«100 ناقتى قادام» ۇلت جوسپارىنىڭ ءبىرىنشى باعىتى كاسىبي مەملەكەتتىك اپپاراتتى قالىپتاستىرۋعا باعىتتالعان جانە 15 قادامنان تۇرادى, ولاردىڭ 11-ءى جۇزەگە اسىرىلدى, 3-ءۋى ورىندالۋدا, 1-ءۋى كەيىنگە قالدىرىلدى, دەدى اگەنتتىك توراعاسىنىڭ ورىنباسارى. تارقاتىپ ايتار بولساق, 1-قادام بويىنشا مەملەكەتتىك قىزمەتكە قابىلداۋ رەسىمدەرىن جاڭعىرتۋ قاجەت بولاتىن. مەملەكەتتىك قىزمەتكە قابىلداۋ تومەنگى لاۋازىمداردان باستالۋى ءتيىس. وسىلايشا, «100 ناقتى قادام» ۇلت جوسپارىن ىسكە اسىرۋ اياسىندا مانساپتىق مودەلگە كوشۋ جۇزەگە اسىرىلدى. بۇل مەملەكەتتىك قىزمەتكە قابىلداۋ راسىمدەرىن جاڭعىرتۋعا مۇمكىندىك بەردى. بۇعان دەيىن, مەملەكەتتىك قىزمەتكە العاش قابىلداناتىن تۇلعالار كەز كەلگەن بوس جۇمىس ورنىنا, ونىڭ ىشىندە باسشى لاۋازىمىنا ۇمىتكەر بولا الاتىن. جاڭا مودەلدە بۇل مۇمكىن بولمايدى. ەندى مەملەكەتتىك قىزمەتكە العاش قابىلداناتىن جانە جۇمىس تاجىريبەسى جوق تۇلعالار ءوز مانسابىن تەك تومەنگى لاۋازىمداردان عانا باستاي الادى. ال 2-قادام نەگىزىندە تومەنگى لاۋازىمدارعا كانديداتتاردى رەتتەۋ جانە ودان ءارى لاۋازىمدىق ءوسۋ ىسكەرلىك قاسيەتتەر نەگىزىندە جۇزەگە اسىرىلۋى تيىستىگى ايتىلعان. بۇل رەتتە مانساپتىق مودەلگە كوشۋمەن مەملەكەتتىك قىزمەتكە قابىلداناتىن ۇمىتكەرلەردىڭ زاڭداردى ءبىلۋى, قۇزىرەتتەرىنىڭ بولۋى باعالانادى. زاڭدا مەملەكەتتىك قىزمەتكەردى ونىڭ قۇزىرەتتەرىن ەسكەرە وتىرىپ, مەملەكەتتىك قىزمەتتە ىلگەرىلەتۋ قۇقىعى بەكىتىلگەن. ۇمىتكەرلەردى ىرىكتەۋ كەزىندە بىلىكتىلىك ءتاسىلىن ەنگىزۋ ءۇشىن جەكە قاسيەتتەردى اۆتوماتتاندىرىلعان باعالاۋ ازىرلەندى, وندا ۇمىتكەرلەردىڭ قاجەتتى قۇزىرەتتەرىنىڭ بار بولۋى تەكسەرىلەدى. سونداي-اق, كونكۋرس وتكىزۋ ەرەجەسىنە سايكەس كونكۋرستىق كوميسسيا ۇمىتكەرلەرمەن سۇحباتتاسۋ بارىسىندا جەكە قاسيەتتەردى باعالاۋ ناتيجەلەرىن ەسكەرۋى ءتيىس.
3-قادام – مەملەكەتتىك قىزمەت جانە جەمقورلىققا قارسى ءىس-قيمىل اگەنتتىگىنىڭ ءرولىن ارتتىرۋ ەسەبىنەن مەملەكەتتىك قىزمەتكە العاش رەت قابىلدانۋشىلاردى ىرىكتەۋ رەسىمىن ورتالىقتاندىرۋ, سونداي-اق, ءۇش ساتىلى ىرىكتەۋ جۇيەسىن ەنگىزۋ ماسەلەسى دە شەشىمىن تاپقان. 4-قادام – 3+3 فومۋلاسى بويىنشا مەملەكەتتىك قىزمەتكە ءبىرىنشى رەت قابىلدانۋشىلار ءۇشىن مىندەتتى تۇردە سىناق مەرزىمى بولىپ قابىلداندى. سىناق مەرزىمى اكىمشىلىك مەملەكەتتىك قىزمەتكە العاش قابىلدانعان مەملەكەتتىك قىزمەتكەرلەردىڭ, سونداي-اق, ورنالاسقان مەملەكەتتىك لاۋازىمدى توقتاتقاننان كەيىن اكىمشىلىك مەملەكەتتىك قىزمەتكە قايتا قابىلدانعانداردىڭ سايكەستىگىن تەكسەرۋ ماقساتىندا بەكىتىلگەن.
