كوميتەتتىڭ كوشپەلى وتىرىسىندا دەپۋتاتتار اسكەري ءبولىمىنىڭ ماتەريالدىق-تەحنيكالىق قامتاماسىز ەتىلۋىمەن, اسكەري قىزمەتشىلەردىڭ تۇرمىسى مەن قارۋ-جاراق جابدىعى جانە بايلانىس قۇرالدارى كورمەسىمەن, سونداي-اق, جەدەل ماقساتتاعى بريگادا جانە «بۇركىت», ارنايى ماقساتتاعى وتريادى جەكە قۇرامىنىڭ جابدىقتالۋىن كوزبەن كورىپ, جالپى جاعدايدىڭ ءمان-جايىنان حاباردار بولدى. سونىمەن قاتار, سەناتورلار وقۋ قالاشىعىنداعى اسكەري قىزمەتشىلەر ۇيىمداستىرعان كورسەتىلىم ساباقتارىن دا تاماشالادى.
كەزدەسۋ اياسىندا ۇلتتىق ۇلان باسشىلىعىنىڭ قاتىسۋىمەن «قازاقستان رەسپۋبليكاسى ۇلتتىق ۇلانى تۋرالى» زاڭنىڭ ىسكە اسىرىلۋى جايىنداعى سۇراقتار بويىنشا دوڭگەلەك ۇستەل ءوتىپ, وندا اتالعان تاقىرىپ شەڭبەرىندە ۇلتتىق ۇلان باس قولباسشىسى, گەنەرال-لەيتەنانت رۋسلان جاقسىلىقوۆ ارنايى بايانداما جاسادى.
بۇگىندە قالاشىقتىڭ جالپى اۋماعى 20 گەكتار جەردى الىپ جاتقان اسكەري كەشەننىڭ نەگىزگى عيماراتتار كەشەنى 31 115 شارشى مەتردى قۇرايدى. ونىڭ ىشىندە شتاب عيماراتى مەن ءۇش جاۋىنگەرلىك كازارما, ەكى اسحانا, تەحنيكالىق قىزمەت كورسەتۋ ورىندارىمەن جابدىقتالعان اۆتوموبيل پاركى, اسكەريلەردىڭ دەنە- شىنىقتىرۋىنا ارنالعان قۇرىلعىلارمەن قاتار, ەكى قاباتتى سپورت كەشەنى جانە زاماناۋي ۇلگىدە جابدىقتالعان مۋلتيمەديالىق اتۋ ءتيرى بار.
«ەلباسىمىزدىڭ ارنايى تاپسىرماسى نەگىزىندە قۇرىلعان ۇلتتىق ۇلاننىڭ باستى ماقساتى – استانا قالاسىنىڭ قوعامدىق قاۋىپسىزدىگىن قامتاماسىز ەتۋ. بۇل جەردە اسكەريلەرگە قاجەتتى جاعدايلاردىڭ بارلىعى جاسالعان. ال ەندى وسى كۇندەرى ەلوردامىزدا ەكسپو كورمەسىنىڭ وتكىزىلۋىنە بايلانىستى ءبىزدىڭ بولىمگە ەلىمىزدىڭ ءتورت وڭىرىنەن قوسىمشا اسكەريلەر قىزمەتكە شاقىرىلدى. ولارعا دا ءتيىستى دەڭگەيدە جاعداي جاسالىپ, قوعام قاۋىپسىزدىگى قىراعىلىقپەن قاداعالانۋدا دەپ نىق سەنىممەن ايتا الامىن», دەدى ۇلتتىق ۇلان باس قولباسشىسىنىڭ ورىنباسارى مۇحامەتقالي ساتوۆ.
مۇندا وڭ شەشىمىن تاپقان ەڭ ماڭىزدى ماسەلەنىڭ ءبىرى – اسكەري قالاشىقتا وفيتسەرلەر مەن كەلىسىمشارت نەگىزىندە قىزمەت ەتەتىن اسكەريلەر جانە ولاردىڭ وتباسىلارى ءۇشىن 104 پاتەرلى تۇرعىن ءۇي تۇرعىزىلعانى بولسا كەرەك. اۋلا ىشىندە اسىر سالىپ جۇرگەن بالاقايلاردىڭ بىرنەشەۋىنىڭ ماڭدايىنان ءسۇيىپ, باتاسىن بەرگەن سەنات دەپۋتاتى مۇحتار التىنباەۆ:
«تاۋەلسىزدىك جىلدارىندا اسكەري سالاداعى مامانداردىڭ الەۋمەتتىك جاعدايىن جاقسارتۋ مەملەكەت باسشىسىنىڭ باسىم باعىتتارىنىڭ ءبىرى بولدى. مەملەكەتتىڭ ۇدايى كوڭىل ءبولۋىنىڭ ناتيجەسىندە بىزدە ۇلتتىق ۇلان مەن ونىڭ قىزمەتىن رەتتەيتىن ارنايى زاڭ دا قابىلداندى. بۇگىن وسى زاڭ تالاپتارىنىڭ ورىندالۋىن قاداعالاۋ ماقساتىمەن وسى بولىمگە كەلىپ تۇرمىز. بۇل جەردەگى جاعدايدى وتە جوعارى باعالايمىن. ارينە, ءومىر بولعان سوڭ ءتۇرلى جاعدايلار ورىن الىپ, بىرقاتار ماسەلەلەر تۋىنداپ جاتادى. ونىڭ ءبارىن دە وسىنداي كوشپەلى وتىرىستار اياسىندا ءتيىستى دەڭگەيدە شەشەتىن بولامىز», دەدى سەناتور.
جالپى, استانا ىرگەسىندەگى ۇركەر شاعىن اۋدانىندا ورنالاسقان اسكەري ءبولىمنىڭ بۇگىنگى كەلبەتى بارىنشا زاماناۋي تالاپقا ساي بەيىمدەلگەن. سەبەبى, مۇندا تۇرعىندار ءۇشىن ستاديون مەن سپورتتىق جانە وقۋ عيماراتتارى, جاڭا مەديتسينالىق قۇرال-جابدىقتارمەن تولىق قامتاماسىز ەتىلىپ, 60 جاتىن جانە كۇندەلىكتى امبۋلاتوريالىق ەم الۋ ءۇشىن 100 ورىندىق لازارەت سالىنعان.
نۇرلىبەك دوسىباي,
«ەگەمەن قازاقستان»
