كەزدەسۋدە مەملەكەت باسشىسى قورعانىس جانە اەروعارىش ونەركاسىبى مينيسترلىگىنىڭ نەگىزگى ماقساتى وزىق عىلىمي-تەحنيكالىق جەتىستىكتەر نەگىزىندە قازاقستان اسكەرى ءۇشىن قارۋ-جاراق جاساۋ, اەروعارىش قىزمەتىن دامىتۋ, كيبەرقاۋىپسىزدىكتى قامتاماسىز ەتۋ ەكەنىنە نازار اۋداردى.
«قازىر بۇل مينيسترلىكتىڭ قۇزىرىندا بۇعان دەيىن ءتۇرلى ۆەدومستۆونىڭ قاراۋىندا بولعان سالالار بار. قورعانىس جانە اەروعارىش ونەركاسىبى مينيسترلىگى وزىق يننوۆاتسيالىق ازىرلەمەلەردى ءبىرىنشى بولىپ قولدانىپ كەلە جاتقان مەملەكەتتىك ورگانداردىڭ قاتارىندا», – دەدى نۇرسۇلتان نازارباەۆ.
قورعانىس جانە اەروعارىش ونەركاسىبى ءمينيسترى قازاقستان پرەزيدەنتىن اتقارىلعان جۇمىستاردىڭ ناتيجەلەرى مەن وسى سالاداعى ورتامەرزىمدى پەرسپەكتيۆاداعى جوسپارلار جونىندە حاباردار ەتتى.
«مينيسترلىك ءسىزدىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىڭىزدى جوسپارلى تۇردە ىسكە اسىرىپ كەلەدى. ناقتى ناتيجەلەرگە قول جەتكىزدىك. سونداي-اق, قورعانىس كەشەنى مەن ءونىمدى ەكسپورتتاۋ كاسىپورىندارىن تەحنولوگيالىق جاڭعىرتۋ جونىندە جۇمىستار قارقىندى جۇرگىزىلۋدە. قازىرگى ۋاقىتتا مەملەكەتتىك قورعانىس تاپسىرىسى ازىرلەنىپ, ىسكە اسىرىلا باستادى», – دەدى ب.اتامقۇلوۆ.
كەزدەسۋ قورىتىندىسى بويىنشا مەملەكەت باسشىسى قورعانىس-ونەركاسىپ كەشەنى مەن اەروعارىش قىزمەتىن ودان ءارى دامىتۋعا قاتىستى بىرقاتار ناقتى تاپسىرما بەردى.
