ادام ءومىرى ءۇشىن ەڭ جاۋاپتى كەزەڭ دە ماماندىق تاڭداۋعا قاتىستى بولسا كەرەك, ءسىرا. ابايدىڭ «سەن دە ءبىر كىرپىش دۇنيەگە, كەتىگىن تاپتا بار قالان» دەگەن ءسوزى وسى ويىمىزدى ايعاقتاي تۇسكەندەي. قازىر جاستار جالاقىسى كوپ, تابىستى ماماندىقتاردى تاڭداۋدى ءجون سانايدى. ەكىنىڭ ءبىرى زاڭگەر, ەكىنىڭ ءبىرى ەكونوميست. سويتە تۇرا جۇمىس تاپپاي جۇرگەندەرى قانشاما؟ «ەكى قولعا − ءبىر كۇرەك» دەپ قولىندا تاباقتاي ديپلوم بولعانىمەن, جۇمىسسىز جۇرگەن جاستار كوپ. جالپى, ستاتيستيكالىق مالىمەتكە سۇيەنسەك, وتكەن جىلى مەكتەپ بىتىرگەندەر سانى − 120 مىڭ. ونىڭ 87 مىڭى عانا ۇلتتىق بىرىڭعاي تەستىلەۋگە ءوتىنىش بىلدىرگەن. ال تەستىلەۋگە 84 079 مەكتەپ ءبىتىرۋشى قاتىسقان. قالعاندارى ورتا بىلىممەن شەكتەلىپ قالىپ وتىر. ال بيىل 137 671 وقۋشى وقۋ جىلىن اياقتاماق. بۇل بىلتىرعىمەن سالىستىرعاندا, ەداۋىر جوعارى. وتكەن جىلى جوعارى وقۋ ورنىنا تاپسىرۋشىلارعا 31 702 گرانت بولىنگەن. دەسەك تە, وسى مەملەكەتتىك گرانتتا وقيتىنداردى قاداعالايتىن ارنايى جۇمىس توبى قۇرىلۋ كەرەك. قازىر ۋنيۆەرسيتەت بىتىرگەن جاستاردى قاي جەرگە جۇمىسقا ورنالاسقانى تۋرالى دەرەكتەر جيناپ جاتادى. الايدا ونىڭ ءبارى قاعاز جۇزىندە عانا. مەملەكەتتەن بولىنگەن قارجىنى دۇرىس يگەرۋدىڭ ءبىر جولى ەلىمىزگە قاجەتتى ماماندىقتاردى دايىنداپ, بىتىرگەن تۇلەكتەردى جۇمىسقا ورنالاستىرۋعا جاعداي جاساۋ. جۇمىسشى ماماندىقتارعا باسىمدىق بەرىلىپ, گرانت تا سول سالاعا كوبىرەك بولىنسە يگى.
ايتسە دە تالاپكەرلەر مەملەكەتتىك گرانتقا قول جەتكىزۋدىڭ ءبىر جولى وسى دەپ ءوزى تاڭداعان ماماندىقتان باس تارتىپ, گرانت كوبىرەك بولىنەدى-اۋ دەگەن سالاعا اياق باسىپ جاڭىلىپ جاتادى. وسىدان بىرنەشە جىل بۇرىن وزىممەن قاتارلاس وقىعان ايگۇل ەسىمدى قۇربىمنىڭ جاعدايى ءدال وسىنداي ەدى. اۋىلداعى اتا-اناسىنىڭ قامىن ويلاپ, قاي سالادا گرانت كوبىرەك بولىنەدى, سوعان تاپسىرام دەپ كەلگەن ەكەن. ءسويتىپ, مال دارىگەرىنىڭ وقۋىنا گرانتقا ءتۇستى. الايدا, بۇل قادام جوعارى ءبىلىمدى تەگىن الۋدىڭ امالى ەدى. وقۋ بىتىرگەن سوڭ ول ماماندىقتان قول ءۇزىپ, باسقا سالاعا اۋىسىپ كەتتى. وسىنداي ءبىلىم العان ستۋدەنتتەردەن قانداي بىلىكتى مامان قالىپتاسادى؟
ەندى ءبىر بالالار اتا-اناسىنىڭ قالاۋىمەن ماماندىق تاڭدايدى. اتا-انام دارىگەر بولۋىمدى قالادى, دەيدى اسەل ەسىمدى بويجەتكەن. ويتكەنى, سول جىلى ونىڭ سال اۋرۋىمەن اۋىراتىن ءسىڭلىسى دۇنيە ەسىگىن اشىپ ەدى. سوندىقتان ول نەيروحيرۋرگيا ماماندىعىنا باراتىن بولىپ شەشتى. 7 جىل وقىعان دارىگەرلىك وقۋدى ءساتتى اياقتاپ, سول سالادا قىزمەت ەتىپ ءجۇر. دەگەنمەن, قازىر ءوزى قالاماعان ماماندىقتى تاڭداعانىن, باسقا سالاعا اۋىسقىسى كەلەتىنىن ايتادى. مىنە, وسىلايشا ماماندىقتى دۇرىس تاڭداماي بارماق تىستەپ, وكىنىپ جۇرگەن جاستاردى ءجيى كەزدەستىرۋگە بولادى.
سوندىقتان ءار وقۋشى ءوزىنىڭ جانىنا جاقىن, قابىلەتى بار سالاعا ات باسىن بۇرسا دەيمىز. مەكتەپ مۇعالىمدەرى دە تۇلەكتەردىڭ ماماندىق تاڭداۋىنا سالعىرت قاراماي, ولارعا دۇرىس باعىت-باعدار بەرىپ وتىرعانى ابزال بولار ەدى. ءار بالانىڭ بويىندا ءبىر قابىلەت بولادى, ءبىرى جاقسى سۋرەت سالسا, ەندى ءبىرى ەسەپكە جۇيرىك, تاعى ءبىرى ءتىل سالاسىنا بەيىمى بولسا, ەندى ءبىرى تەحنيكانىڭ قىر – سىرىنا قانىق. وسىلايشا, جاستايىنان بالانىڭ قارىم – قابىلەتىنە وراي تالانتىن اشىپ, تالابىن ۇشتاپ جىبەرسە, تالاپكەر دە تاۋى شاعىلماي ءوزىنىڭ دىتتەگەن ماقساتىنا جەتەر ەدى.
ايمان مۇقىشەۆا
