وتىرىستى اشقان مەملەكەتتىك حاتشى «مەرەيلى وتباسى» ۇلتتىق كونكۋرسى قازاقستان پرەزيدەنتىنىڭ باستاماسىمەن جىل سايىن وتكىزىلەتىنىن ايتتى.
گۇلشارا ابدىقالىقوۆا مەملەكەت باسشىسىنىڭ «بولاشاققا باعدار: رۋحاني جاڭعىرتۋ» اتتى باعدارلامالىق ماقالاسىنىڭ نەگىزگى ەرەجەلەرىنىڭ ءبىرى رۋحاني قۇندىلىقتاردى ساقتاۋ جانە جاڭعىرتۋ بولىپ سانالاتىندىقتان, بيىلعى كونكۋرستىڭ ماڭىزى زور ەكەنىن اتاپ ءوتتى. ادام بويىندا رۋحاني قۇندىلىقتار قالىپتاستىرۋدا وتباسى ينستيتۋتى ماڭىزدى ءرول اتقارادى.
كونكۋرس نەكە جانە وتباسى ينستيتۋتىن, قوعامداعى ىزگىلىك پەن ادامگەرشىلىكتى نىعايتۋعا باعىتتالعان. ول بيىل ءتورتىنشى رەت وتكىزىلىپ وتىر. بايقاۋعا 2879 وتباسى قاتىستى, 2016 جىلمەن سالىستىرعاندا ولاردىڭ سانى 11,6% وسكەن (2016 جىلى 2579 وتباسى قاتىسقان). بۇل رەتتە قاتىسۋشىلاردىڭ 36,2%-ى (1041 وتباسى) – كوپبالالى وتباسىلار (2016 جىلى 1065 وتباسى بولعان).
سونىمەن قاتار, بىلتىرمەن سالىستىرعاندا ءبىر ماماندىقپەن اينالىساتىن اۋلەتتەر وكىلدەرىنەن قۇرالعان وتباسىلار سانى 6,8%-عا (2016 جىلى – 483, 2017 جىلى – 516) جانە جاس وتباسىلار سانى 6%-عا ۇلعايدى (2016 جىلى – 472, 2017 جىلى – 500).
مامىر ايىندا بارلىق وبلىستار مەن رەسپۋبليكالىق ماڭىزى بار قالالاردا ايماقتىق كەزەڭنىڭ سوڭعى مارەسىندەگى جەڭىمپازدارىن سالتاناتتى ماراپاتتاۋ ءىس-شارالارى وتكىزىلىپ, ءتورتىنشى – ۇلتتىق كەزەڭگە قاتىساتىن 2 وتباسى انىقتالعان بولاتىن.
وتىرىستا ۇلتتىق كەزەڭگە قاتىساتىن 16 ۇمىتكەر بەكىتىلدى.
«مەرەيلى وتباسى» كونكۋرسىنىڭ فينالدىق كەزەڭىندە جەڭىمپازدى انىقتاۋعا ەلىمىزدىڭ بارلىق ازاماتتارى سمس-حابارلامالار جىبەرۋ جانە kaztube.kz سايتى ارقىلى ينتەراكتيۆتى داۋىس بەرۋ ادىسىمەن تىكەلەي اتسالىسا الادى.
داۋىس بەرۋ قورىتىندىسى قىركۇيەكتىڭ ەكىنشى جەكسەنبىسىندە – وتباسى كۇنى قارساڭىندا شىعارىلادى.
