ەلباسىنىڭ رۋحاني جاڭعىرۋ جونىندەگى جالپىۇلتتىق يدەياسىندا ەسكىنىڭ ەسەلەنىپ جاڭارۋى, بۇرىنعىنىڭ بۇگىنگىمەن ۇشتاسۋى سياقتى ۇلكەن مۇراتتار جاتقانى ايتىلعان. ءبىزدىڭ تاريحىمىز بەن تامىرىمىز ءتىلىمىز, ءداستۇرىمىز, ءدىنىمىز, ونەرىمىز تىكەلەي بايلانىستى. حالقىمىزدىڭ عاسىرلار بويعى وزىمەن بىرگە جاساسىپ كەلە جاتقان ەرەكشە قاسيەتتەرى بۇگىنگى كۇنى دارىپتەلىپ, جارقىراپ جارىققا شىعۋى – ەلدىكتىڭ نىشانى, رۋحاني جاڭعىرۋ.
وسى ورايدا اقپارات جانە كوممۋنيكاتسيالار مينيسترلىگى مەن «قازاقستان» ۇلتتىق ارناسى بىرلەسىپ ۇيىمداستىرىپ وتىرعان اتالمىش جوبا قولعا الىندى. اسا ءبىر ىجداعاتپەن باستالعان يگى شاراعا حالىقتىڭ الارى دا, بەرەرى دە كوپ. قازىنالى قاراعاندىدا وتكەن ءىس-شاراعا قۇرمەتتى قوناق بولىپ, «قازاقستان رترك» اق باسقارما توراعاسى ەرلان قارين قاتىستى. كەشتىڭ جوعارى دەڭگەيدە ۇيىمداستىرىلعانىنا باعا بەرە كەلىپ: «مەن قازاقپىن» مەگا-جوباسى – «قازاقستان» ۇلتتىق ارناسى ءۇشىن وتە ماڭىزدى جوبا. وسى ارقىلى ءبىز ۇلتتىق مادەنيەتىمىز بەن رۋحانياتىمىزدى قايتا تۇلەتەمىز. ونىمەن قوسا, شالعايداعى ونەر يەلەرىنە ۇلكەن ساحناعا جول اشىلادى. وبلىستاردا ىرىكتەۋ ماۋسىم ايىنىڭ باسىنان باستالدى. بۇگىنگە دەيىن جوباعا 428 ۇمىتكەر قاتىسىپ, ونىڭ 40-ى جەڭىمپاز اتاندى. جوبانىڭ حالىقارالىق اتالۋ سەبەبى – شىلدە ايىندا ىرىكتەۋ رەسەيدە, موڭعوليانىڭ بايان-ولگەي ايماعىندا, قىتايدىڭ التاي ولكەسىندە وتەدى دەپ جوسپارلاۋدامىز. ەفيرگە قىركۇيەك ايىنان شىعا باستايدى. ال اقتىق جارىستى تاۋەلسىزدىك مەرەكەسى قارساڭىندا, جەلتوقسان ايىنا جوسپارلاپ وتىرمىز», – دەدى توراعا.
بەلگىلەنگەن ەرەجەگە سايكەس, مۇندا 18 بەن 40 جاس ارالىعىنداعى ۇمىتكەرلەر ءۇش كەزەڭ بويىنشا ونەر جارمەڭكەسىندە باقتارىن سىنادى. تەرمەشىلىك, كۇيشىلىك جانە انشىلىك ء(داستۇرلى) ونەر سايىسىنا وبلىسىمىزدىڭ اۋداندارى مەن قالالارىنان بارلىعى 36 ونەرپاز قاتىسىپ, ونىڭ ىشىنەن ۇشەۋى مەگا-جوبانىڭ رەسپۋبليكالىق كەزەڭىنە جولداما الدى.
مەگا جوبانىڭ وبلىستاعى ىرىكتەۋ كەزەڭىن وتكىزگەن وبلىس اكىمدىگى, وبلىستىق «قازاقستان-قاراعاندى» تەلەارناسىنىڭ ەرەكشە دايىندىعى كورەرمەندەردىڭ كوڭىلىنەن شىقتى. سارىارقانى سالتاناتقا بولەپ شىققان سال-سەرىلەرگە ساحنا تورىنەن اقشاڭقان ءۇي تىگىپ, قازىبەك بي بابانىڭ اتالى دا باتالى سوزىمەن شارانىڭ شىمىلدىعى ءتۇرىلدى. بۇل جەردە قاراعاندى قالاسىنىڭ مادەنيەت مايتالماندارى مەن مۋزەي قىزمەتكەرلەرىنىڭ دە ەڭبەكتەرىن ەرەكشە اتاپ كەتكەن ءجون. تاتتىمبەت اتىنداعى قازاق ۇلت اسپاپتار وركەسترى, «شولپان» ۇلگىلى بي ءانسامبلى باستاعان ونەرپازدار كەش بويى تالماي ءان سالىپ, قوشەمەتشىل دۋدى تاڭ-تاماشا ەتىپ وتىردى.
سونىمەن, قارا قىلدى قاق جارعان قازىلار, اتاپ ايتقاندا جوباعا ارنايى استانا قالاسىنان ات شالدىرعان قازاقستاننىڭ مادەنيەت قايراتكەرى, ءداستۇرلى ءانشى نۇرجان جانپەيىسوۆ, قازاقستاننىڭ ەڭبەك سىڭىرگەن قايراتكەرى, ق.بايجانوۆ اتىنداعى كونتسەرتتىك بىرلەستىكتىڭ تاتتىمبەت اتىنداعى قازاق ۇلت اسپاپتار وركەسترىنىڭ كونتسەرتمەيستەرى بولاتحان تاشيموۆ, قازاقستاننىڭ مادەنيەت قايراتكەرى, حالىقارالىق جانە رەسپۋبليكالىق ءان بايقاۋلارىنىڭ جەڭىمپازى داۋرەنبەك اركەنوۆ جانە رەسپۋبليكاعا تانىمال ايتىسكەر اقىن تىلەگەن ءادىلوۆ سايىسقا تورەلىك ەتتى.
ولار ءادىل باعا بويىنشا, «مەن قازاقپىن» جوباسىنىڭ رەسپۋبليكاداعى دوداسىندا قاراعاندىنىڭ نامىسىن تەرمەشىلەردەن نۇرمۇحاممەت بايسۇگىروۆ, كۇيشىلەردەن بالقان سماعۇلوۆ, ال ءداستۇرلى اننەن ءانۋار ادامباەۆ قورعايتىن بولدى.
ميراس اسان,
«ەگەمەن قازاقستان»
قاراعاندى وبلىسى
