بۇگىن باتىس قازاقستان وبلىستىق ءماسليحات زالىندا وتكەن سايلاۋ ناۋقانىنا وبلىستاعى اۋداندىق, قالالىق جانە وبلىستىق دەپۋتاتتار تۇگەلگە جۋىق قاتىستى.
باتىس قازاقستان وبلىستىق سايلاۋ كوميسسياسىنىڭ توراعاسى عايسا قاپاقوۆتىڭ ايتۋىنشا, بارلىق 198 دەپۋتاتتىڭ 194-ءى سايلاۋعا قاتىسىپ, داۋىس بەرگەن. سەنات دەپۋتاتتىعىنا كانديدات – قۇرمانعازى اتىنداعى ورال مۋزىكا كوللەدجىنىڭ ديرەكتورى, قالالىق ءماسليحات دەپۋتاتى نۇرجان سەرتەكوۆ – 38 داۋىس, ورال قالاسىنىڭ اكىمى ناريمان تورەعاليەۆ – 156 داۋىس العان.
سەنات دەپۋتاتتىعىنا ءاۋ باستا ءۇش دەپۋتات ۇسىنىلعان بولاتىن. بىراق «اۆتوكومبينات» جشس ديرەكتورى ۆالەري گولوۋحوۆ ءوز وتىنىشىمەن سايلاۋ دوداسىنان كانديداتۋراسىن الىپ تاستادى.
ناريمان تورەعاليەۆ 1964 جىلى سول كەزدەگى ورال وبلىسى تايپاق اۋدانى ەسەنساي اۋىلىندا دۇنيەگە كەلگەن. ءبىلىمى جوعارى, 1990 جىلى جامبىل گيدرومەليوراتيۆتىك قۇرىلىس يستيتۋتىن, 2004 جىلى قازاق قوعامدىق ۋنيۆەرسيتەتىن تامامداعان. ماماندىعى - ينجەنەر-ەكونوميست, زاڭگەر.
ەڭبەك جولىن اقجايىق اۋدانىنداعى «ەسەنساي» كەڭشارىندا 1981 جىلى جۇمىسشى بولىپ باستاعان ن.تورەعاليەۆ وبلىستىڭ تەرەكتى اۋدانىنا قاراستى وندىرىستىك كووپراتيۆىندە باس ەسەپشى, باس ەكونوميست قىزمەتتەرىن اتقارعان. 2002-2003 جىلدارى جالپى ۇلگىدەگى ورال ينتەرنات ءۇيىنىڭ ديرەكتورى, 2003-2005 جىلدارى باتىس قازاقستان وبلىسىنىڭ ەڭبەك, جۇمىسپەن قامتۋ جانە حالىقتى الەۋمەتتىك قورعاۋ باسقارماسى باستىعىنىڭ ورىنباسارى, 2008 جىلدارى باتىس قازاقستان وبلىسىنىڭ ەڭبەك, جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ دەپارتامەنتى ديرەكتورىنىڭ ورىنباسارى, 2008-2010 جىلدارى قر تابيعي مونوپوليالاردى رەتتەۋ اگەنتتىگىنىڭ باتىس قازاقستان وبلىسى بويىنشا دەپارتامەنتىنىڭ ديرەكتورى, 2010-2012 جىلدارى باتىس قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باستىعى, 2012-2015 جىلدارى بقو اقجايىق اۋدانىنىڭ اكىمى, 2015-2016 جىلدارى باتىس قازاقستان وبلىسى اكىمىنىڭ ورىنباسارى, 2016 جىلدىڭ 5 ساۋىرىنەن باستاپ ورال قالاسىنىڭ اكىمى بولىپ قىزمەت ەتتى.
قازبەك قۇتتىمۇرات ۇلى,
"ەگەمەن قازاقستان"
ورال
