پولشانىڭ ەكونوميكانى دامىتۋ ۆيتسە-ءمينيسترى يادەۆيكا ەميلوۆيچ قازاقستاننىڭ دامۋى قارقىنىن جوعارى باعالاپ, ارىپتەستىكتىڭ ەكى ەلگە دە ءتيىمدى ەكەنىنە توقتالدى.
«قازاقستان نارىعى ‒ ءبىز ءۇشىن وتە ۇلكەن ءارى قىزىقتى. پولياكتاردىڭ قازاق جەرىنە بۇرىننان كەلگەنىن تاريحتان بىلەمىز. الايدا قازىرگى تاڭدا قازاقستان ‒ تاريحي عانا ەمەس, بولاشاقتىڭ مەكەنى. سوندىقتان, ءبىز ءوزىمىزدىڭ كاسىپكەرلەردى ونىمدەرىن قازاقستانعا اكەلىپ قويماي, وسىندا ينۆەستيتسيا قۇيۋعا شاقىرامىز», ‒ دەيدى يادەۆيكا ەميلوۆيچ.
ەلدەگى ينۆەستورلار احۋالىن باقىلاۋ ءۇشىن كەلگەن دەلەگاتسيا قۇرامىندا ەكونوميكا دامۋ ۆيتسە-مينيسترىنەن بولەك, ءتۇرلى سالانىڭ ۇزدىكتەرى دە بار. ماسەلەن, تەمىر جول سالاسىنىڭ ۇزدىگى اتانعان PESA كومپانياسىنىڭ وكىلى دە وسى جولى استاناعا ات باسىن بۇرىپتى. يادەۆيكا ەميلوۆيچ مۇنىڭ ءوز سەبەبى بار ەكەنىن ايتادى. پولشا كەلەشەكتە جاڭا «جىبەك جولىنىڭ» نەگىزگى ءبىر تارماعى بولۋدى كوزدەيدى. وسى ورايدا, PESA-نىڭ قوسار ۇلەسى مول.
«پولشادان كەلگەن دەلەگاتسياعا ينۆەستورلارعا جاسالعان جاعدايلار مەن جەڭىلتىكتەر تۋرالى تانىستىرىپ جاتىرمىز. ماسەلەن, جەر بەرۋ, ينفوقۇرىلىم ماسەلەسى تۋرالى ايتىپ, سالىقتان بوساتىلاتىن تۇسىندىردىك. الايدا مۇنداي جەڭىلدىككە يە بولۋ ءۇشىن ولار استانا قالاسىنىڭ اكىمدىگىنە نە «Astana Invest» كومپانياسىنا حابارلاسۋى ءتيىس», ‒ دەيدى «Astana Invest» ۇلتتىق كومپانياسىنىڭ ينۆەستورلارعا قىزمەت كورسەتۋ ورتالىعىنىڭ ديرەكتورى اباي قوجامجاروۆ.
جەڭىلدىك الۋعا مۇددەلى ينۆەستوردىڭ ۇسىنىسى قاناعاتتاندىرىلسا, ونى استاناداعى ارنايى ەكونوميكالىق ايماققا مۇشەلىككە قابىلدانادى. سونداي-اق, ينۆەستورلاردىڭ ءونىمىن سىرتقا ەكسپورتتاۋ ماسەلەسى دە قارالعان. اباي قوجامجاروۆتىڭ ايتۋىنشا, استانا قالاسى بويىنشا 60-قا جۋىق جوبا ۇسىنۋعا دايىن تۇر. الدا-جالدا پولشالىق دەلەگاتسيانىڭ كوڭىلىنەن شىقسا, ەكى جاقتى كەلىسىمگە دە قول قويىلۋى ىقتيمال.
دەلەگاتسيانىڭ مالىمەتىنە سۇيەنسەك, پولشا تاراپى حيميالىق ءونىم شىعارۋ, جيھاز جاساۋ سەكىلدى وزدەرىنىڭ وڭ جامباسىنا كەلەتىن سالالارعا دەن قويۋدى جوسپارلاپ وتىر. يادەۆيكا ەميلوۆيچتىڭ ايتۋىنشا, پولشالىق ونىمدەردىڭ ساپاسى جوعارى, باعاسى دا ەكى تاراپقا قولايلى ەكەن.
«دەلەگاتسيا قازاقستاننىڭ ۇسىنىسىنا قاتتى قىزىعىپ وتىر. ءتىپتى, مۇنى ءبىز دە كۇتكەنىمىز جوق. ماسەلەن, «سەلەنا» مەن «پولفارما» كومپانيالارى قازاقستاندا ءساتتى جۇمىس ىستەپ جاتىر», ‒ دەيدى پولشانىڭ ەكونوميكانى دامىتۋ ۆيتسە-ءمينيسترى.
«Selena Group» وندىرىسىمەن تانىسقان دەلەگاتتار ينۆەستورعا جاسالعان جاعدايدى جوعارى باعالادى. جالپى بۇل كومپانياعا ينۆەستيتسيا قۇيۋ جۇمىسى 2013 جىلى باستالعان-دى. جوبا قۇرىلىسى 2014 جىلى باستالىپ, وعان 6 ميلليون اقش دوللارى سالىنعان ەدى. بىلتىردان بەرى زاۋىت حيميالىق قۇرىلىس قوسپالارىن شىعارىپ كەلەدى. جوبانىڭ ءوندىرىس قۋاتى وراسان. ماسەلەن, زاۋىت جىلىنا 120 مىڭ توننا قۇرعاق قۇرىلىس قوسپاسىن جانە 10 مىڭ توننا ديسپەرسيالىق قوسىندى وندىرۋگە قابىلەتتى. جوبا ىسكە قوسىلعالى بەرى جاڭا 70 جۇمىس ورنى اشىلدى. «Selena Group»-تىڭ قۋاتى قازاقستانداعى قۇرىلىس نارىعىنىڭ 20 پايىزىن قوسپامەن قامتاماسىز ەتۋگە جەتكىلىكتى. سونىمەن قاتار, ەلىمىزدىڭ 8 قالاسىندا جەتكىزۋ جۇيەسى اشىلعان.
اباي اسانكەلدى ۇلى,
«ەگەمەن قازاقستان»
