حالىقتى تۇراقتى ءارى ساپالى ەلەكتر ەنەرگياسىمەن قامتيتىن سۋ ەلەكتر ستانتسياسىنىڭ اشىلۋ سالتاناتىنا وبلىس اكىمى جانسەيىت تۇيمەباەۆ پەن «اقسۋ-ەنەرگو» جشس-ءنىڭ ديرەكتورى اناربەك ورمان قاتىستى.
«اقسۋ ەنەرگو» جشس-ءنىڭ بۇل جوباسى «بيزنەستىڭ جول كارتاسى 2020» باعدارلاماسى اياسىندا قولداۋ تاپقان. بۇل ستانتسيا جىلىنا 2,5 مۆت ەلەكتر قۋاتىن وندىرۋگە قاۋقارلى. جوبا قۇنى 283 ملن.تەڭگە بولاتىن كاسىپورىندا 6 ادام جۇمىسپەن قامتىلعان.
وبلىستا كۇن, جەل, سۋ ەنەرگياسىنىڭ الەۋەتى جوعارى ەكەنىن ايتقان اكىم, ءداستۇرلى ەنەرگيا كوزدەرىمەن قاتار, جاڭا ەنەرگەتيكانى دا دامىتۋ قاجەتتىگىن اتاپ ءوتتى.
«وزدەرىڭىزگە بەلگىلى, بيىل استانا قالاسىندا «بولاشاق ەنەرگياسى» تاقىرىبىندا ەكسپو-2017 حالىقارالىق مامانداندىرىلعان كورمەسى ءوتىپ جاتىر. الەمدىك دەڭگەيدە وتكىزىلىپ جاتقان ەكسپو-2017 حالىقارالىق كورمەسى تەحنيكالىق جەتىستىكتەرمەن, جاڭعىرمالى ەنەرگيا كوزدەرىنىڭ مولدىعىمەن, عىلىمعا ۇمتىلۋدىڭ ماڭىزدىلىعىمەن بۇكىل الەمنىڭ نازارىن اۋدارۋدا. مەملەكەت باسشىسى ن.ءا.نازارباەۆ 2050 جىلعا دەيىن جاڭعىرامالى ەنەرگيا ۇلەسىن 50 پايىزعا دەيىن كوبەيتۋدى قامتاماسىز ەتۋدى تاپسىردى. بۇگىنگى ىسكە قوسىلعان ەلەكتر ستانتسياسى تازا ەلەكتر ەنەرگيا وندىرۋمەن قاتار, ەنەرگو رەسۋرستاردى ۇنەمدەۋگە باعىتتالعان»,-دەدى اكىم ءوز سوزىندە.
جالپى «جاسىل ەكونوميكاعا» كوشۋ جونىندەگى تۇجىرىمداماعا سايكەس, سايرام اۋدانىندا 2 جوبا ىسكە قوسىلىپ وتىر.
«اقسۋ ەنەرگو» جشس-ءى 2014 جىلى «كۇن نۇرىنان ەلەكتر قۋاتىن وندىرەتىن قۋاتتىلىعى 1مۆت بولاتىن «اقباي» ەلەكتر ستانتسياسىن ىسكە قوسقان بولاتىن. قۇنى 300 ملن.تەڭگە بولاتىن ەلەكتر ستانتسياسى 2016 جىلى 987,166 مۆت ەنەرگيا كوزىن وندىرگەن.
ەكى جوبا تولىق قۋاتتىلىقتا جۇمىس ىستەگەندە اۋداننىڭ ەنەرگيا كوزىنە دەگەن سۇرانىسىنىڭ التىدان ءبىرىن قامتيتىن بولادى.
