«وڭىردەن وسى كۇنگە دەيىن ونىڭ 2 مىڭنان استامى جەتكىنشەكتى كۇللى الەم كوز تىككەن كورمەگە اكەلىپ ۇلگەردىك. ال قالعانى قىركۇيەك ايىنا دەيىن استانانى جانە ەكسپو-نى تاماشالايتىن بولادى.
ساياحاتتىڭ العاشقى كۇنىن كورمەنىڭ باستى نىسانى «نۇر الەم» پاۆيلونىنان باستادىق. كەيىن شەت مەملەكەتتەردىڭ پاۆيلونىن ارالايمىز. جوسپارعا سايكەس, وقۋشىلارمەن ەكسپو-2017 كورمەسىندە ەكى كۇن بولامىز», دەيدى وڭتۇستىك قازاقستان وبلىستىق ءبىلىم باسقارماسى ۇيىمداستىرۋ ءبولىمىنىڭ باسشىسى ەردوس نىشانوۆ. ول جاسوسپىرىمدەردىڭ جول شىعىنىن مەملەكەت پەن دەمەۋشىلەر تاراپى كوتەرەتىندىگىن جەتكىزدى. وبلىستا 15 اۋدان بولسا, ونداعى دەمەۋشىلەر قايىرىمدىلىق شاراسىنا بەلسەندى اتسالىسۋدا.
«ەكسپو-2017 كورمەسىن تاماشالاۋ ءۇشىن وڭىردەگى الەۋمەتتىك از قامتىلعان وتباسىنداعى بالالار مەن وقۋدا وزات, قوعامدىق جۇمىستارعا بەلسەنە قاتىسقان ءارى ءبىلىمى مەن ونەگەلى تاربيەسى بار وقۋشىلارعا ارنايى جولداما بەرىلدى. وسىنداي جولمەن وقۋشىلاردى ىرىكتەپ الدىق», دەيدى ەردوس نىشانوۆ. ونىڭ ايتۋىنشا, وڭتۇستىكتىڭ وقۋشىلارى ەلورداعا ون اۆتوبۋسپەن كەلگەن. ءار اۆتوبۋستا ءبىر دارىگەردەن بار. ولار كەز كەلگەن ۋاقىتتا مەديتسينالىق كومەك كورسەتۋگە دايىن.
«مەن وڭتۇستىك قازاقستان وبلىسى تۇلكىباس اۋدانىنداعى ساكەن سەيفۋللين اتىنداعى №15 ورتا مەكتەپتە وقيمىن. بيىل 10-سىنىپتى ءبىتىرىپ, 11-سىنىپقا ءوتتىم. مەنىڭ ارمانىم باس قالامىزدا ءوتىپ جاتقان ەكسپو-2017 كورمەسىن تاماشالاۋ بولاتىن. بۇگىن سول ارمانىم ورىندالدى. مەن وتە قۋانىشتىمىن. ءبىز ءوز ساياحاتىمىزدى «نۇر الەم» پاۆيلونىنان باستادىق», دەدى ساياحاتشى ايگەرىم قۇرالبەك.
