وبلىس ورتالىعىندا قولجەتىمدى مەديتسينالىق قىزمەت كورسەتۋ ساپاسىنىڭ تومەندىگىن تۇرعىندار اراسىندا جۇرگىزىلگەن الەۋمەتتىك ساۋالدامالار دا ايعاقتاعان. بىلتىر ناۋقاستار ءۇش اي بويى جەڭىلدىكتى ءدارى-دارمەككە قول جەتكىزە الماعان. دەنساۋلىق ساقتاۋ باسقارماسىنىڭ باسشىسى ۆلاديمير بەزلەر جاعدايدىڭ بيىل دا ءتۇيىندى كۇيىندە قالىپ وتىرعانىن, ونىڭ باستى سەبەبى قاراجات تاپشلىعىنا كەلىپ تىرەلەتىنىن مالىمدەدى. دارىلىك زاتتارعا قاجەت قارجى 2,5 ميلليارد تەڭگەنى قۇراسا, رەسپۋبليكالىق قازىنادان بولىنگەنى – 1,5 ميلليارد قانا. جەرگىلىكتى بيۋدجەتتەن 132 ميلليون تەڭگە قاراستىرىلعان. بۇگىندە وسىنشا سومانىڭ جارتىسى يگەرىلىپ, 97430 ادام پرەپاراتتارمەن قامتاماسىز ەتىلگەن.
وبلىستىق ءماسليحاتتىڭ دەپۋتاتى يۋري بەلونوگتىڭ پىكىرىنشە, پروبلەمالاردى شەشۋ ءۇشىن الدىمەن ءتيىستى زاڭنامالارعا وزگەرىس ەنگىزۋ قاجەت. اتاپ ايتقاندا, كونكۋرستاردى وتكىزۋدىڭ ناقتى مەرزىمى بەلگىلەنۋى كەرەك. ايتپەسە, ءتۇرلى بيۋروكراتتىق كەدەرگىلەر مەن قاعازباستىلىق سالدارىنان پروتسەسس ۇزاق ۋاقىتقا سوزىلىپ كەتەتىن كورىنەدى.
بيۋرو ماجىلىسىندە سالالىق دارىگەرلەردىڭ جەتىسپەيتىنى, مەكتەپتەردەگى مەديتسينالىق پۋنكتتەر سانيتارلىق-گيگيەنالىق تالاپتارعا ساي كەلمەگەندىكتەن, 25-ىنە ليتسەنزيا بەرىلمەگەنى اتاپ كورسەتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى.