«5-قادام – مەملەكەتتىك قىزمەتكەرلەردىڭ جالاقىسىن قىزمەتىنىڭ ناتيجەسىنە بايلانىستى ءوسىرۋ جانە 6-قادام – مەملەكەتتىك قىزمەتكەرلەر ءۇشىن ەڭبەكاقىنى ناتيجە بويىنشا تولەۋگە كوشۋ مىندەتتەرى ورىندالۋدا», دەيدى سپيكەر. سونداي-اق, 7-قادام – مەملەكەتتىك قىزمەتكەرلەردىڭ لاۋازىمدىق ەڭبەكاقىلارىنا وڭىرلىك ۇيلەستىرۋ كوەففيتسيەنتتەرىن قوسۋ ماسەلەسى بويىنشا وڭىرلىك ۇيلەستىرۋ كوەففيتسيەنتتەرى بويىنشا تاسىلدەر پىسىقتالۋدا, ولاردى ەنگىزۋ قارجىلاندىرۋدى تالاپ ەتەتىن باستامالارعا موراتوريگە بايلانىستى كەيىنگە قالدىرىلعان. قازىر قازاقستان رەسپۋبليكاسى ورگاندارىنىڭ جۇمىسكەرلەرىنىڭ ەڭبەكاقىسىن تولەۋ جۇيەسىن جەتىلدىرۋ بويىنشا جۇمىس توبى قۇرىلعان.
«7-قادام اياسىندا حالىقارالىق وزىق تاجىريبەنى تالداۋ جۇرگىزىلدى. وندا لاۋازىمدىق قىزمەتاقىعا تۇزەتۋشى كوەففيتسيەنتتەر بەلگىلەۋدىڭ قولايلى تاسىلدەرى مەن ادىستەمەسى انىقتالدى», دەدى ا.شايىموۆا. ال 8-قادام – اۋىستىرىلاتىن مەملەكەتتىك قىزمەتكەرلەرگە لاۋازىمدىق مىندەتتەرىن اتقارۋ كەزەڭىندە ولارعا جەكەشەلەندىرۋ قۇقىعىنسىز قىزمەتتىك پاتەرلەردى مىندەتتى تۇردە بەرۋ تاپسىرماسى ورىندالعان. «قازاقستان رەسپۋبليكاسىنىڭ مەملەكەتتىك قىزمەت تۋرالى» زاڭىنا سايكەس مەملەكەتتىك قىزمەتكەرلەر باسقا جەرگە اۋىستىرۋ كەزىندە جەكەشەلەندىرۋ قۇقىعىنسىز قىزمەتتىك تۇرعىن ۇيمەن قامتاماسىز ەتىلەدى. «تۇرعىن ءۇي قاتىناستارى تۋرالى» زاڭعا سايكەس ۆەدومستۆولىق تۇرعىن ءۇي قورىنىڭ تۇرعىن ۇيلەرى لاۋازىمدىق مىندەتتەرىن ورىنداۋ كەزەڭىندە اۋىستىرۋ تارتىبىمەن قىزمەتكە تاعايىندالعان مەملەكەتتىك قىزمەتكەرلەرگە بەرىلەدى. 9-قادام – مەملەكەتتىك قىزمەتكەرلەردى تۇراقتى تۇردە وقىتۋ جۇيەسىن زاڭدى تۇردە بەكىتۋ – 3 جىلدا ءبىر رەت ولاردىڭ كاسىبي شەبەرلىگىن ارتتىرۋ بويىنشا دا جۇمىستار ورىندالعان. وسىعان سايكەس مەملەكەتتىك قىزمەتكەرلەردى ءۇش جىلدا كەمىندە ءبىر رەت وقىتۋ بەكىتىلگەن. 10-قادام – مەملەكەتتىك قىزمەتكەرلەردى مانساپتىق جوعارىلاتۋ ءۇشىن كونكۋرستىق نەگىزگە كوشۋ, سونداي-اق, «ب» كورپۋسىنىڭ جوعارى لاۋازىمدارىنا جىلجىتۋ تومەنگى لاۋازىمداعى مەملەكەتتىك قىزمەتكەرلەر قاتارىنان تەك قانا كونكۋرستىق نەگىزدە جىلجىتۋ ەسەبىنەن مەريتوكراتيا قاعيداتىن نىعايتۋ جونىندە دە ءبىراز جۇمىس اتقارىلىپ, مەجەلى مىندەت يگەرىلگەن. سونىمەن قاتار, 11-قادامدا قارالعان مىندەتتەر دە ورىندالعان. شەتەلدىك مەنەدجەرلەردى, جەكەمەنشىك سەكتوردىڭ جەكەلەگەن ماماندارىن, حالىقارالىق ۇيىمداردىڭ قىزمەتكەرلەرى بولىپ تابىلاتىن قازاقستان ازاماتتارىن مەملەكەتتىك قىزمەتكە جىبەرۋ جايى شەشىلگەن. ولاردى تاعايىنداۋ ەرەكشە تالاپتار جانە لاۋازىمداردىڭ جەكە كەستەسى بويىنشا جۇزەگە اسىرىلۋى مۇمكىن. بۇل قادام مەملەكەتتىك قىزمەتتى اشىق جانە باسەكەگە قابىلەتتى جۇيە ەتپەك.
