قۇرىق پورتى – ترانسكاسپي كولىك ءدالىزىنىڭ ماڭىزدى بولىگى

اسقار مامين الدىمەن قۇرىق پاروم پورتىنىڭ قۇرىلىس جۇمىستارىمەن تانىستى. 

ءبىر ايتا كەتەرلىگى, اتالعان كەشەننىڭ ءبىرىنشى كەزەڭى 2016 جىلدىڭ جەلتوقسان ايىندا ىسكە قوسىلىپ, جۇك ۆاگوندارىن تاۋلىك بويى پارومعا تاسۋعا مۇمكىندىك بەرەتىن تەمىر جولدى قوسقاندا 44 وبەكت پايدالانۋعا بەرىلدى.

پورت كوممەرتسيالىق قىزمەتتى 2017 جىلدىڭ باسىنان باستاپ, بۇگىنگە دەيىن 400 مىڭ توننادان استام جۇك تاسىمالداندى. جىل سوڭىنا دەيىن بۇل كورسەتكىشتى 1 ملن تونناعا جەتكىزۋ جوسپارلانۋدا.

مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: باسەكەگە قابىلەتتىلىك» اتتى جولداۋىندا قۇرىق اۆتوكولىك ءدالىزىنىڭ ەكىنشى كەزەڭ قۇرىلىسىنىڭ ماڭىزدى ەكەندىگى ايتىلعان.

جاڭا پارومداعى وتكەل جۇكتەردىڭ مۋلتيمودەلدى تاسىمالىنا مۇمكىندىك بەرەدى. سول ارقىلى جۇك ءترانزيتى ارتىپ, قاسپي ارقىلى ەكسپورت پوتەنتسياالى دا ۇلعايادى دەپ كۇتىلۋدە.

قۇرىق پاروم كەشەنىن پايدالانۋعا بەرۋ قازاقستاننىڭ تەڭىز جولىن ارتتىرىپ, ترانسكاسپي حالىقارالىق كولىك مارشرۋتىنىڭ مۇمكىندىكتەرىن ارتتىرادى.

سونىمەن قاتار اسقار مامين وبلىستاعى رەسپۋبليكالىق ماڭىزى بار اۆتوكولىك جولدارىنىڭ جوندەۋدەن ءوتۋ جوبالارىن جۇزەگە اسىرۋ بارىسىمەن تانىستى.

بۇگىنگى تاڭدا ماڭعىستاۋ وبلىسىندا اقتاۋ-شەتپە (167 كم), شەتپە – ساي-وتەس (60 كم) سەكىلدى باسقا دا اۆتوجول جوبالارى جۇزەگە اسىرىلۋدا. سونداي-اق بەينەۋ-اقجىگىت-وزبەكستان شەكاراسىنا دەيىنگى 85 كم جول قايتا جوندەۋدەن ءوتۋ جۇمىستارى باستالدى. سونىمەن قاتار بيىل كۇزدە جەتىباي-جاڭاوزەن اۆتوجولى جوندەۋدەن وتكىزىلمەك.

اسقار مامين اتالعان جوبالاردى جۇزەگە اسىرۋ بارىسىمەن تانىسىپ, اۆتوماگيسترالدار جۇمىسىن از ۋاقىتتا اياقتاۋدى تاپسىردى.