كۇي اتاسىنا قۇرمەت

قۇرمانعازى ساعىرباي ۇلى بوكەي ورداسى, بەكەتاي قۇمىنىڭ جيدەلى دەگەن جەرىندە ءدۇ­نيەگە كەلگەن. ول مەكەن قازىر اتىراۋ وبلىسى, قۇرمانعازى اۋدانى اتالادى. ۇلى كۇيشى بۇل كۇندەرى رەسەيدەگى استراحان وبلىسىنىڭ ۆولودار اۋدانىنداعى «التىن­جار» دەگەن جەردە ماڭگىلىك ۇي­قىدا جاتىر. ءبى­راق قاي جەردە دە كۇي اتاسىنا دەگەن قۇرمەتتە شەك جوق. كۇي اتاسىنىڭ بەينەسىن ماڭعىستاۋلىق اقيىق اقىن, جۇيرىك جىراۋ قاشاعان كۇرجىمان­ ۇلىنىڭ 170 جىلدى­عىندا اسەم اقتاۋداعى ورتالىق الاڭعا قاتارلاستىرا ورنالاستى­رۋدىڭ دا ءمانى بار. قۇرمانعازى وردانىڭ تۇرمەسىنەن قاشىپ شىعىپ جايىقتى جاعالاپ, جەم, ساعىز وزەندەرىنەن ءوتىپ, ماڭعىستاۋ مەن ءۇستىرتتى بەس جىلداي ارالايدى. اقىن قاشاعانمەن كەزدەسەدى. ەكى الىپ قاتار ءجۇرىپ, اۋىل-ەلدى ارالاپ, حالىققا رۋحاني قۋات بەرەدى. ماڭ­عىستاۋ ساپارىندا قۇرمانعازىنىڭ ايگىلى «تورە­مۇرات», «اقساق كيىك», «بالقاي­ماق», «اداي» كۇيلەرى ومىرگە كەلەدى. ەكى الىپتىڭ ءورشىل ونەرى مەن دوستىعىن حالقىمىزدىڭ قۇلاگەر اقىنى ءىلياس جانسۇگىروۆ: اتىراۋ – الىس بىزگە جەردىڭ ءتۇبى, قاشاعان – جۇيرىك جىراۋ, ەلدىڭ ءتىلى, شاشقاندا كۇيدەن كوبىك قۇرمانعازى قاشاعان جىردان توككەن مارجان ءدۇردى, – دەپ جىرعا قوسقان ەمەس پە؟! مىنە, ەندى اقتاۋدا وبلىس, قالا باسشى­لارىنىڭ باستاۋىمەن, ايماق ازاماتتارىنىڭ قوستاۋىمەن كۇي اتاسىنىڭ ەڭسەلى ەسكەرتكىشى بوي كوتەردى. بيىكتىگى بەس مەتر بولاتىن ءمارمار تاستىڭ ۇستىندەگى قۇرمانعازىنىڭ بەينەسىن سومداعان ماڭعىستاۋلىق تالانتتى ءمۇسىنشى كوشەر بايعازى ۇلى. سالتاناتتى ساتتە وبلىس اكىمى قىرىمبەك كوشەرباەۆ, قازاقستاننىڭ حالىق جازۋشىسى, ەڭبەك ەرى ءابىش كەكىل­باي ۇلى الەمدىك مۋزىكا مادە­نيەتىنە ولشەۋسىز ۇلەس قوسقان ۇلى بابامىز تۋرالى تەرەڭنەن تولعاي اسەرلى اڭگىمەلەدى. ايتىستىڭ اقتاڭگەرى مەلس قوسىمباەۆ جىردان شاشۋ شاشىپ, وبلىستىڭ ءار ايماعىنان كەلگەن ونەرلى جاستار مەرەكەلىك كونتسەرت كورسەتتى. جولامان بوشالاق.