشاڭىزعا راحمەت! – دەيدى «وسكار» سىيلىعىنىڭ لاۋرەاتى نيكولاس كەيدج.
كينوفەستيۆال كورسەتىلىمىنە الىس جانە جاقىن شەتەلدەر, قازاقستان مەن ورتالىق ازيادا تۇسىرىلگەن 296 فيلم ەنگەن. ولاردىڭ ىشىنەن ىرىكتەلىپ الىنعان 101 فيلم نەگىزگى كونكۋرسقا قاتىسادى. 14 ءفيلمنىڭ الەمدىك پرەمەراسى, 11 كينوتۋىندىنىڭ ازيالىق تۇساۋكەسەرى وتپەك. بۇلاردان بولەك كورەرمەن نازارىنا تاعى بىرنەشە باعدارلاما اياسىندا ءتۇرلى جانرداعى فيلمدەر ۇسىنىلماق. اتاپ ايتار بولساق, «استانا ەكسپو-2017» ۇلتتىق كومپانياسىمەن بىرىگىپ ۇيىمداستىرعان «6 پلازا» دامۋشى ەلدەر باعدارلاماسىنا 66 ەل قاتىسىپ, ەڭ ۇزدىك فيلمدەر انىقتالماق.
.jpg)
ايا ءومىرتاي,
سۋرەتتەردى تۇسىرگەن ورىنباي بالمۇرات,
"ەگەمەن قازاقستان"
