نيدەرلاند كورولدىگى پاۆيلونىن تانىستىرۋعا ارنالعان پرەسس-تۋردا ەكسپو-2017 كورمەسىندەگى وسى ەلدىڭ باس كوميسسارى حانس دريسسەر باق وكىلدەرىنە پاۆيلون جادىگەرلەرىن جان-جاقتى تانىستىردى. ء«بىزدىڭ ەلىمىز مىڭداعان جىلدار بويى سۋمەن الىسىپ كەلەدى. ويتكەنى, نيدەرلاند تەڭىز دەڭگەيىنەن كوپ تومەن ورنالاسقان. سوعان بايلانىستى ءبىز كورمەدەگى جادىگەرلەرىمىزدە سۋ ەنەرگياسىنىڭ, جەل ەنەرگياسىنىڭ, اسىرەسە تەڭىز جەلى ەنەرگياسىنىڭ قۋاتىن اشۋعا تىرىستىق», دەدى ول.
گوللانديا پاۆيلونىنىڭ جەتەكشىسى ەۆەلين بەللدىڭ ايتۋىنشا, ەكسپو-2017 كورمەسىنە قاتىسۋعا دايىندىق بارىسىندا نيدەرلاند كورولدىگىنىڭ سىرتقى ىستەر مينيسترلىگى ەلدەگى بارلىق كرەاتيۆتى كومپانيالار اراسىندا بايقاۋ وتكىزگەن ەكەن. وسى بايقاۋ بارىسىندا Conspiracysinc اگەنتتىگى جەڭىمپاز بولىپ تانىلادى. كورولدىك پاۆيلونىنىڭ جاراقتاندىرۋى وتە قاراپايىم جانە گوللاندىقتاردىڭ ويلاۋ قابىلەتى مەن ءومىر ءسۇرۋ داستۇرىنەن كوپ ماعلۇمات بەرەدى. ەلدىڭ گەوگرافيالىق قونىستانۋى ادامدار تۇرمىسى ءۇشىن قولايلى ەمەس. الايدا, گوللاندىقتار وزدەرىنىڭ ءومىر سۇرۋگە دەگەن قۇلشىنىسى مەن ىزدەنىمپازدىعىنىڭ ناتيجەسىندە اساۋ تابيعاتتى يگىلىگىنە جاراتىپ, الەمدەگى ەڭ يننوۆاتسيالىق ەلدەردىڭ قاتارىنان كورىنە ءبىلدى. گوللانديا پاۆيلونى ءۇش زالدان تۇرادى. وسى زالدارعا قويىلعان جادىگەرلەر گوللاندىقتاردىڭ ەكونوميكالىق جەتىستىكتەرىن بارىنشا پاش ەتۋگە ارنالعان. ءبىرىنشى زالدا ەلدىڭ ەكونوميكالىق جەتىستىكتەرى, يننوۆاتسيالىق تەحنولوگيالار بويىنشا اقپاراتتار كورىنىس تاپسا, ەكىنشى زال 3D بەينە قوندىرعىلار ارقىلى گوللاندتىق ونەرتاپقىشتاردىڭ ويلاۋ قابىلەتىنىڭ دەڭگەيىن كورسەتۋگە ۇمتىلعان. ءۇشىنشى ينتەراكتيۆتى پاۆيلون بالاما قۋات كوزدەرىن اشۋداعى ەلدىڭ بۇگىنگى جەتىستىكتەرىنەن حابار بەرەدى. ماسەلەن, بۇگىندە گوللانديادا وندىرىلەتىن ەنەرگيانىڭ 4,5 پايىزى جاڭعىرمالى ەنەرگيا كوزدەرىنەن الىنادى. بۇل ەلدە, اسىرەسە, تەڭىز جەلىن يگىلىككە اينالدىرۋ ءۇشىن ۇلكەن جۇمىستار اتقارىلعان. ماسەلەن, Westermeerwind جەل ستانساسىنىڭ 48 تۋربيناسى بار. ول ساعاتىنا 500 كۆ ەلەكتر قۋاتىن ءوندىرىپ, 160 000 ءۇيدى جىلۋ جانە جارىقپەن قامتاماسىز ەتەدى. ەلدەگى ءاربىر ءۇشىنشى پويىز جەل كۇشىمەن وندىرىلگەن ەلەكتر قۋاتىمەن جۇرەدى.
نيدەرلاند كورولدىگى قازاقستان ەكونوميكاسىنا مول ينۆەستيتسيا سالعان جەتەكشى مەملەكەتتەردىڭ بىرىنەن سانالادى. ۇلتتىق بانك دەرەگىنشە, 2005-2006 جىلدارى نيدەرلاند ەلىمىزگە 71,7 ملرد اقش دوللارى كولەمىندە تىكەلەي ينۆەستيتسيا قۇيعان. سونىمەن بىرگە, بۇل ەل قازاقستاننىڭ جەتەكشى ساۋدا ارىپتەسى بولىپ تابىلادى. بۇگىندە قازاقستاندا نيدەرلاند كورولدىگى كاپيتالىنىڭ قاتىسۋىمەن 40-تان استام كاسىپورىن جۇمىس ىستەيدى. ەكسپو-2017 كورمەسىنىڭ اياسىندا گوللانديالىق بيزنەس وكىلدەرى قازاقستانداعى بالامالى قۋات كوزدەرىن جاڭعىرتۋ سالاسىنداعى جاڭا تەحنولوگيالار بويىنشا بىرقاتار جوبالاردى جۇزەگە اسىرماق.
توپتامانى ازىرلەگەن
جىلقىباي جاعىپار ۇلى,
«ەگەمەن قازاقستان»
