«وزگەرىستەر كەزەڭ-كەزەڭىمەن جۇزەگە اسىرىلادى. جاڭا مينيسترلىك الداعى جىلدىڭ ءبىرىنشى جارتىسىندا قۇرىلىپ ءبىتۋى ءتيىس», – دەپ مالىمدەدى ۇكىمەت باسشىسى بۇگىنگى وتكەن ءباسپاسوز كونفەرەنتسياسىندا. ول سونداي-اق جاڭا ۆەدومستۆونى باسقارۋدى قازىرگى كوشى-قون جانە شەكارالاردى قورعاۋ ءمينيسترى پيتەر داتتونعا تاپسىرعانىن اتاپ ءوتتى.
قازىردىڭ وزىندە جەرگىلىكتى باق وكىلدەرى اۆستراليانىڭ جاڭا ىشكى ىستەر مينيسترلىگىن «قاۋىپسىزدىك سۋپەرمينيسترلىگى» دەپ اتاپ كەتتى. ونىڭ قۇرامىنا كوشى-قون مەن شەكارالىق باقىلاۋ قىزمەتتەرى, فەدەرالدى پوليتسيا, اۆستراليانىڭ قاۋىپسىزدىك جانە بارلاۋ قىزمەتى, ۇلتتىق قارجىلىق باقىلاۋ قىزمەتى, سونداي-اق وزگە دە بىرقاتار قۇقىق قورعاۋ ۆەدومستۆولارى مەن ارنايى قىزمەتتەر كىرەدى. ۇكىمەت باسشىسى بارلىق اتالعان ۆەدومستۆولاردىڭ قۇرىلىمدارى ساقتالاتىنىن, ال مينيستر ولاردىڭ قىزمەتىن ۇيلەستىرىپ وتىراتىنىن جەتكىزدى.
«رەفورما ءبىزدىڭ جۇيەمىز بۇزىلعاندىقتان جۇرگىزىلىپ وتىرعان جوق, بۇل قاجەتتىلىك قاۋىپسىزدىك سالاسىنداعى احۋالدىڭ جىلدام وزگەرىپ جاتقانىنان تۋىنداپ وتىر. زاماناۋي سىن-قاتەرلەرگە توتەپ بەرۋ ءۇشىن بارىنشا ءتيىمدى قۇرىلىم قاجەت», – دەدى ول.
