باتىس قازاقستان وبلىسىن ءتورت جىل باسقارعان باقتىقوجا ىزمۇحامبەتوۆكە بۇل ءوڭىردىڭ ماسەلەلەرى وتە تانىس. دەپۋتات وبلىستىڭ اۋدان-اۋىلدارىنداعى جاعدايدى جاقسى ءتۇسىنىپ وتىر:
– ەلباسى ساياساتىمەن جۇرگىزىلىپ وتىرعان مەملەكەتتىك باعدارلامالاردىڭ ارقاسىندا بارلىق جەردە وڭ وزگەرىس بايقالۋدا. سونىڭ ىشىندە باتىس قازاقستان وبلىسىندا دا بىرنەشە ءىرى جوبالار جۇزەگە استى. بۇرىن 12 اۋداننىڭ تەڭ جارىمىنا قاتقىل تاباندى جول جوق ەدى, قازىر جاعداي اجەپتاۋىر جاقسارعان. «نۇرلى جول», «نۇرلى جەر» باعدارلامالارىنىڭ ارقاسىندا ينفراقۇرىلىمدار ودان ءارى دامىپ, تۇرعىنۇي قۇرىلىسى قاۋىرت جۇرۋدە. ءبىز وڭىردە جوسپارلانعان جاڭا جوبالار تۋرالى حاباردارمىز, ولاردى قولداۋعا ءازىرمىز, – دەدى باقتىقوجا سالاحاتدين ۇلى.
وبلىس اكىمى التاي كولگىنوۆ دەپۋتاتتارعا اق جول تىلەپ, تۇرعىنداردىڭ الەۋمەتتىك جاعدايى مەن كوممۋنالدىق ماسەلەلەرىن جاقسارتۋعا ءاردايىم نازار اۋداراتىنى ءۇشىن العىس ايتتى.
– پارلامەنت دەپۋتاتتارىنىڭ وڭىرىمىزگە كەلىپ, ءبىزدىڭ نىساندارمەن تانىسۋى – جەرگىلىكتى ماسەلەلەردى شەشۋ ءۇشىن جاسالعان ۇلكەن دەمەۋ. ەلباسى تاپسىرمالارى اق جايىق وڭىرىندە جوسپارلى تۇردە جۇزەگە اسۋدا. «نۇرلى جول» باعدارلاماسى ءۇشىن قاراجات ءبولىندى, اسىرەسە ينفراقۇرىلىمدى دامىتۋعا كوپ كوڭىل بولىنۋدە. سونىڭ ىشىندە جول ماسەلەسىن باستى ورىنعا شىعارىپ وتىرمىز. پرەزيدەنت تاپسىرماسىنا وراي بيىل وبلىستا 500 شاقىرىم جول جوندەلەدى, ونىڭ 200 شاقىرىمى – رەسپۋبليكالىق ماڭىزى بار كۇرە جولدار. بىرقاتار جوبامىز كەلەسى جىلى ءتامامدالادى. «نۇرلى جەر» باعدارلاماسى ءۇشىن 12 ميلليارد تەڭگە ءبولىندى, قازىر جالپى سانى 1600 پاتەرلىك كوپ قاباتتى 11 ءۇي سالىنۋدا. بۇعان قوسا 8 اۋداندا دا تۇرعىن ءۇي قۇرىلىسى ءجۇرىپ جاتىر. وسىنىڭ ءبارى پاتەر كەزەگىندە تۇرعان جەرلەستەرىمىزدىڭ باسپانا جاعدايىن شەشىپ, ءوڭىردىڭ ەكونوميكاسىن دا كوتەرىپ جاتىر. ويتكەنى, ءۇي قۇرىلى كومبيناتتارى, كىرپىش زاۋىتتارى, تەمىربەتون شىعاراتىن ونەركاسىپ ورىندارى, جيھاز شىعاراتىن زاۋىتتار, پوليەتيلەن قۇبىرلار زاۋىتى تاپسىرىس الىپ, قوماقتى تابىس تاۋىپ جاتىر, – دەدى ءوڭىر باسشىسى التاي كولگىنوۆ ايماقتا اتقارىلىپ جاتقان جۇمىستار جونىندە.
كەزدەسۋ كەزىندە وبلىستا سپورت ينفراقۇرىلىمىن دامىتۋ, كاسىپكەرلىكتى قولداۋ, تاعى باسقا تاقىرىپتار دا كوتەرىلدى.
– ءبىز باتىس قازاقستان وڭىرىندە 10 كۇن بولامىز. تۇرعىندارمەن, ەڭبەك ۇجىمدارىمەن كەزدەسەمىز, كاسىپورىنداردى ارالاپ, قوعامدىق ۇيىمدار جۇمىسىمەن تانىسامىز. زاڭ شىعارۋشى دەپۋتات ءبىر وڭىرمەن تۇيىقتالىپ قالۋىنا بولمايدى, ول قازاقستاننىڭ بارلىق قيىرىنداعى احۋالمەن جاقسى تانىس بولۋى ءتيىس. وبلىس باسشىسىمەن جۇرەكجاردى اڭگىمەلەستىك, ءوڭىر ءۇشىن وزەكتى ماسەلەلەرگە قانىقتىق. ءماجىلىستىڭ كەلەسى سەسسياسىندا كوتەرىلەتىن تاقىرىپتار تىزبەگى وسىلايشا جاسالادى, – دەپ اتاپ ءوتتى دەپۋتات پاۆەل كازانتسەۆ.
وسىدان كەيىن ءماجىلىس دەپۋتاتتارى باقتىقوجا ىزمۇحامبەتوۆ پەن اباي تاسبولاتوۆ وبلىس باسشىسىمەن بىرگە ورالداعى تەننيس ورتالىعى مەن وقۋشىلار جانە جاستار سارايىندا بولىپ, اتالعان نىسانداردىڭ تىنىس-تىرشىلىگىمەن تانىستى.
قازبەك قۇتتىمۇرات ۇلى,
"ەگەمەن قازاقستان"
سۋرەتتى تۇسىرگەن
تەمىربولات توقمامبەتوۆ
