«1 شىلدەدەن باستاپ مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋگە كىرىسىپ وتىرمىز. وسى باعىتتا ينتەرنەتكە بايلانىستى جۇمىستاردى جۇرگىزۋ وتە ماڭىزدى. جالپى, ەلباسىنىڭ تاپسىرماسى بويىنشا قازىر «تسيفرلى قازاقستان» باعدارلاماسى تۇرعىسىندا ۇلكەن جۇمىستار اتقارىلۋدا. ونىڭ ىشىندە, الەۋمەتتىك سالاعا, اسىرەسە, دەنساۋلىق ساقتاۋعا اۋقىمدى تۇردە كوڭىل بولىنۋدە. بۇل تەك ۇكىمەتكە, مينيسترلىككە عانا قويىلىپ وتىرعان ماقسات ەمەس, سونىمەن قاتار وڭىرلەرمەن بىرلەسە وتىرىپ جاساۋ كەرەك. سول سەبەپتى وڭىرلەردە ينفراقۇرىلىمدىق جۇمىستاردىڭ بارلىعىن اياقتاۋدى سۇرايمىن», دەدى ساعىنتاەۆ.
وسى ورايدا ۇكىمەت باسشىسى وبلىس اكىمدىكتەرى بۇل باعىتتا اتقارىلاتىن جۇمىستاردىڭ بارلىعىن پىسىقتاپ, جىل سوڭىنا دەيىن ينفراقۇرىلىممەن جانە كومپيۋتەرلىك تەحنيكامەن قامتاماسىز ەتۋى ءتيىس ەكەندىگىن اتاپ ءوتتى.
«اقپارات جانە كوممۋنيكاتسيالار مينيسترىلىگى مەن دەنساۋلىق ساقتاۋ مينيسترلىگى مۇددەلى ورتالىق, جەرگىلىكتى اتقارۋشى ورگاندارمەن بىرلەسە وسى جىلدىڭ 1 قاراشاسىنا قاراي اقپاراتتىق جۇيەلەردىڭ ينتەگراتسياسىن اياقتاۋى قاجەت. بۇل رەتتە, قوردىڭ تۇراقتى جۇمىسىن قامتاماسىز ەتۋ كەرەك. سەبەبى, ول بىزدە 2018 جىلدىڭ 1 قاڭتارىنان بەلسەندى جۇمىسىن باستايدى. وسى باعىتتا اقپاراتتىق جۇيەلەردەگى ينتەگراتسياسىز العا جىلجۋىمىز مۇمكىن بولمايدى. سوندىقتان وسى جۇمىستى باقىلاۋعا الۋدى جۇكتەيمىن», دەپ تۇيىندەدى ءسوزىن باقىتجان ساعىنتاەۆ.
