قازاق ولەڭىنىڭ ايتۋلى جۇيرىگى يسا بايزاقوۆتىڭ «قۇرالاي سۇلۋ» پوەماسى – ءيسى قازاقتىڭ جۇرەگىنە جول تاپقان تۋىندى. جەلدىرمەلەتىپ كەتكەندە جىر جاراتىلىسىن, قارا ولەڭ قۇبىلىسىن كوز الدىڭا كەلتىرەتىن اقىننىڭ سۇلۋلىق پەن بەكزاتتىقتى, تاكاپپارلىق پەن اسقاقتىقتى, ادال ماحاببات پەن شىنايى سۇيىسپەنشىلىكتى جىرلايتىن بۇل شىعارماسى قازاق قىزىنىڭ عانا ەمەس, تۇتاس قازاقتىڭ تاعدىرىن وزەك ەتەدى. قازاق پەن قالماق اراسىنداعى بىتىسپەس داۋ ارقىلى ادامگەرشىلىكتىڭ اق جولىن ناسيحاتتايدى. سول شىعارمادا قۇرالاي بەينەسى اسقاقتاي كورىنىپ, كوركەمدىك كوكجيەگىمەن كوپتى تاڭداندىرادى.
جالپى, جامبىل وبلىسىندا ءۇش مىڭنان اسا وبالار مەن كومبەلەر بار. سونداي-اق, مىڭداعان تاريحي-مادەني ەسكەرتكىشتەر تاعى بار. مويىنقۇم جەرىندەگى قۇرالاي سۇلۋ كەسەنەسى دە بۇگىندە رەسپۋبليكالىق ماڭىزداعى تاريحي ەسكەرتكىشتەر تىزىمىنە ەنگىزىلگەن. دەگەنمەن, وسى ءبىر ادەبي كەيىپكەردىڭ مازارى وسىدان از جىلدار بۇرىن عانا مۇلدە جوق بولىپ كەتۋدىڭ الدىندا تۇردى. ەگەر دەر كەزىندە كەسەنەنى قالپىنا كەلتىرۋ جۇمىستارى جۇرگىزىلمەگەندە, بۇل نىسان, ءسوز جوق, بولاشاق ۇرپاقتىڭ ەسىندە بولمايتىن دا ەدى.
بۇل كۇندە قۇرالاي سۇلۋ كەسەنەسى الىستان ايبارلانىپ كورىنەدى. كەسەنە ۇلانبەلدىڭ قىزىل تاسىنان قالانىپ تۇرعىزىلعان ءوز الدىنا بيىك عيمارات ىسپەتتى. ال كەسەنەنى قايتا قالاپ شىققان وزبەكستاننىڭ ءاندىجان قالاسىنان ارنايى شاقىرتىلعان شەبەرلەر ەكەن. الداعى ۋاقىتتا قۇرالاي سۇلۋ كەسەنەسىن تۋريستىك ورتالىققا اينالدىرۋ ماسەلەسى دە كۇن تارتىبىندە تۇر. ومىردەن وتكەنىنە ەكى جارىم عاسىر بولسا دا ەل ەسىندە ساقتالىپ كەلە جاتقان قايسار قىزدىڭ تاعدىرى كىم-كىمدى دە قىزىقتىراتىنى ءسوزسىز. سونداي-اق, قازاق ادەبيەتىندە وزىندىك ورنى بار كەيىپكەردىڭ ءاربىر بۋىنمەن بىرگە جاساي بەرەتىنى اقيقات.
حاميت ەسامان,
«ەگەمەن قازاقستان»
جامبىل وبلىسى
