كەڭەس مۇشەلەرى مەن عىلىمي-ساراپتامالىق توپتار, اسسامبلەيا كافەدرالارىنىڭ جەتەكشىلەرى, مەملەكەتتىك ورگاندار مەن جوعارى وقۋ ورىندارىنىڭ وكىلدەرى قاتىسقان جيىنعا قحا توراعاسىنىڭ ورىنباسارى دارحان مىڭباي جەتەكشىلىك ەتىپ, مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردىڭ ءمان-جايى جان-جاقتى قاراستىرىلدى.
عىلىمي-ساراپتامالىق كەڭەستىڭ ەلۋ مۇشەسى قاتىسقان باسقوسۋدا قحا قىزمەتىن رۋحاني جاڭعىرتۋ بويىنشا عىلىمي-ساراپتامالىق تۇرعىدا سۇيەمەلدەۋدىڭ تۇجىرىمدامالىق جانە ادىسنامالىق ماسەلەلەرى قارالىپ, اسسامبلەيا كافەدرالارىنىڭ جۇمىس تاجىريبەسى مەن وزەكتى مىندەتتەرى ناقتىلاندى ءارى وتكەن جىلعى عىلىمي-زەرتتەۋلەردىڭ قورىتىندىلارى زەردەلەندى.
سونىمەن قاتار, جيىندا تالقىلانعان ەڭ ماڭىزدى ماسەلەنىڭ ءبىرى – عسك-ءنىڭ كەلەشەك جۇمىس جوسپارىنا ەلباسى ماقالاسىندا ەكشەپ كورسەتىلگەن باعىتتار بويىنشا بىرقاتار تۇزەتۋلەر ەنگىزۋ جونىندەگى شەشىمنىڭ قابىلدانۋى بولدى.
«مەملەكەت باسشىسى جاريالاعان ماقالا شەڭبەرىندە ەلىمىزدە قىزۋ قولعا الىنىپ جاتقان «تۋعان جەر» باعدارلاماسىن قازاقستان حالقى اسسامبلەياسى تولىق قولدايدى ءارى ونىڭ جوبالارىن جۇزەگە اسىرۋعا بەلسەندى اتسالىساتىن بولادى. سونداي-اق, قوعامدىق سانانى جاڭعىرتۋ باعىتىنداعى جۇمىستاردا باسىمدىق بەرىلۋى ءتيىس تەتىكتەر – ازاماتتاردىڭ تەڭ قۇقىنىڭ ساقتالۋى مەن حالىقتىڭ نانىم-سەنىم, سالت-ءداستۇرى جانە ۇلتتىق قۇندىلىقتارىنىڭ دارىپتەلۋىنە سەلكەۋ تۇسپەۋىن قامتاماسىز ەتۋ بولىپ تابىلادى. وسى ورايدا, قوعام تىنىسىنىڭ بارومەترى سانالاتىن بۇگىنگى جاستارعا ءتۇرلى قولداۋلار بىلدىرە وتىرىپ, ولاردىڭ بۇگىنگى قوعامعا ەركىن ءسىڭىسىپ, جەدەل بەيىمدەلىپ كەتۋىنە بارىنشا جاعدايلار جاسالۋى ءتيىس», دەدى د.مىڭباي.
جيىندا جاستار اراسىندا قوعامدىق سانانى جاڭعىرتۋ بويىنشا قازاقستان حالقى اسسامبلەياسى كافەدرالارىنىڭ تاجىريبەسى مەن ماقسات-مىندەتتەرى دە كەڭىنەن ءسوز بولدى. اتالعان تاقىرىپتا قحا توراعاسىنىڭ ورىنباسارى سەرگەي ۆيشنياك, عىلىمي-ساراپتامالىق كەڭەس مۇشەسى, م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندەگى قحا كافەدراسىنىڭ مەڭگەرۋشىسى ليۋدميلا گريۆەننايا سەكىلدى سالا ماماندارى ءسوز الىپ, ءوز ويلارىن ورتاعا سالدى. ال اقمولا وبلىستىق ارداگەرلەر كەڭەسىنىڭ توراعاسى, عىلىمي-ساراپتامالىق كەڭەس مۇشەسى عوسمان تولەعۇل مەملەكەت باسشىسىنىڭ ماقالاسى جارقىن بولاشاققا جەتەلەيتىن باستى قۇجات ەكەندىگىن اتاپ ءوتتى.
«قوعامدىق ساياسي جاعدايدىڭ تۇراقتالۋى مەن ەل ىشىندەگى الەۋمەتتىك-تۇرمىستىق ماسەلەلەردىڭ ءتيىمدى شەشىلۋىندە «رۋحاني جاڭعىرۋ: بولاشاققا باعدار» ماقالاسى ءبىزدىڭ باستى قۇجاتىمىزعا اينالىپ وتىر. ءتىپتى, وسى كۇندەرى الەمدى الاڭداتىپ وتىرعان ەكسترەميزم مەن تەرروريزمگە قارسى كۇرەس باعىتىنداعى جوسپار-جوبالاردى اتاپ كورسەتۋ ارقىلى ماقالانىڭ مازمۇنى عىلىمي-ساراپتامالىق كەڭەس جۇمىسىن شيراتا تۇسكەندەي. بۇل سونداي ءمان-مازمۇنىمەن قۇندى ءارى سونىسى ءۇشىن كوپشىلىكتىڭ كوڭىلىنەن شىعۋدا. ال ەندى بۇگىنگىدەي باسقوسۋلار ارقىلى ءبىزدىڭ الداعى ماقسات-مىندەتىمىز ايقىندالىپ, ونى جۇزەگە اسىرۋ مەرزىمدەرى مەجەلەنەتىن بولادى», دەدى ول.
وتىرىستا قوعامدىق سانانى جاڭعىرتۋ پروتسەستەرىن عىلىمي-ساراپتامالىق سۇيەمەلدەۋدىڭ تۇجىرىمدامالىق جانە ادىستەمەلىك تاسىلدەرى تالقىلانىپ, عىلىمي-ساراپتامالىق كەڭەس قۇرىلىمىنا وزگەرىستەر مەن تولىقتىرۋلار ەنگىزۋ ماسەلەسى دە كۇن تارتىبىنە شىعارىلدى. سونداي-اق, قازاقستاندىق بىرەگەيلىكتى نىعايتۋ مەن دامىتۋدىڭ تاريحى, قۇقىقتىق جانە ساياسي اسپەكتىلەرى بويىنشا عىلىمي-ساراپتامالىق جيناقتى باسپاعا ۇسىنۋ تۋرالى وڭ شەشىم قابىلداندى.
نۇرلىبەك دوسىباي,
«ەگەمەن قازاقستان»
