«ياندەكس.تاكسي» كومپانياسىنىڭ باس ديرەكتورى تيگران حۋداۆەردياننىڭ ايتۋىنشا بىرىككەن پلاتفورما ماۋسىم ايىندا التى ەلدىڭ 127 قالاسىندا قۇنى 7,9 ميلليارد رۋبل بولاتىن 35 ميلليون رەت قىزمەت كورسەتكەن.
«2011 جىلى «ياندەكس.تاكسي» قۇرىلعالى بەرى سەرۆيسكە بىرنەشە مىڭ كولىك جۇرگىزۋشىلەرى تىركەلدى. ءبىز رەسەي مەن وزگە بەس ەل ىشىندە تابىسقا جەتكەن جوباعا اينالدىق. بۇل ونداعان ميلليون ادامداردىڭ سەنىمىنە كىرۋگە مۇمكىندىك بەردى. جۇمىسىمىزدىڭ Uber-مەن بىرگە جالعاسۋىنا قۋانىشتىمىز», دەيدى تيگران حۋداۆەرديان.
تاكسي قىزمەتىنە تاپسىرىس بەرۋدى ادەتتەگىدەي ەكى قوسىمشا ارقىلى جاساۋعا بولادى. ال جۇرگىزۋشىلەر بىرىڭعاي پلاتفورماعا بىرىگەدى. باس ديرەكتوردىڭ سوزىنشە, بۇل شارا كولىك سانىن كوبەيتىپ, تاپسىرىس كۇتۋ ۋاقىتىن ازايتۋعا كومەكتەسەدى. كومپانيالار ءوزارا روۋمينگتىك كەلىسىمشارتىنان سوڭ, Uber قوسىمشاسىنان «ياندەكسكە» جانە كەرى تاپسىرىس بەرۋگە بولادى.
Uber مەن «ياندەكس.تاكسي» ورتاق كومپانياعا 225 جانە 100 ميلليون قارجى قۇيعان. بيزنەستىڭ 59,3 پايىزى «ياندەكسكە», 36,6 پايىزى Uber-گە جانە 4,1 پايىزى قىزمەتكەرلەرگە تيەسىلى بولادى. قۇزىرلى مەكەمەلەر كەلىسىمدى 2017 جىلدىڭ ءتورتىنشى توقسانىندا جاساپ ءبىتىرۋى قاجەت.
سونىمەن قاتار, جۋىردا ماسكەۋدە ىسكە قوسىلعان UberEATS تاماق جەتكىزۋ قىزمەتى جاڭا كومپانيانىڭ ىشىندە جۇمىسىن جالعاستىرادى. ەندى Uber شىعارعان سەرۆيستە «ياندەكس.كارتا» تەحنولوگياسى قولدانىلادى.
رەسمي اقپاراتتارعا جۇگىنسەك, «ياندەكس.تاكسي» مەن Uber ونلاين-ساپارلاردىڭ تاريفتەرى تۋرالى ناقتى كەلتىرىلمەگەن. تەك TJournal پورتالىندا كومپانيا وكىلدەرىنىڭ ايتۋىنشا, تاريفتەر قۇنىنا ايتارلىقتاي وزگەرىستەر ەنگىزىلمەيدى.
كومپانيا ءباسپاسوز قىزمەتىنىڭ حابارلاۋىنشا, «ياندەكس.تاكسي» جۇرگىزۋشىلەرىنىڭ سانى كوبەيگەندىكتەن, قىزمەت قۇنىن ارتتىرۋ كوەففيتسيەنتى سالىستىرمالى تۇردە از قولدانىلۋى مۇمكىن.
ەستەرىڭىزگە سالا كەتەيىك, بيىل 13 شىلدەدە «ياندەكس.تاكسي» مەن Uber كومپانيالارى بىرىگەتىندىكتەرىن جاريالادى. بۇل جاڭالىقتان كەيىن ماسكەۋ بيرجاسىنداعى «ياندەكستىڭ» اكتسيالارى 20 پايىزعا وسكەن.
اقپارات: Uber كومپانياسى 2009 جىلى قۇرىلعان. قازىر الەمنىڭ 470 قالاسىندا تارالعان. ال قازاقستاندا 2016 جىلدىڭ ماۋسىم ايىندا ىسكە قوسىلعان.
2011 جىلى قۇرىلعان «ياندەكس.تاكسي» كومپانياسى الەمنىڭ 108 قالاسىندا قىزمەت كورسەتەدى. ەلىمىزدە 2016 جىلدان باستاپ جۇمىس ىستەپ كەلەدى. ازىرگە كومپانيالار ەلىمىزدىڭ ەكى ءىرى قالاسى – الماتى مەن استانادا عانا قىزمەت كورسەتەدى.
ايگۇل شەرنياز,
«ەگەمەن قازاقستان»
