جاۋاپتى كەزدەسۋدە پاۆلودارلىق ۇجىمنىڭ باس باپكەرى نەگىزگى قۇرامعا وزگەرىس ەنگىزبەدى. كەزدەسۋدىڭ العاشقى مينۋتتارى جوعارى قارقىندا ءوتتى. جەرلەستەرىمىز بارىنشا ساق ويناۋعا تىرىسقانمەن, 10-مينۋتتا دوپ جىبەرىپ الدى. ايىپ سوققىسىنان ميتچەلل دونالد ءدال سوققى جاساپ, سەربيالىق ۇجىمدى العا شىعاردى. الاڭ يەلەرىنىڭ باسىمدىعى بىردەن بايقالماعانمەن, ويىن تىزگىنىن اقىرىنداپ ءوز قولدارىنا الا باستادى. ال «ەرتىستەن» ستەفان جيۆكوۆيچتىڭ بەلسەندىلىگى بايقالدى. پاۆلودارلىقتاردىڭ نەگىزگى شابۋىلى دا ءدال وسى جيۆكوۆيچتىڭ قاپتالى ارقىلى ءوربىپ جاتتى.
جەرلەستەرىمىز نامىسقا تىرىسىپ, تارازى باسىن تەڭەستىرۋدى كوزدەگەنمەن, الاڭ يەلەرى باسىمدىقتى جىبەرە قويمادى. 77-مينۋتتا سلاۆوليۋب سرنيچ سول قاپتالدان كەلگەن دوپقا ءبىرىنشى بولىپ جەتىپ, سوڭعى نۇكتەنى قويدى.
قوس كەزدەسۋدىڭ قورىتىندىسى بويىنشا جالپى ەسەپتە «تسرۆەنا زۆەزدا» 3:1 ەسەبىمەن باسىم ءتۇسىپ, كەلەسى كەزەڭگە جولداما الدى. پاۆلوداردا وتكەن ءبىرىنشى ماتچ 1:1 ەسەبىمەن تەڭ اياقتالعان بولاتىن.
