ەر ازامات العا قويعان ماقساتىنا جەتىپ, اڭساعان ارمانىنىڭ شىڭىن باعىندىرۋ ءۇشىن, وزىنە دەگەن سەنىمدىلىكتى بويىنا قالىپتاستىرۋ قاجەت. بولاشاعىن اسكەري سالامەن بايلانىستىرۋ ول جۇرەكتىلىك بولىپ تابىلادى. سەبەبى, اسكەري سالانىڭ قيىندىعىنا كەز كەلگەن ادام توتەپ بەرە المايدى. تەك, وتان الدىنداعى پارىزىن جۇرەكپەن سەزىنىپ, ءومىرىن اسكەرگە ارناعان ازاماتتىڭ تاڭداۋى ەرلىكپەن پارا-پار.
بۇگىنگى تاڭدا ەلىمىزدىڭ قورعانى بولار ۇرپاقتىڭ سانالى, ساۋاتتى بولۋىنا باستى نازار اۋدارىلعان. ولار قارۋلى كۇشتەردىڭ ءار سالاسىنا بايلانىستى جوعارى اسكەري ينستيتۋتتاردا ءبىلىم الۋدا. ولاردىڭ اراسىندا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ تۇلەكتەرى دە بار. اتالعان اسكەري ينستيتۋت, بولاشاق وفيتسەر ماماندارىن دايىندايتىن قازاقستان رەسپۋبليكاسى قارۋلى كۇشتەرىندەگى الدىڭعى قاتارلى اسكەري ينستيتۋت بولىپ سانالادى.
اسكەري ينستيتۋتتا بىلىكتى, تاجىريبەلى ماماندار قىزمەت اتقارادى. كومانديرلەر مەن پروفەسسورلىق-وقىتۋشىلار قۇرامى كۋرسانتتاردىڭ ءبىلىمىن شىڭداۋ ماقساتىندا ايانباي ەڭبەك ەتۋدە.
كۋرسانتتاردىڭ جەتكەن جەتىستىگى − ينستيتۋت ۇجىمىنىڭ جەڭىسى, ەڭبەگىنىڭ جەمىسى دەسەك, ورىندى بولار. كۋرسانتتار وزدەرىن حالىقارالىق, رەسپۋبليكالىق, وبلىستىق, قالالىق دەڭگەيدە ۇيىمداستىرىلاتىن عىلىمي جوبالاردا, سپورتتىق جارىستاردا, ينتەللەكتۋالدى سايىستاردا جوعارى ناتيجە كورسەتىپ كەلەدى. مۇنداي بيىك بەلەستەردى باعىندىرعان ءبىلىم الۋشىلار قارۋلى كۇشتەرگە قوسقان ۇلەسى ءۇشىن «ەل قورعانى» مەدالىمەن ماراپاتتالادى. ەندىگى كەزەكتە وسى ماراپاتقا يە بولعان كۋرسانتتارعا توقتالىپ وتسەك:
قايىرجان جۇباندىقوۆ – راديوەلەكترونيكا جانە بايلانىس اسكەري-ينجەنەرلىك ينستيتۋتى رابيوباعىتتاۋ فاكۋلتەتىنىڭ 5-كۋرس كۋرسانتى. بولاشاق وفيتسەر مامان وقۋدا جانە جاۋىنگەرلىك دايىندىقتا ۇزدىك كورسەتكىش كورسەتكەنى ءۇشىن, عىلىمي-زەرتتەۋ جۇمىستارىنا قوسقان ۇلەسى ءۇشىن «ەل قورعانى» مەدالىمەن ماراپاتتالدى. كۋرسانت ق.ت.جۇباندىقوۆ رەسپۋبليكالىق ينتەللەكتۋالدى وليمپيادانىڭ جەڭىمپازى. ۆەدوموستۆوارالىق كونفەرەنتسيالاردىڭ قاتىسۋشىسى. «ۇزدىك سپورتشى جاۋىنگەر» سپورتتىق اتاعىنىڭ يەگەرى, ۇوس-تىڭ 70 جىلدىعىنا ارنالعان پارادقا قاتىسۋشى.
«ەل قورعانى» مەدالىمەن ماراپاتتالعان تاعى ءبىر كۋرسانت تەمىرلان مۇقاتاەۆ. ول اتالعان ينستيتۋتتىڭ راديوباعىتتاۋ فاكۋلتەتىنىڭ تۇلەگى. كۋرسانت ت.مۇقاتاەۆ تمد جوعارى وقۋ ورىندارىنىڭ كۋرسانتتارى اراسىندا وتكەن حالىقارالىق وليم-
پيادانىڭ قاتىسۋشىسى, «ۇزدىك سپورتشى جاۋىنگەر» سپورتتىق اتاعىنىڭ يەگەرى, ۇوس-تىڭ 70 جىلدىعىنا ارنالعان پارادقا قاتىسۋشى. رەجباي «التىن بەلگى» مەدالىنىڭ ۇمىتكەرى. ۆەدوموستۆوارالىق عىلىمي-زەرتتەۋ كونفەرەنتسيالارىنىڭ جەڭىمپازى. رەسپۋبليكالىق, قالالىق جوو ستۋدەنتتەرى اراسىندا وتكەن دەباتتاردىڭ جەڭىمپازى.
جىگىتكە جەتى ونەر دە از. جوعارىدا ايتىپ وتكەندەي, وزىنە سەنىمدى, ساۋاتتى ۇرپاق − ەلىمىزدىڭ جارقىن بولاشاعى. «ەل قورعانى» مەدالىندە قاشالىپ جازىلعان «وتانىڭدى ءسۇي, حالقىڭا قىزمەت ەت» دەگەن قاناتتى ءسوز ەلدى قورعاۋشى ءاربىر ازاماتتىڭ جادىندا بولۋى ءتيىس. ەگەر باۋىرجان مومىش ۇلىنىڭ سوزىمەن ايتار بولساق, «ەجەلدەن ەر تىلەگى – ەل تىلەگى. ادال ۇل ەر بولىپ تۋسا – ەل تىرەگى». انتىنا ادال, ەلىنە قورعان بولار ازاماتتارىمىز كوبەيە بەرسىن.
راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ ءبىتىرۋشى تۇلەكتەرىن بەس جىل كولەمىندە العان بىلىمدەرىنىڭ جەمىسىن كورىپ, بىلىكتى مامان اتانىپ, كومانديرلەر مەن وقىتۋشىلاردىڭ جانە اتا-انالارىنىڭ ءۇمىتىن اقتاۋلارىن تىلەيمىز!
ساۋلە شاياحمەتقىزى
الماتى