12-قادام – جاڭا ەتيكالىق ەرەجەلەردى ەنگىزۋ. بۇل رەتتە مەملەكەتتىك قىزمەتتىڭ جاڭا ەتيكالىق كودەكسىن جاساۋ, ەتيكا ماسەلەلەرى جونىندەگى ۋاكىلەتتى وكىل لاۋازىمىن ەنگىزۋ جۇمىستارى قولعا الىندى. قادامدى ىسكە اسىرۋ ماقساتىندا جاڭا زاڭدا ەتيكا ماسەلەسىنە جەكە تاراۋ ارنالعان, پرەزيدەنت جارلىعىمەن مەملەكەتتىك قىزمەتكەرلەردىڭ جاڭا ەتيكالىق كودەكسى بەكىتىلگەن.
13-قادام – جەمقورلىققا قارسى كۇرەستى كۇشەيتۋ, سونىمەن بىرگە, جاڭا زاڭنامالار ازىرلەي وتىرىپ, مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگىنىڭ قۇرىلىمىندا جەمقورلىق قۇقىق بۇزۋشىلىقتىڭ جۇيەلى تۇردە الدىن الۋ جانە ساۋىقتىرۋ ءۇشىن جەمقورلىققا قارسى ارنايى ءبولىم قۇرۋ تاپسىرماسىن ورىنداۋ اياسىندا «سىبايلاس جەمقورلىققا قارسى ءىس-قيمىل تۋرالى» جاڭا زاڭ قابىلداندى, ول سىبايلاس جەمقورلىققا قارسى ءىس-قيمىل سالاسىنداعى قوعامدىق قاتىناستاردى رەتتەيدى جانە سىبايلاس جەمقورلىققا قارسى ساياساتتى ىسكە اسىرۋعا باعىتتالعان.
بارلىق مەملەكەتتىك ورگاندارعا, ونىڭ ىشىندە قۇقىق قورعاۋ ورگاندارىنىڭ بارلىق قىزمەتكەرلەرىنە قاتىستى مەملەكەتتىك قىزمەت تۋرالى جاڭا زاڭ قابىلداۋ جۇمىستارى دا ماجەسىنە جەتتى. بۇل – ۇلت جوسپارىنداعى 14-قادام. وسىعان سايكەس «مەملەكەتتىك قىزمەت تۋرالى» قازاقستان رەسپۋبليكاسىنىڭ زاڭى قۇقىق قورعاۋ ورگاندارىنىڭ قىزمەتكەرلەرىنە دە تارالادى. ەندىگى قۇقىق قورعاۋ ورگاندارىنا ۇمىتكەرلەر مەن مەملەكەتتىك قىزمەتكەرلەر اگەنتتىكتە باستاپقى ىرىكتەۋدەن وتەدى. 15-قادام بويىنشا مەملەكەتتىك قىزمەت تۋرالى جاڭا زاڭ قابىلدانعاننان كەيىن ءىس باسىنداعى مەملەكەتتىك قىزمەتكەرلەردى كەشەندى اتتەستاتتاۋدان وتكىزۋ, كاسىبي تالاپتاردى كۇشەيتۋ جانە ەڭبەكاقى تولەۋدىڭ جاڭا جۇيەسىن ەنگىزۋ جۇمىستارى جۇرگىزىلۋدە. زاڭنىڭ 63-بابىنا سايكەس, اكىمشىلىك مەملەكەتتىك قىزمەتكەرلەردى اتتەستاتتاۋ پرەزيدەنت شەشىمى بويىنشا جۇرگىزىلەدى, ول ونىڭ ءتارتىبىن, مەرزىمىن جانە اتتەستاتتاۋدان ءوتىپ جاتقان مەملەكەتتىك قىزمەتكەر ساناتىن انىقتايدى.
مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ا.شايىموۆانىڭ ايتۋىنشا, جالپى, مەملەكەتتىك قىزمەتتىڭ تارتىمدىلىعى ارتىپ كەلەدى. رەفورمانى ىسكە اسىرعاننان باستاپ مانساپتى تومەنگى ساتىدان باستاعان تۇلعالاردىڭ ءۇش ەسە ارتقانى بايقالعان. ارينە, كاسىبي مەملەكەتتىك اپپاراتتى قالىپتاستىرۋ جۇمىستارى ءالى دە جالعاسىن تاپپاق.
دينارا بىتىك,
«ەگەمەن قازاقستان»
