جارىستىڭ سوڭعى كۇنىندە سپرينتەرلەر ءۇشىن باسەكە ءساتتى بولدى. ايەلدەر اراسىندا 200 مەترگە جۇگىرگەن وتانداسىمىز ۆيكتوريا زيابكينا وسى ماۋسىمداعى ازيانىڭ ۇزدىك ناتيجەنى كورسەتىپ, التىن مەدال جەڭىپ الدى. ونىڭ ۋاقىت كورسەتكىشى – 23.10 سەكۋند. مارەگە ەكىنشى بولىپ شري-لانكا سپورتشىسى رۋمەشيكا كۋماري كەلدى. ۇزدىك ۇشتىكتى تاعى ءبىر جەرلەسىمىز ولگا سافرونوۆا (23.47 سەك) قورىتىندىلادى.
– ۆيكتوريا ءبىر كۇن بۇرىن ەستافەتادا جۇگىرگەن سوڭ ازداپ شارشاپ قالدى. سوندىقتان, سپرينەترلىك جارىستاعى ستارت باسىندا باياۋ قيمىلدادى. دەگەنمەن بۇگىن ءوزىنىڭ قانداي جەلاياق ەكەنىن ازيالىق جەڭىل اتلەتيكا جانكۇيەرلەرىنە كورسەتە ءبىلدى. نەگىزى, 200 مەترگە جۇگىرۋدە جەڭىمپازدىڭ كىم بولاتىنى كوبىنەسە ارا قاشىقتىقتىڭ جارتىسىنان اسقاننان كەيىن شەشىلىپ جاتادى. سوندىقتان, ۆيكتوريا ءاردايىم مارەگە جاقىنداعاندا كۇش الادى. نەگىزىنەن ول جارىستاردى ۇنەمى وسىلاي جەڭىپ جۇرەدى, – دەيدى زيابكينانىڭ جاتتىقتىرۋشىسى ليۋبوۆ نيكيتەنكو.
ءسويتىپ, ۆيكتوريا زيابكينا 2017 جىلعى ازيا چەمپيوناتىنىڭ ءۇش دۇركىن چەمپيونى اتاندى. ول بۇعان دەيىن جەكەلەي سىندا 100 مەترگە جۇگىرۋدەن جەڭىسكە جەتسە, ارىپتەستەرى ريما كاشافۋتدينوۆا, سۆەتلانا گولەندوۆا, ولگا سافرونوۆامەن بىرگە 4ح100 مەترگە جۇگىرۋ بويىنشا كوماندالىق ەستافەتادان ءۇشىنشى التىندى يەلەندى.
ايتا كەتەيىك, 8 شىلدە كۇنى قازاقستاندىق جەڭىل اتلەتتەر 100 مەترگە كوماندالىق ەستافەتاعا جۇگىرۋدە سارىقۇرلىقتا وزدەرىنە تەڭ كەلەر ەشكىم جوق ەكەنىن دالەلدەگەن ەدى. قازاقستان ۇلتتىق قۇراماسىنىڭ ۋاقىت كورسەتكىشى – 43.53 سەكۋند بولدى. ەكىنشى ورىندا قىتاي قىزدارى (44.50) بولسا, ۇشتىكتە ءۇندىستان (44.57) قۇراماسى ەندى.
ءتورتىنشى التىندى ءۇش قارعىپ سەكىرۋدەن ماريا وۆچيننيكوۆا ەنشىلەدى. ول ازيا چەمپيوناتىن 13.72 مەترمەن قورىتىندىلادى. 18 جاستاعى جەڭىل اتلەت 4-13 تامىز ارالىعىندا لوندوندا وتەتىن الەم چەمپيوناتىنا جولداما الدى. ماريادان بولەك, ءدال وسى سايىستان تاعى ءبىر قازاقستاندىق سپورتشى يرينا ەكتوۆا كۇمىس مەدال جەڭىپ الدى. ول 13.62 مەترگە سەكىرگەن.
ازيا چەمپيوناتىنان سپرينتەر ولگا سافرونوۆاعا ەكى مەدال بۇيىردى. ول 100 مەترگە جۇگىرۋدەن (11.45 سەكۋند) كۇمىس, 200 مەتردە قولا جۇلدە ەنشىلەدى. تاعى ءبىر قولا مەدالدى جارىستىڭ ەكىنشى كۇنىندە يادرو لاقتىرۋدان يۆان يۆانوۆ ولجالاعان بولاتىن. ول يران مەن ءۇندىستان سپورتشىلارىن العا جىبەرىپ, 19.41 مەترگە لاقتىرىپ, ءۇشىنشى ورىنعا قول جەتكىزدى.
وسىلايشا, بحۋبانەشۆارداعى ازيا چەمپيوناتىنان قازاقستان ۇلتتىق قۇراماسىنا جالپى سانى سەگىز مەدال بۇيىردى. ءسويتىپ, جالپى كوماندالىق ەسەپتە ءۇشىنشى ورىنعا جايعاستى. كوشباسىندا جارىس قوجايىنى ءۇندىستان 29 مەدال (12 التىن, 5 كۇمىس, 12 قولا) مەن قىتاي (8 التىن, 7 كۇمىس, 5 قولا) بار. ال, 2015 جىلعى ازيا بىرىنشىلىگىندە قازاقستاندىق سپورتشىلار ءبىر التىن, ءۇش كۇمىس جانە ءۇش قولا مەدالمەن جالپى ەسەپتە توعىزىنشى ورىنمەن شەكتەلگەن.
6-9 شىلدە ارالىعىندا وتكەن بيىلعى ازيا چەمپيوناتىنا سارىقۇرلىقتىڭ 43 ەلىنەن 800-دەن استام سپورتشى قاتىستى. جەڭىل اتلەتيكادان قازاقستان ۇلتتىق قۇراماسى ەندى تامىز ايىندا لوندوندا وتەتىن الەم چەمپيوناتىنا قاتىسادى.
ءالي بيتورە,
«ەگەمەن قازاقستان»
