ءبىز ءومىردىڭ اششى-تۇششىسىن تاتقان ۇرپاقپىز. حح عاسىردىڭ بارلىق زوبالاڭى باسىمىزدان ءوتتى دەسەم وتىرىك بولماس. كەشەگى ۇلى وتان سوعىسىندا ەتىگىمىزبەن قان كەشىپ ءجۇرىپ تۋعان جەرىمىزدى قورعادىق. ودان كەيىنگى جىلداردا دا بەل جازباي ەڭبەك ەتتىك. قۇرىلىس سالاسىندا ەڭبەك جولىمىزدى قاراپايىم جۇمىسشىدان باستاپ, سوڭىندا مەملەكەت ءۇشىن ماڭىزدى قىزمەتتەرگە دەيىن اتقاردىق. ءبىز ادال ەڭبەك, ماڭداي تەرمەن تاپقان ناننىڭ ءتاتتى بولاتىنىن جان-تانىمىزبەن ۇعىپ وسكەن ۇرپاقپىز.
قانداي قيىنشىلىقپەن وتكىزسە دە اركىمگە ءوزىنىڭ جاستىق شاعى قىمبات قوي. بىراق شىنىمىزدى ايتايىق, توقساننان اسقان ءبىز ءۇشىن ءدال وسى كەزەڭنىڭ, ءدال وسى كۇندەردىڭ قادىرى ەرەكشە بولىپ تۇر. «اتتەڭ, باياعى جاس كۇنىمىز بولسا, تاريحتىڭ جاڭا بەتتەرىنە جازىلىپ جاتقان بۇگىنگى جاسامپاز وقيعالاردىڭ بەل ورتاسىندا جۇرەر ەدىك!» دەپ قويامىز. ەلدە, سونىڭ ىشىندە ءبىزدىڭ باتىس قازاقستان وڭىرىندە جاسالىپ جاتقان ءاربىر وڭ وزگەرىسكە بالاشا قۋانامىز!
ءوزىمىز توپىراعىن باسىپ, اۋاسىن جۇتىپ جۇرگەن اقجايىق وڭىرىندەگى احۋالدى عانا ايتايىقشى: بيىل باتىس قازاقستان وبلىسىندا «نۇرلى جول» باعدارلاماسى اياسىندا 33 جوبا جۇزەگە اسىرىلىپ جاتىر ەكەن! وبلىس تۇرعىندارىنىڭ 93 پايىزدان استامى تابيعي گازدىڭ يگىلىگىن كورىپ وتىر. بيىل تاعى دا 35 ەلدى مەكەنگە گاز قۇبىرى تارتىلماق. ورال ءوڭىرى تەزەك تاسىپ, كۇل شىعارۋ بەينەتىنەن مۇلدەم قۇتىلدى دەسە دە بولادى. ۇيگە كىرگەن تابيعي گاز – وركەنيەتتىڭ ءوزى ەمەس پە؟ وسى گازدىڭ ارقاسىندا قازىر قالاداعى ءۇي مەن اۋىلداعى ءۇيدىڭ ەش ايىرماسى بولماي قالدى.
ازۋىن ايعا بىلەپ, عارىشقا ادام ۇشىرعان كەڭەس وداعى تۇسىندا دا باتىس قازاقستان وبلىسىندا جول ماسەلەسى قيىن جاعدايدا بولىپ ەدى. قازىر شە؟! بيىلدىڭ وزىندە ءبىزدىڭ وڭىردە 500 شاقىرىم جول جاڭادان سالىنىپ جاتىر! ونىڭ 200 شاقىرىمى – رەسپۋبليكالىق ماڭىزى بار باعىتتار. جول قۇرىلىسى اسا قىمبات, قارجىنى كوپ قاجەتسىنەتىن سالا عوي. مۇنىڭ ءبارىنىڭ رەسپۋبليكا قازىناسىنان ءبولىنىپ, ايماق تۇرعىندارىنىڭ يگىلىگى ءۇشىن ورتالىقتان جاسالعان قامقورلىق ەكەنى ءسوزسىز.
جاقىندا «ەگەمەن قازاقستان» گازەتىندە «توقسان اۋىلدا توي بولادى» دەپ جازىپتى. اڭگىمە ءبىزدىڭ باتىس قازاقستان ءوڭىرى تۋرالى. كوگىلدىر وتىن كەلسە, تازا اۋىزسۋ تارتىلسا, تاقتايداي تەگىس جول تۇسسە, ارينە, اۋىلدىقتار ءۇشىن توي عوي! بۇدان ارتىق قانداي قامقورلىق كەرەك. ەڭبەك ادامى ءۇشىن, قاراپايىم شارۋا ءۇشىن اسپان اشىق, بەيبىت كۇن بولسا, ادال ەڭبەك ەتىپ, زەينەتىن كورۋ مۇمكىن بولسا, ودان ارتىق باقىتتىڭ كەرەگى جوق!
