«بۇگىندە جاسىل ەنەرگياعا, جاڭارتىلاتىن كۇن ەنەرگياسىنا تاريف 15-16 تسەنتتى قۇرايدى, بۇل باعا 2020 نەمەسە 2021 جىلى ينۆەستيتسيانىڭ قۇيىلۋىنا تىكەلەي بايلانىستى. جاسىل ەنەرگەتيكانى قولداۋعا باعىتتالعان مۇنداي تاريف باسقا ەشقانداي ەلدە جوق», دەگەن مينيستر ۋكراينانىڭ بالامالى ەنەرگيا كوزدەرىن ەنگىزىپ, جەل مەن كۇندى بەلسەندى قولدانىپ, ينۆەستيتسيالىق بيزنەسكە جايلى جاعداي جاساۋ ءۇشىن رەفورمالار جۇرگىزىپ جاتقانىن جەتكىزدى. سونىمەن قاتار, قازىرگى تاڭدا ەنەرگيا ءۇشىن كۇننىڭ باستى رەاكتور ەكەنىن جانە ونى ءتيىمدى قولدانۋ كەرەكتىگىن ايتتى.
گ.زۋبكونىڭ پىكىرىنشە, ۋكراينامەن بىرگە, قازاقستاندا جانە كورمەگە قاتىسۋشى بارلىق مەملەكەتتە ۇلكەن تاجىريبە بار. زاماناۋي تەحنولوگيالار ءبىر گەكتار جەردەن ەنەرگيا ءوندىرۋ مۇمكىندىكتەرىن ارتتىرۋدا. ءار بەس جىل سايىن ەكى ەسە كوپ ەنەرگيا الىنۋدا. بۇل – ءبىزدىڭ بولاشاق ۇرپاققا قالدىرىپ كەتەتىن قۋاتىمىز. الايدا, ەنەرگيانى ءتيىمسىز قولدانعاندىعىمىزدان عالامشارىمىز جىلدان-جىلعا وزگەرىسكە ۇشىراۋدا. سوندىقتان, كەلەر ۇرپاق الدىنداعى جاۋاپكەرشىلىكتى موينىمىزعا الۋىمىز قاجەت
ۋكراينالىق سەكتسيا كوميسسارى ەلىندەگى استىق ەكسپورتى شامامەن 40 ميلليون توننانى قۇرايتىنىنا, مۇنداي اۋقىمدى استىق كولەمىنەن دە ەنەرگيا وندىرۋگە بولاتىنىنا توقتالدى. «قازىرگى ۋاقىتتا تەك ەكسپورتتالاتىن استىق كولەمى 39 ميلليون توننا بولسا, جالپى ءوندىرىس كولەمى ودان دا كوپ. ونىڭ قالدىقتارىنان بيوگاز وندىرۋگە جانە ونى ەنەرگەتيكاداعى كەيىنگى قولدانىلۋىنا جۇمساۋعا مۇمكىندىك بار. جانە جەل ەنەرگەتيكاسىنا قاتىستى قازاقستانمەن بىرلەسكەن كووپەراتسيا ۇلگىسى بۇرىن-سوڭدى قولدانىلماعان ەنەرگيانىڭ قانشالىقتى ءتيىمدى بولاتىنىن كورسەتتى», – دەدى گ.زۋبكو.
باسقوسۋدا ەنەرگەتيكا ۆيتسە-ءمينيسترى باقىتجان جاقساليەۆ ۋكراينالىق مامانداردىڭ عالامشار ەكوجۇيەسىن ساقتاۋعا جانە جاسىل ەنەرگەتيكانىڭ دامۋىنا ۇلەس قوسۋعا دايىن ەكەنى قۋانتاتىنىن ايتتى. ء«بىز استانانىڭ كۇن, جەل, بيوگاز, تەڭىز جانە جىلى سۋلاردىڭ ەنەرگياسىن قولدانۋ سالاسىنداعى ۇزدىك الەمدىك جاڭالىقتار مەن ترەندتەردى تانىستىراتىن ءتيىمدى الاڭعا اينالارىنا سەنىمدىمىز. قازاقستان ءۇشىن ۋكراينا – ماڭىزدى ەكونوميكالىق سەرىكتەس. ءبىز ەكى ەل اراسىنداعى تىعىز قارىم-قاتىناس پەن ءوزارا تۇسىنىستىكتىڭ جوعارى دەڭگەيىن بيىك باعالايمىز», دەدى ۆيتسە-مينيستر.
وتكەن ساندارىمىزدىڭ بىرىندە ۋكراينالىق شەبەرلەر ەكسپو-2017 كورمەسى ءۇشىن ۇزىندىعى 30 مەتر بولاتىن رەكوردتى سۇلگى اكەلگەنىن جاريالاعانبىز. قولونەر بۇيىمىندا سول مەملەكەتتىڭ ءاربىر وڭىرىنە ءتان الۋان ءتۇرلى ورنەكتەر بەينەلەنگەن. حالىقارالىق شارادان سوڭ بۇل تۋىندى قازاقستانداعى ۋكراينا ەلشىلىگىنە تابىستالماق.
ەكسپو-2017 كورمەسىندەگى ۋكراينا ەكسپوزيتسياسى «جىبەك جولى» پلازاسىنىڭ قۇرامىندا ورنالاسقان. وندا ۋكراينانىڭ يننوۆاتسيالىق جەل جانە كۇن گەنەراتورلارى, ەنەرگيا ۇنەمدەيتىن ءۇي, ەلەكتر وندىرەتىن پەردەشەلەر جانە وزگە دە جاڭالىقتارى قويىلعان.
اسحات رايقۇل,
«ەگەمەن قازاقستان»
