«وتىرار سازى» وركەسترى ۇلتتىق اسپاپتارىمىزدىڭ اسا باي تۇرلەرىمەن تانىسۋعا مۇمكىندىك بەرەتىن بىردەن-ءبىر وركەستر. وركەستردە دومبىرا مەن قوبىزدان باسقا باعا جەتپەس مادەني مۇرا بولىپ ەسەپتەلەتىن جەتىگەن, شەرتەر, شاڭقوبىز, مەسقوبىز, سىرناي مەن سازسىرناي, سىبىزعى مەن اساتاياق, داۋىلپاز, تۇياقتاس قوڭىراۋ, قايراق ءۇن قاتادى. «وتىرار سازىنىڭ» نەگىزىن قالاۋشى – حالىق قاھارمانى, كسرو حالىق ءارتىسى, مەملەكەتتىك سىيلىقتىڭ لاۋرەاتى, كومپوزيتور نۇرعيسا تىلەنديەۆ ەدى. مۋزىكا ونەرىندە قايتالانباس ءىز قالدىرعان تۇلعا وركەستردى بىرەگەي شىعارماشىلىق ۇجىمعا اينالدىرا ءبىلدى. بۇگىندە ۇجىمعا ن.تىلەنديەۆتىڭ قىزى, قازاقستاننىڭ ەڭبەك سىڭىرگەن قايراتكەرى ءدىنزۋحرا تىلەنديەۆا جەتەكشىلىك ەتەدى. ال وركەستردىڭ ديريجەرلەرى – قازاقستاننىڭ ەڭبەك سىڭىرگەن ءارتىسى جالعاسبەك بەگىندىكوۆ پەن ءمۇسىلىم امزە. وركەستر تەك ءوز ەلىمىزدە عانا ەمەس, الەمنىڭ كوپتەگەن ەلدەرىندە كونتسەرت وتكىزىپ جۇرگەن تاڭداۋلى ۇجىمداردىڭ قاتارىندا.
استانادا وتكەن كونتسەرتكە دە «وتىرار سازىنىڭ» مول دايىندىقپەن كەلگەنى كورىندى. قازاقستاننىڭ ەڭبەك سىڭىرگەن قايراتكەرلەرى ءجاميلا سەركەباەۆا, ءجاميلا باسپاقوۆا, گۇلزيا ستامبەك, لاريسا ناسرەتدينوۆالار, سونداي-اق, حالىقارالىق بايقاۋلاردىڭ لاۋرەاتتارى باقتىگۇل بيسەمباەۆا, فارحاد كۋبيەۆ, نۇرسۇلتان شاتىرحان ۇلى كونتسەرتتە قازاق جانە شەت ەل كومپوزيتورلارىنىڭ شىعارمالارىن ورىندادى.
ايگۇل سەيىلوۆا,
«ەگەمەن قازاقستان»