ءوزىڭىز قابىلداعان «نۇرلى جەر» باعدارلاماسى اياسىندا بيىل ءبىزدىڭ وبلىستا كوپ قاباتتى 11 ءۇي سالىنىپ جاتىر. بۇل تۇرعىن ۇيلەردىڭ قۇرىلىسىنا 10 ملرد تەڭگەدەن استام قارجى بولىنگەن. بۇعان قوسا, اۋداندارىمىزدا جۇزدەگەن ءۇيدىڭ قۇرىلىسى قولعا الىنۋدا. جالپى العاندا, بيىل وبلىس اۋماعىندا 17 كوپ پاتەرلى تۇرعىن ءۇي سالىنىپ جاتىر ەكەن. مۇنىڭ بارلىعى حالىقتىڭ ءال-اۋقاتىن جاقسارتۋعا باعىتتالعان, تۇرعىن ۇيگە, باسپاناعا مۇقتاج ازاماتتار ءۇشىن جاسالىپ جاتقان مەملەكەتتىڭ قامقورلىعى ەكەنى انىق. باسپانا زارىن تارتقان ءبىر ادام ءوز شاڭىراعىنا يە بولعاندا قالاي شاتتانادى دەسەڭىزشى! ال بىزدە جىل سايىن مىڭداعان جان جاڭا پاتەرگە كىرىپ, قونىس تويىن تويلاپ جاتىر. بۇدان ارتىق قۋانىش, بۇدان ارتىق باقىت بار ما؟
اللا تاعالا بەرگەن دەنساۋلىقتىڭ ارقاسىندا توقساننان اسساق تا توپتان قالماي كەلەمىز. جاقىندا عانا بىرقاتارىمىز باتىس قازاقستان وبلىستىق ارداگەرلەر كەڭەسى قۇرامىندا استانا قالاسىنا ساپار شەگىپ, الەم مويىنداعان ەكسپو-2017 حالىقارالىق كورمەسىن تاماشالاپ قايتتىق. الەمنىڭ ءار تۇكپىرىنەن كەلىپ, استانامىزدىڭ اي ساۋلەتىنە تاڭداي قاققان شەتەلدىكتەردى كورىپ, كارى كەۋدەمىزدى ماقتانىش كەرنەدى. اللا تاعالا بىزگە جامبىل بابانىڭ قابىلەتىن, سۋىرىپسالما اقىندىعىن بەرمەگەن, ايتپەسە, جىرلاپ-اق جىبەرەتىن جەر ەدى!
ەل تىزگىنىن ءوزىڭىز ۇستاپ, قازاقستان مەملەكەتىن الەمدىك ساياساتتىڭ ايدىنىندا جاھانعا ۇلگى ەتىپ جۇرگىزىپ كەلەسىز. ەلىمىزدە قوعامدىق تۇراقتىلىق بار, ەكونوميكا قارقىندى ءوسىپ كەلەدى. حالىقتىڭ ءال-اۋقاتى جىل ساناپ ارتۋدا. قازاقستاننىڭ بەدەلى حالىقارالىق دەڭگەيدە جىلدان جىلعا كوتەرىلۋدە. ءوزىمىز تۇراتىن باتىس قازاقستان وڭىرىندەگى جاعدايدى جوعارىدا ايتىپ وتتىك. وسىنىڭ ءبارى وڭايلىقپەن كەلمەيتىنىن ءبىز, اعا ۇرپاق, جاقسى تۇسىنەمىز. بۇل – ۇيقىسىز تۇندەردىڭ جەمىسى, اسقان كورەگەندىكتىڭ كورىنىسى, سارابدال ساياساتتىڭ ناتيجەسى. سول ءۇشىن دە ۋاقىت اعارتقان اپپاق باسىمىزدى ءيىپ, بۇكىل اقجايىق ءوڭىرى حالقى اتىنان سىزگە اتالىق العىسىمىزدى ايتامىز! امان بولىڭىز, ۇزاق جاساڭىز! ويعا العان ارمان-ماقساتتارىڭىزعا جەتە بەرىڭىز!
ءبىز استانا مەن قازاقستاننىڭ تۇڭعىش پرەزيدەنتىن ءبىر-بىرىنەن ءبولىپ قاراۋعا بولمايتىن ەگىز ۇعىم دەپ تۇسىنەمىز. استانا – ءسىزدىڭ تۋعان پەرزەنتىڭىز سياقتى. استانا – كەڭ-بايتاق وتاننىڭ, قاسيەتتى قازاقستاننىڭ جۇرەگى ىسپەتتى. مەرەكە قۇتتى بولسىن, قادىرلى ەلباسى!
ۇلى وتان سوعىسىنىڭ ارداگەرلەرى:
مۇحتار اجعۇل ۇلى,
حامزا ابدىراحمان ۇلى, حالام جۇماش ۇلى,
مينجان عابدول ۇلى,
يبات ابدول ۇلى
باتىس قازاقستان وبلىسى
