تاڭداۋلىلارعا ەرەكشە قۇرمەت كورسەتىلمەگى زاڭدى. 2017 جىلعى جەتىسۋ ءوڭىرىنىڭ ەڭ وزات تۇلەكتەرى التىن بەلگىنى وبلىس اكىمىنىڭ قولىنان الدى. الماتى وبلىسىندا بيىل 14268 وقۋشى مەكتەپ ءبىتىردى. سونىڭ 590-ى – التىن بەلگى يەگەرى. ۇزدىك اتتەستات – 523 وقۋشىعا بۇيىرعان. بۇل كورسەتكىشكە ءوڭىر باسشىسىنىڭ كوڭىلى تولادى. ايتۋىنا قاراعاندا, سوڭعى جىلدارى وبلىس كولەمىندە وزات وقۋشىلاردىڭ سانى ارتىپ كەلەدى. بۇل – ءبىلىم ساپاسى ارتقانىنىڭ كورسەتكىشى. رەسپۋبليكالىق, حالىقارالىق ءبىلىم سايىستارىندا توپ جارىپ, جۇلدە سالعان وقۋشىلار دا از ەمەس. بۇل رەتتە ۇستازداردىڭ دا ەڭبەگىن, بىلىكتىلىگىن ايتا كەتكەن ءجون. جيىندا ۇزدىك وقىتۋشىلاردىڭ دا اتى ەرەكشە اتالىپ, قۇرمەت كورسەتىلدى.
.jpg)
وبلىس اكىمى اماندىق باتالوۆ قۇتتىقتاۋ سوزىندە:
بۇگىن سىزدەر ءۇشىن دە, اتا-انالار مەن ۇستازدار ءۇشىن دە تولقىنىستى ءسات. قيماس مەكەن, التىن ۇياعا اينالعان مەكتەپتەگى الاڭسىز كۇندەر اياقتالىپ, ازاماتتىق جاۋاپكەرشىلىگى مول كەزەڭگە اياق باستىڭىزدار. مەكتەپ قابىرعاسىندا العان بىلىمدەرىڭىز بۇل جولدا سەنىمدى سەرىك بولادى دەپ سەنەمىن. سىزدەردەن الەم وركەنيەتىنە جاقىن, وزىق ويلى جاستار رەتىندە ۇلكەن ءۇمىت كۇتەمىز, – دەدى.
راس, مەكتەپتى التىنمەن ءبىتىرۋ – «ماقتانىشپەن قاتار ۇلكەن مىندەتتەر دە جۇكتەيدى». تالدىقورعانداعى «جاستار» ساياباعىن سالتاناتقا بولەگەن 590 تۇلەك وزدەرىنە كورسەتىلگەن ەرەكشە قۇرمەتتىڭ ارتىندا وسىنداي سالماقتىڭ جاتقانىن دا سەزىنەتىندەرىن ايتتى. كوپ شاكىررتىڭ اتىنان ءسوز العان تالدىقورعان قالاسىنداعى دارىندى بالالارعا ارنالعان ءۇش تىلدە وقىتاتىن №20 ارناۋلى ليتسەيىنىڭ تۇلەگى اسىلجان بالاتۇرسىنوۆ جۇرەكجاردى ءسوزىن ءۇش تىلدە ەركىن جەتكىزدى:
ء«بىز ازات ەلدە تۋىپ-ءوسىپ, ءبىلىم العانىمىزدى ماقتان تۇتامىز. سونىمەن قاتار, جاستاردان ۇلكەن ءۇمىت كۇتەتىن جۇرتىمىز بەن ەلباسى سەنىمىن اقتايتىن ازامات بولاتىنىمىزعا ءسوز بەرەمىز», دەدى.
جيىن سوڭى – ءداستۇرلى تۇردە قوشتاسۋ ۆالسىمەن تۇيىندەلىپ, ەلگە بەلگىلى ونەر يەلەرىنىڭ قاتىسۋىمەن وتكەن كونتسەرتپەن جالعاستى.
الماس ءنۇسىپ,
«ەگەمەن قازاقستان»
