ەلوردا تىنىشتىعى مەن «ەكسپو-2017» كورمەسى كەزىندەگى قوعامدىق ءتارتىپ پەن قاۋىپسىزدىكتى كۇشەيتۋ ماقساتىندا ۇلتتىق ۇلاننىڭ وڭىردەگى بولىنىستەرىنەن قوسىمشا كۇش جۇمىلدىرىلعان بولاتىن. اتاپ ايتساق, 5510 (كوكشەتاۋ ق.), 5512 (پاۆلودار ق.), 5516 (تەمىرتاۋ ق.) جانە 5451 (قاراعاندى ق.) اسكەري بولىمدەرىنەن مىڭعا جۋىق اسكەري قىزمەتشى كۇشەيتىلگەن قىزمەتتى اتقارۋ ءۇشىن 25-مامىردا استانا قالاسىنا ارنايى كەلگەن ەدى. اتىلمىش توپتار ۇلتتىق ۇلاننىڭ ەلوردا ىرگەسىندەگى جەدەل ماقساتتاعى قۇراماسىنا شوعىرلانىپ, كورمەنىڭ اشىلۋ ساتىنەن بەرى قوعامدىق ءتارتىپ كۇزەتى بويىنشا ۇزدىكسىز قىزمەت اتقارىپ كەلەدى.
5573 اسكەري بولىمىندە تاياۋدا عانا انت قابىلداپ, ارنايى دايىندىقتان وتكەن جاس شاقىرىلىم جاۋىنگەرلەرى الداعى اپتادان باستاپ قالا تىنىشتىعىن كۇزەتۋ قىزمەتىنە كىرىسەدى. وسىعان وراي, «شىعىس» وڭىرلىك قولباسشىلىعىنا قاراستى 5512 اسكەري ءبولىمىنىڭ جاۋىنگەرلەرى استاناداعى قىزمەتىن اياقتاپ, 27-شىلدە كۇنى پاۆلودار قالاسىنا ورالماق. ەكى ايعا جۋىق «ەكسپو-2017» قالاشىعىندا قاۋىپسىزدىكتى قامتاماسىز ەتكەن شىعىستىق ۇلاندار بۇگىن كورمەمەن تانىسۋعا مۇمكىندىك الدى.
-ءبىز جارتى جىل بۇرىن ۇلتتىق ۇلاننىڭ پاۆلودار قالاسىنداعى اسكەري بولىمىنە وتان الدىنداعى بورىشىمىزدى وتەۋگە كەلگەنبىز. ەلىمىزدەگى ۇلكەن شارانى كوزبەن كورەمىز دەگەن جوسپار بولماعان. الايدا, وسىنداي جاۋاپتى مىندەتتى اتقارىپ, كورمەنىڭ ءساتتى وتۋىنە از بولسا دا ۇلەس قوسقانىمىزدى ۇلكەن ماقتانىش سانايمىز. كورمەنىڭ قالاشىعى وتە ۇنادى, الەمدىك دەڭگەيدەگى بۇل شارانى – كەمەل كەلەشەك ءۇشىن, ۇرپاقتىڭ باقىتتى ءومىر ءسۇرۋى ءۇشىن جاسالعان زور مۇمكىندىك دەپ ەسەپتەيمىن. وسىنداعى قىزمەتتى ساپالى ورىنداۋعا جاعداي جاساعان جەدەل قۇراما باسشىلىعىنا دا العىس ايتامىز, دەيدى قاتارداعى جاۋىنگەر شەريازدانوۆ رۋسلان اسەرىمەن ءبولىسىپ.
جاۋىنگەرلەر ۇلتتىق پاۆيلوننان باستاپ, كوپتەگەن ەلدەردىڭ جارقىن بولاشاق جولىنداعى جوسپارلارىمەن, ناقتى قادامدارىمەن تانىستى. جاڭارمالى ەنەرگيانىڭ بالامالى كوزدەرىن پايدالانۋدىڭ جانە «جاسىل تەحنولوگيالاردى», ەنەرگەتيكالىق رەسۋرستاردى ءتيىمدى تۇتىنۋدىڭ قىر-سىرىنا قانىقتى. ەلىمىزدىڭ ەكونوميكالىق جانە ينفراقۇرىلىمدىق تۇرعىدان دامۋىنا ۇلەس قوساتىن ءىرى نىسانداردى, اقپاراتتىق-پرەزەنتاتسيالىق الاڭداردى تاماشالادى.
