سۋرەتپەن قاتار قويىلعان تولقۇجات تا – تۇپنۇسقا. نكۆد-دا ساقتالىپ, 80-جىلداردان كەيىن ىشكى ىستەر دەپارتامەنتىنە وتكىزىلگەن پاسپورتتىڭ مۇقاباسىندا كەڭەس وكىمەتىنىڭ ەلتاڭباسى جانە التى تىلدە جازىلعان پاسپورت دەگەن جازۋ بار. كەلەسى بەتىندە پاسپورتتىڭ 1941 جىلدىڭ 11 شىلدەسىنە دەيىن جارامدى ەكەنى, اقىننىڭ اتى-ءجونى (دجانسۋگۋروۆ يلياس), تۋعان جىلى (1894), تۋعان جەرى (اۋل №4, اقسۋ اۋدانى, الماتى وبلىسى), ۇلتى (قازاق), الەۋمەتتىك جاعدايى (قىزمەتكەر), تۇرعىلىقتى جەرى (الما-اتا) جايلى ورىسشا ماعلۇمات بەرىلگەن. اسكەرگە مىندەتتى ەمەس ەكەنى جايلى دا جازىلعان. اە№503124 ءنومىرلى تولقۇجات.
ءبىر قىزىعى, پاسپورتتىڭ 3-ءشى بەتىندە پاسپورت يەسىنىڭ وتباسى تۋرالى دا مالىمەت بەرىلگەن. ۇلكەن ۇلى ازات, قىزدارى ءۇمىت پەن يلفا تۋعان جىلدارىمەن جازىلعان. اقىننىڭ جۇبايى جانە ۇلى سايات تۋرالى مالىمەت جوق. مۋزەي قىزمەتكەرلەرىنىڭ ايتۋىنشا, سەبەبى, ءالى انىقتالماعان. ەڭ سوڭعى بەتتە ءىلياستىڭ تۇرعىلىقتى جەرى تۋرالى تولىق مالىمەت بەرىلگەن.
تولقۇجات 31 بەتتەن تۇرادى. 1936 جىلى 11 شىلدە كۇنى بەرىلگەن. ول كەزدىڭ زاڭى بويىنشا بەس جىلدا ءبىر اۋىستىرىپ تۇراتىن قۇجاتىن جاڭالاۋعا ۇلگەرمەپتى. ۇلگەرتپەپتى. اقىننىڭ سوڭعى ۇستاعان قۇجاتى رەتىندە بۇل پاسپورتتىڭ ماڭىزى زور. ءىلياستىڭ قولىنىڭ تابى قالعان, جان قالتاسىنان تاستاماي جۇرگەن جەكە باسىن كۋالاندىراتىن قۇجات ارپالىستى عۇمىردىڭ سوڭعى ىشقىنىسى سياقتى اسەر ەتەدى.
قۇجاتتىڭ قاپتالىندا ات ارىپ – تۋلاق, ەر ارىپ – ارۋاق بولعان سۇرقاي جىلداردىڭ ءبىر ەستەلىگىندەي بولىپ قاتتى ازاپتالعان اقىننىڭ اقتىق سۋرەتى قاراپ تۇر...
الماس ءنۇسىپ,
«ەگەمەن قازاقستان»
الماتى وبلىسى
